NGOs ៖ សិក្ខាសាលាពិគ្រោះលើច្បាប់NGO របស់រដ្ឋសភា គ្រាន់តែធ្វើបង្គ្រប់កិច្ចប៉ុណ្ណោះ
អង្គការក្រៅរដ្ឋាភិបាលមួយចំនួន បានចាត់ទុកការធ្វើសិក្ខាសាលាពិគ្រោះយោបល់លើសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាលរបស់រដ្ឋសភានៅថ្ងៃទី០៨ កក្កដាសប្តាហ៍ក្រោយថា គឺដើម្បីបង្គ្រប់កិច្ចប៉ុណ្ណោះ។ ការចាត់ទុកបែបនេះ ដោយសារសិក្ខាសាលានេះបានប្រកាសធ្វើឡើងប្រថុចញ៉ុចពេក។
ចុះផ្សាយនៅថ្ងៃ៖
ស្តាប់ - ០២:០៩
លោកតឹក វណ្ណារ៉ា នាយកប្រតិបត្តិវេទិកានៃអង្គការមិនមែនរដ្ឋាភិបាលស្ដីពីកម្ពុជា បានថ្លែងថា រដ្ឋសភាជាតិកម្ពុជា បានប្រកាសរៀបចំសិក្ខាសាលានេះឡើងក្នុងរយៈពេលខ្លីពេកដែលធ្វើឲ្យអង្គការក្រៅរដ្ឋាភិបាលមិនអាចត្រៀមខ្លួនបានពេញលេញក្នុងការចូលរួមពិគ្រោះយោបល់។ ម្យ៉ាងទៀត សិក្ខាសាលាដែលគ្រោងនឹងធ្វើឡើងតែមួយព្រឹកនោះ ក៏ជារយៈពេលមួយដ៏ខ្លី ដែលមិនអាចមានពេលវេលាគ្រប់គ្រាន់ក្នុងការបញ្ចេញមតិយោបល់ផងដែរ។
ចំណែក លោកសួន ប៊ុនស័ក្តិ ប្រធានលេខាធិការដ្ឋាននៃគណៈកម្មការធិការប្រព្រឹត្តកម្មនៃអង្គការសមាគមការពារសិទ្ធិកម្ពុជាហៅកាត់ថា CHRAC បានបន្ថែមថា រដ្ឋសភាគួរទុកពេលឲ្យបានច្រើនជាងនេះ ដើម្បីពិគ្រោះយោបល់លើសេចក្តីព្រាងច្បាប់ដ៏ចម្រូងចម្រាសមួយនេះ។ លោកថា ច្បាប់នេះមិនមែនជារឿងអាសន្នដែលជាតិត្រូវតែធ្វើយ៉ាងប្រញាប់ប្រញាល់បែបនេះនោះទេ។
លោកឈាង វុន អ្នកនាំពាក្យរដ្ឋសភា បានបញ្ជាក់ថា សិក្ខាសាលានេះគឺធ្វើឡើងក្នុងពេលសមស្របហើយ ព្រោះថា រដ្ឋាភិបាលធ្លាប់បានបើកឲ្យមានការពិគ្រោះយោបល់ជាច្រើនលើកមកហើយលើសេចក្តីព្រាងច្បាប់នេះនាពេលកន្លងមក។
គួរឲ្យដឹងថា គណៈកម្មការកិច្ចការបរទេស សហប្រតិបត្តិការអន្តរជាតិ ឃោសនា និងព័ត៌មាន សហការជាមួយគណៈកម្មការមហាផ្ទៃ ការពារជាតិ និង មុខងារសាធារណៈ ព្រមទាំងគណៈកម្មការនីតិកម្ម និងយុត្តិធម៌នៃរដ្ឋសភា គ្រោងនឹងរៀបចំសិក្ខាសាលាពិគ្រោះយោបល់លើសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាលនៅថ្ងៃទី៨ កក្កដា សប្តាហ៍ក្រោយ។ បន្ទាប់ពីសិក្ខាសាលានៅពេលព្រឹក លុះពេលរសៀល គណៈកម្មការទាំងបី នឹងយកមតិយោបល់ដែលបានពីការពិគ្រោះយកទៅពិភាក្សាជាមួយខាងរដ្ឋាភិបាល មុនបញ្ចូនទៅគណៈកម្មាធិការអចិន្ត្រៃយ៍នៃរដ្ឋសភា និងបញ្ជូនទៅរដ្ឋសភា ដើម្បីពិភាក្សា និងសម្រេចអនុម័ត។
យ៉ាងណាក៏ដោយ មុនមួយថ្ងៃនៃសិក្ខាសាលាពិគ្រោះយោបល់របស់រដ្ឋសភា ពោល គឺនៅថ្ងៃទី៧ កក្កដា ក្រុមអង្គការក្រៅរដ្ឋាភិបាល ក៏នឹងរៀបចំសិក្ខាសាលាមួយ ដើម្បីពិគ្រោះយោបល់លើសេចក្តីព្រាងច្បាប់នេះផងដែរ។ លោកសួន ប៊ុនស័ក្តិ បានគូសបញ្ជាក់ថា សិក្ខាសាលានេះ នឹងប្រមូលមតិយោបល់ និងបញ្ជាក់ពីគោលជំហររួមរបស់ក្រុមអង្គការក្រៅរដ្ឋាភិបាល ដើម្បីដាក់ជូនទៅកាន់រដ្ឋសភា។
បើតាមលោកឈាង វុន សេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល អាចនឹងត្រូវរដ្ឋសភាបើកកិច្ចប្រជុំពេញអង្គដើម្បីពិភាក្សា និងអនុម័តនៅមួយសប្តាហ៍ បន្ទាប់ពីបានដាក់ឲ្យពិគ្រោះយោបល់ជាសាធារណៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ