អ្នកនាំពាក្យ៖ លោក សម រង្ស៊ី នៅតែចង់ចូលរួមបុណ្យសពម្ដាយក្មេកប៉ុន្តែមិនទាន់មានភ្លើងខៀវពីបក្សកាន់អំណាច
លោក សម រង្ស៊ី ដែលកំពុងរស់នៅដោយនិរទេសខ្លួនឯងនៅក្រៅប្រទេសនៅតែរក្សាជំហចង់ ចូលស្រុកដើម្បីចូលរួមបុណ្យសពម្ដាយក្មេក ប៉ុន្តែមិនទាន់មានភ្លើងខៀវពីគណបក្សកាន់អំណាច។ គណបក្សកាន់អំណាចតាមរយៈអ្នកនាំពាក្យចាត់ទុកបំណងចង់ចូលស្រុករបស់លោក សម រង្ស៊ី ជាការស្ទាបស្ទង់សភាពការណ៍។
ចុះផ្សាយនៅថ្ងៃ៖
គិតរហូតមកដល់ល្ងាចថ្ងៃសៅរ៍នេះ គណបក្សសង្គ្រោះជាតិនៅមិនទាន់បានចម្លើយពីលោកនាយករដ្ឋមន្ត្រី ហ៊ុន សែន នៅឡើយទេជុំវិញបំណងវិលចូលស្រុកភ្លាមៗរបស់លោក សម រង្ស៊ី បន្ទាប់ពីលោក សម រង្ស៊ី បានសរសេរលិខិតមួយច្បាប់ ផ្ញើទៅកាន់លោកនាយករដ្ឋមន្ត្រី ហ៊ុន សែនក្នុងគោលដៅគឺចង់វិលត្រលប់មកកាន់ប្រទេសកម្ពុជាវិញដើម្បីចូលរួមគោរពវិញ្ញាណក្ខន្ធសពម្តាយក្មេករបស់លោកជាលើកចុងក្រោយ។ ម្ដាយក្មេកលោក សម រង្ស៊ី ឧបាសិកា ញឹក ជូឡុង-មាសកេត សមភ័ក្រ ជាម្តាយបង្កើតរបស់លោកស្រី ជូឡុង សូមូរ៉ា ត្រូវបូជានៅថ្ងៃអាទិត្យទី២៧វិច្ឆិកា។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានប្រាប់វិទ្យុបារាំងថា ប្រសិនបើមានការសម្របសម្រួលពីថ្នាក់ដឹកនាំគណបក្សប្រជាជនកម្ពុជាលោក សម រង្ស៊ី នឹងធ្វើដំណើរមកគោរពវិញ្ញាណក្ខន្ធម្ដាយក្មេករបស់គាត់។ ប៉ុន្តែបើមិនទាន់មានការសម្របសម្រួលទេលោក សម រង្ស៊ី នឹងលើកពេលមកប្រទេសកម្ពុជា។
សូមបញ្ជាក់ថា លោក សម រង្ស៊ី ធ្លាប់បានទទួលការលើកលែងទោសពីព្រះមហាក្សត្រកម្ពុជាកាលពីឆ្នាំ២០១៣ និងបានវិលមកចូលរួមការបោះឆ្នោត តាមការស្នើសុំឲ្យលើកលែងទោសពីលោកនាយករដ្ឋមន្ត្រី ហ៊ុន សែន។
ដោយឡែក លោក សុខ ឥសាន អ្នកនាំពាក្យគណបក្សប្រជាជនលើកឡើងថា គ្មានការសម្របសម្រួលអ្វីដើម្បីឲ្យលោក សម រង្ស៊ី វិលចូលស្រុកនោះទេ។ លោកបន្ថែមថា គណបក្សប្រជាជនកម្ពុជាក៏គ្មានតួនាទីអ្វីក្នុងការសម្របសម្រួលជំនួសប្រព័ន្ធតុលាការដែរ។ តែយ៉ាងណាមិញលោក សុខ ឥសាន ចាត់ទុកបំណងវិលចូលស្រុករបស់លោក សម រង្ស៊ី ជាបំណងស្ទាបស្ទង់សភាពការណ៍។
គួររំលឹកជូនថា លោក សម រង្ស៊ី ធ្លាប់បានផ្ញើលិខិត រំលែកទុក្ខមួយច្បាប់ទៅកាន់លោកនាយករដ្ឋមន្ត្រី ហ៊ុន សែន ចំពោះមរណភាពរបស់លោកព្រឹទ្ធាចារ្យ ហ៊ុន នាង ដែលជាឪពុករបស់លោកនាយករដ្ឋមន្ត្រី ហ៊ុន សែន។
ដូចគ្នាអញ្ចឹងដែរ លោកនាយករដ្ឋមន្ត្រី ហ៊ុន សែន ក៏បានផ្ញើសាររំលែកទុក្ខមួយទៅកាន់លោកស្រី ជូឡុង ស៊ូមូរ៉ា ភរិយារបស់លោក សម រង្ស៊ី ចំពោះមរណភាពរបស់ម្តាយបង្កើតរបស់លោកស្រី និងជាម្តាយក្មេករបស់លោក សម រង្ស៊ីផង។ លោកនាយករដ្ឋមន្ត្រី ថែមទាំងបានទូរសព្ទទៅកាន់ភរិយាលោក សម រង្ស៊ី ដោយផ្ទាល់ដើម្បីចូលរួមរំលែកទុក្ខ និងបានចាត់តាំងកូនប្រុសរបស់លោក គឺលោក ហ៊ុន ម៉ានីទៅគោរពវិញ្ញាណក្ខន្ធសពដោយផ្ទាល់ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ