សង្គមស៊ីវិល៖ ការហាមជេរប្រមាថអ្នកនយោបាយជាការរំលោភសេរីភាពបញ្ចេញមតិ
អង្គការមិនមែនរដ្ឋាភិបាលខ្លះថ្លែងរួមគ្នាថា ការប៉ុនប៉ងហាមមន្ត្រីសង្គមស៊ីវិលមិនឱ្យសម្ភាសជាមួយប្រព័ន្ធផ្សព្វផ្សាយ ឬមិនឱ្យថ្លែងការណ៍ផ្សេងៗ អំឡុងពេលបោះឆ្នោត គឺស្មើនឹងការរំលោភសេរីភាពបញ្ចេញមតិ។ ការលើកឡើងដូច្នេះកើតឡើងម្សិលមិញ បន្ទាប់ពីអង្គការសិទ្ធិមនុស្សឮថាគណបក្សប្រជាជនកម្ពុជា និងគណបក្សសង្គ្រោះជាតិ គ្រោងបង្កើតវិធានការប្រឆាំងទង្វើដែលអាចជា«ការជេរប្រមាថ»ចំពោះគណបក្សនយោបាយ។
ចុះផ្សាយនៅថ្ងៃ៖
ស្តាប់ - ០២:២៨
គណបក្សប្រជាជនកម្ពុជា និងគណបក្សសង្គ្រោះជាតិ បាននិយាយអំពី«វិធានការថ្មីដែលហាមឃាត់បុគ្គលិកអង្គការសង្គមស៊ីវិលក្នុងការផ្តល់បទសម្ភាសន៍ជាមួយប្រព័ន្ធផ្សព្វផ្សាយ ឬថ្លែងការណ៍ផ្សេងៗ ដែលអាច«ជេរប្រមាថ»ដល់គណបក្សនយោបាយ ក្នុងអំឡុងពេលបោះឆ្នោត»។ នេះបើយោងតាមសេចក្តីថ្លែងការណ៍រួមរបស់អង្គការមិនមែនរដ្ឋាភិបាលមួយក្រុម កាលពីថ្ងៃពុធ ទី៤ ខែកុម្ភៈ ឆ្នាំ២០១៥។
សម្ព័ន្ធខ្មែរជំរឿន និងការពារសិទ្ធិមនុស្សលីកាដូ មជ្ឈមណ្ឌលសិទ្ធិមនុស្សកម្ពុជា សមាគមអាដហុក ការពារសិទ្ធិមនុស្ស និងអភិវឌ្ឍន៍នៅកម្ពុជា មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ និងអង្គការមិនមែនរដ្ឋាភិបាល៥ទៀត អះអាងថា៖«ការរឹតបន្តឹងបែបនេះស្មើនឹងការរំលោភបំពានសេរីភាពខាងការបញ្ចេញមតិ»។
បើតាមបណ្ដុំអង្គការមិនមែនរដ្ឋាភិបាលទាំង៩នោះ ពេលចរចាគ្នាដើម្បីកែទម្រង់ច្បាប់បោះឆ្នោតកន្លងទៅ លោក ប៊ិន ឈិន ប្រធានក្រុមខាងគណបក្សប្រជាជនកម្ពុជា និងលោក គួយ ប៊ុនរឿន ខាងគណបក្សសង្គ្រោះជាតិ បានលើកឡើងថា៖«វិធានការបែបនេះនឹងត្រូវយកមកពិចារណាដើម្បីធានានូវឯករាជ្យភាពរបស់អង្គការមិនមែនរដ្ឋាភិបាល»។
អង្គការសង្គមស៊ីវិលខាងលើ ដែល«ព្រួយបារម្ភយ៉ាងខ្លាំង»នោះ បញ្ជាក់ថា៖ «បទបញ្ញត្តិដែលមានពាក្យមិនច្បាស់លាស់ ដាក់ទោសទណ្ឌចំពោះការ«ជេរប្រមាថ»ទៅលើគណបក្សនយោបាយ ឬបេក្ខជនគណបក្សនយោបាយ អាចទុកចន្លោះជាច្រើនសម្រាប់ឱ្យអាជ្ញាធរបកស្រាយយ៉ាងទូលាយ ដើម្បីបង្ក្រាបដោយស្របច្បាប់ទៅលើសំឡេងប្រឆាំង»។
ដោយផ្អែកតាមរដ្ឋធម្មនុញ្ញកម្ពុជា និងកតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយ ដែលកម្ពុជាជាបានអនុម័តអនុវត្តតាម អង្គការការពារសិទ្ធិមនុស្សទាំងនោះអះអាងថា៖ «សេរីភាពស្រាវជ្រាវព័ត៌មាន ទទួល និងផ្សព្វផ្សាយព័ត៌មាន»ជា«សេរីភាពនៃការបញ្ចេញមតិ»ហើយថា៖ «បុគ្គលសាធារណៈទាំងអស់ រួមទាំងអ្នកដែលមានអំណាចខាងនយោបាយខ្ពស់បំផុត ដូចជាប្រមុខរដ្ឋ និងប្រមុខរដ្ឋាភិបាល គឺជាកម្មវត្ថុសម្រាប់ការរិះគន់ និងប្រឆាំងផ្នែកនយោបាយដោយស្របច្បាប់»។
យើងខ្ញុំបានទាក់ទងតាមទូរស័ព្ទទៅលោក ប៊ិន ឈិន និងលោក គួយ ប៊ុនរឿន ដែរ ប៉ុន្តែមិនបានសម្រេច។ ប៉ុន្តែ លោក អេង ឆៃអ៊ាង សមាជិកក្រុមចរចាខាងគណបក្សសង្គ្រោះជាតិបានថ្លែងប្រាប់ថា៖ «វិធានការនោះគឺសំដៅធ្វើឱ្យអង្គការមិនមែនរដ្ឋាភិបាលធ្វើការដោយអព្យាក្រឹត មិនលម្អៀង ប៉ុន្តែមិន ហាមឃាត់មន្ត្រីសង្គមស៊ីវិលមិនឱ្យបញ្ចេញយោបល់ទេ»។ អ្នកតំណាងរាស្ត្ររូបនេះជឿថា៖ «បើតុលាការឯករាជ្យ និងយុត្តិធម៌ វាមិនមានបញ្ហាក្នុងការបកស្រាយអត្ថន័យនៃការជេរប្រមាថឡើយ»។
លោក អេង ឆៃអៀង បញ្ជាក់ថាបទល្មើសដែលមានចែងក្នុង«ច្បាប់ព្រហ្មទណ្ឌ»គឺជាមូលដ្ឋាននៃការដាក់ទោសចំពោះជេរប្រមាថចំពោះគណបក្សនយោបាយ ឬអ្នកនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ