លោក សម រង្ស៊ី ចង់វិលចូលស្រុក ដើម្បីគោរពសពម្តាយក្មេកជាលើកចុងក្រោយ
មន្ត្រីគណបក្សប្រឆាំងបានអះអាងថា លោក សម រង្ស៊ី ប្រធានគណបក្សប្រឆាំងដែលកំពុងរស់នៅដោយនិរទេសខ្លួន ដើម្បីគេចពីការជាប់ពន្ធនាគារនៅក្នុងប្រទេសកម្ពុជា មានបំណងចង់វិលត្រឡប់មកកាន់ប្រទេសកម្ពុជាវិញ ដើម្បីគោរពសពម្តាយក្មេកជាលើកចុងក្រោយ។ ប្រភពពីមន្ត្រីគណបក្សប្រឆាំងបានបញ្ជាក់ថា នៅក្នុងកិច្ចខិតខំប្រឹងប្រែងនេះ លោក សម រង្ស៊ី ទើបតែបានសរសេរលិខិតមួយច្បាប់ ផ្ញើទៅកាន់លោកនាយករដ្ឋមន្ត្រី ហ៊ុន សែន ស្របពេលដែលលោកនាយករដ្ឋមន្ត្រី ក៏បានផ្ញើសាររំលែកទុក្ខ ចំពោះមរណភាពរបស់ឧបាសិការ ញឹក ជូឡុង-មាសកេត សមភ័ក្រ ដែលត្រូវជាម្តាយក្មេករបស់លោកសម រង្ស៊ីផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៣
លោក អេង ឆៃអ៊ាង មន្ត្រីជាន់ខ្ពស់គណបក្សសង្គ្រោះជាតិបានបង្ហើបប្រាប់ថា នៅក្នុងកិច្ច ខិតខំប្រឹងប្រែងនេះ លោក សម រង្ស៊ី ប្រធានគណបក្សប្រឆាំង បានសរសេរលិខិតមួយ ផ្ញើទៅកាន់លោកនាយករដ្ឋមន្ត្រី ហ៊ុន សែន នៅព្រឹកថ្ងៃទី២៥វិច្ឆិកានេះ។ បើទោះបីជាលោកអេង ឆៃអ៊ាង មិនទាន់អាចបញ្ជាក់បានថា តើនៅក្នុងលិខិតនោះមានខ្លឹមសារយ៉ាងណាក្តី ប៉ុន្តែជាគោលដៅ គឺលោក សម រង្ស៊ី ចង់វិលត្រលប់មកកាន់ប្រទេសកម្ពុជាវិញ ដើម្បីចូលរួមគោរពវិញ្ញាណក្ខន្ធសពម្តាយក្មេករបស់លោកជាលើកចុងក្រោយ និងបានវិលមកចាត់ចែងពិធីបុណ្យសពនេះផង។
លោក សម រង្ស៊ី មិនទាន់អាចទាក់ទងបានឡើយ ដើម្បីបញ្ជាក់ពីខ្លឹមសារនៃលិខិតដែលលោកបានសរសេរផ្ញើទៅកាន់លោកនាយករដ្ឋមន្ត្រី ហ៊ុន សែន នៅថ្ងៃនេះ។ ប៉ុន្តែនៅលើទំព័រហ្វេសបុករបស់លោកបានសរសេរថា “លោក និងភរិយា ព្រមទាំងក្រុមគ្រួសារទាំងមូល កំពុងមានទុក្ខជាទម្ងន់ដោយលោកជំទាវ ញឹក ជូឡុង-មាសកេត សមភ័ក្រ ដែលជាមាតា-មាតាក្មេក បានទទួលមរណភាព កាលពីវេលាម៉ោង ២ រសៀល ថ្ងៃទី ២៤ ខែវិច្ឆិកាម្សិលមិញនេះ។
គួររំលឹកជូនថា លោក សម រង្ស៊ី ធ្លាប់បានទទួលការលើកលែងទោសពីព្រះមហាក្សត្រកម្ពុជាកាលពីឆ្នាំ២០១៣ និងបានវិលមកចូលរួមការបោះឆ្នោត តាមការស្នើសុំឲ្យលើកលែងទោសពីលោកនាយករដ្ឋមន្ត្រី ហ៊ុន សែន។ កាលណោះ លោក សម រង្ស៊ី បានផ្ញើលិខិត រំលែកទុក្ខមួយច្បាប់ទៅកាន់លោកនាយករដ្ឋមន្ត្រី ហ៊ុន សែន ចំពោះមរណភាពរបស់លោកព្រឹទ្ធាចារ្យ ហ៊ុន នាង ដែលជាឪពុករបស់លោកនាយករដ្ឋមន្ត្រី ហ៊ុន សែន។
ដូចគ្នាអញ្ចឹងដែរ លោកនាយករដ្ឋមន្ត្រី ហ៊ុន សែន កាលពីយប់មិញនេះ ក៏បានផ្ញើសាររំលែកទុក្ខមួយទៅកាន់លោកស្រី ជូឡុង ស៊ូមូរ៉ា ភរិយារបស់លោក សម រង្ស៊ី ចំពោះមរណភាពរបស់ម្តាយបង្កើតរបស់លោកស្រី និងជាម្តាយក្មេករបស់លោក សម រង្ស៊ីផង។ នៅក្នុងខ្លឹមសារនៃលិខិតដែលលោកនាយករដ្ឋមន្ត្រី ហ៊ុន សែន បានចុះហត្ថលេខាទាំងយប់នេះ លោកនាយករដ្ឋមន្ត្រី រួមទាំងភរិយា បានចូលរួមរំលែកទុក្ខចំពោះមរណភាពនេះ នៅក្នុងកាយវិការជាខ្មែរដូចគ្នា។ បន្ថែមលើនេះ លោកនាយករដ្ឋមន្ត្រី ថែមទាំងបានទូរសព្ទទៅកាន់ភរិយាលោក សម រង្ស៊ី ដោយផ្ទាល់ប្រមាណជា៥នាទី ដើម្បីចូលរួមរំលែកទុក្ខនេះ និងថែមទាំងបានចាត់តាំងបេសកជនពិសេស ដែលជាកូនប្រុសរបស់លោក គឺលោក ហ៊ុន ម៉ានីទៅគោរពវិញ្ញាណក្ខន្ធសពដោយផ្ទាល់ថែមទៀត។
សម្រាប់លោក អេង ឆៃអ៊ាង នេះគឺជាសញ្ញាណវិជ្ជមានមួយដែលឈានទៅរកការបញ្ចប់ភាពតានតឹងនយោបាយនៅកម្ពុជា ហើយបើមានការបើកភ្លើងខៀវពីលោកនាយករដ្ឋមន្ត្រី ហ៊ុន សែន មែន នោះលោក សម រង្ស៊ី អាចនឹងវិលមកកាន់ប្រទេសកម្ពុជាវិញក្នុងកាលៈទេសៈនេះ។ ប៉ុន្តែលោក សុខ ឥសាន អ្នកនាំពាក្យគណបក្សប្រជាជនកម្ពុជា បានលើកឡើងថា ការចូលរួមរំលែកទុក្ខនេះ គឺធ្វើឡើងក្នុងនាមប្រជាជាតិខ្មែរតែប៉ុណ្ណោះ។ ចំណែក លោក អ៊ូ វីរៈ ប្រធានវេទិការអនាគត នឹងជាអ្នកវិភាគនយោបាយនៅកម្ពុជា ក៏យល់ស្របដូចគ្នានេះដែរ។ ប៉ុន្តែលោកបានចាត់ទុកកាយវិការរបស់ប្រធានគណបក្សប្រជាជនកម្ពុជាលោក ហ៊ុន សែន នេះថា គឺបង្ហាញពីភាពចាស់ទុំនៃអ្នកនយោបាយខ្មែរ។
សូមបញ្ជាក់ថា ឧបាសិកា ញឹក ជូឡុង-មាសកេត សមភ័ក្រ ជាម្តាយបង្កើតរបស់លោកស្រី ជូឡុង សូមូរ៉ា និងត្រូវជាម្តាយក្មេកលោក សម រង្ស៊ី បានទទួលមរណភាព ដោយជរាពាធក្នុងជន្មាយុ ៩៧ឆ្នាំ នៅរាជធានីភ្នំពេញ កាលពីរសៀលថ្ងៃទី ២៤ ខែវិច្ឆិកា ម្សិលមិញនេះ។ សពរបស់គាត់ កំពុងត្រូវបានតម្កល់ធ្វើបុណ្យតាមប្រពៃណីព្រះពុទ្ធសាសនា នៅគេហដ្ឋានលោក សម រង្ស៊ី ដែលស្ថិតនៅសង្កាត់ចាក់អង្រែលើ រាជធានី ភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ