សេវាសាធារណៈជាគន្លឹះសម្រាប់បំពេញចិត្តម្ចាស់ឆ្នោត!
ចុះផ្សាយនៅថ្ងៃ៖
ស្តាប់ - ០៥:០៣
ការបម្រើសេវាសាធារណៈគឺជាបញ្ហាអាទិភាពមួយក្នុងចំណោមបញ្ហាជាច្រើនដែលរដ្ឋាភិបាលគណបក្សកាន់អំណាចត្រូវដោះស្រាយជាបន្ទាន់មុនគេដើម្បីស្តារប្រជាប្រិយភាពរបស់ខ្លួន។ មានកំណែទម្រង់ជាច្រើនត្រូវបានដាក់ចេញ។ ជាក់ស្តែង ការបញ្ចុះតម្លៃអគ្គិសនីដល់អ្នកជួលផ្ទះជាកិច្ចខិតខំប្រឹងប្រែងដ៏ល្អមួយរបស់អាជ្ញាធររដ្ឋាភិបាល។ ប៉ុន្តែ នៅមានបញ្ហាច្រើនទៀតដែលត្រូវគិតគូរដោះស្រាយជាបន្ទាន់។ និយាយជារួម ការទទួលបានសេវាងាយស្រួលនិងលឿនរហ័សដោយមិនចាំបាច់បង់ប្រាក់ក្រៅផ្លូវការ គឺជាក្តីប្រាថ្នារបស់ម្ចាស់ឆ្នោតគ្រប់គ្នា។
ចុងក្រោយនេះ រដ្ឋាភិបាលបានតម្រូវឲ្យអាជ្ញាធរអគ្គិសនីតភ្លើងដែលមានតម្លៃថោកឲ្យអ្នកជួលផ្ទះប្រើប្រាស់។ នេះជាកិច្ចខិតខំប្រឹងប្រែងថ្មីមួយទៀតក្នុងការដោះស្រាយបញ្ហាជូនពលរដ្ឋក្រីក្រ។ ទោះជាកិច្ចការនេះមើលទៅហាក់ដូចជាតូចតាចក៏ដោយ ក៏វាបានធ្វើឲ្យមនុស្សមិនតិចទេជាពិសេសកម្មករកាត់ដេរតែម្តងសប្បាយចិត្តចំពោះចំណាត់ការរបស់អាជ្ញាធររដ្ឋាភិបាល។ ប៉ុន្តែ ភាពស្មុគស្មាញនៃនីតិវិធីអាចធ្វើឲ្យកិច្ចខិតខំនេះមិនទទួលបានលទ្ធផលល្អក៏ថាបាន។
ជាការពិតណាស់ វាពិតជាមិនមែនជារឿងចៃដន្យទេដែលគណបក្សកាន់អំណាចរបូតអស់ ២២ កៅអីពីក្នុងរដ្ឋសភា។ នរណាក៏ដឹងដែរថាមូលហេតុចម្បងជាងគេគឺមកពីការមិនសប្បាយចិត្តរបស់ប្រជាពលរដ្ឋចំពោះអាជ្ញាធរសាធារណៈ។ ការចំណាយពេលយូរ ការកេះកៀវរកលុយកាក់ និងរបៀបធ្វើការងារបែបការិយាធិបតេយ្យ បានធ្វើឲ្យពលរដ្ឋធុញទ្រាន់និងឆ្អែតឆ្អន់។ ដើម្បីទទួលបានឯកសារផ្លូវការមួយ ប្រជាពលរដ្ឋត្រូវចំណាយប្រាក់និងពេលវេលាយ៉ាងច្រើនរហូតដល់ម្នាក់ៗចង់តែចៀសវាងតែចៀសមិនផុត។
គ្រាន់តែបញ្ហាអត្តសញ្ញាណប័ណ្ណដែលក្រសួងមហាផ្ទៃប្រកាសផ្តល់ឲ្យពលរដ្ឋដោយឥតបង់ថ្លៃជាយូរមកហើយនោះនៅតែជាប្រធានបទដែលធ្វើឲ្យពលរដ្ឋគ្រប់គ្នារអ៊ូរទាំមិនដាច់ពីមាត់នៅឡើយ។ ដើម្បីទទួលបានអត្តសញ្ញាណប័ណ្ណ១សន្លឹក ពួកគេត្រូវចំណាយប្រាក់ដោយចៀសមិនផុតក្រោមរូបភាពផ្សេងៗគ្នា។ ក្រៅពីនោះ ពួកគេត្រូវរង់ចាំ ខាតការងារពេញមួយថ្ងៃឬច្រើនថ្ងៃក៏មាន។
ការបង់លុយកាក់បន្តិចបន្តួចតាមច្បាប់កំណត់ទំនងជាមិនមែនបញ្ហាទេសម្រាប់ប្រជាពលរដ្ឋខ្មែរទូទៅ ប៉ុន្តែ អ្វីដែលអាក្រក់បំផុតនោះគឺភាពស្មុគស្មាញនិងការចំណាយពេលវេលាច្រើនក្នុងការទទួលបានឯកសារឯណោះទេ។ តើបញ្ហានេះពិតជាមិនអាចដោះស្រាយបានមែនឬ? សម្រាប់គណបក្សកាន់អំណាច លុយកាក់ដូចជាមិនខ្វះទេ រីឯធនធានមនុស្សក៏មិនខ្វះដែរ។ ប៉ុន្តែ អ្វីដែលនៅខ្វះខ្លាំងបំផុតនោះគឺការប្តេជ្ញាចិត្តក្នុងការដោះស្រាយបញ្ហានេះឯង។
ពិតហើយថា ថ្នាក់លើចង់ធ្វើឲ្យបានល្អដែរ ប៉ុន្តែ គោលនយោបាយដែលដាក់ចេញមិនអាចសម្រេចគោលដៅបានដោយងាយៗទេ។ មិនងាយដោយសារតែម្យ៉ាងមានតែផែនការរីឯថវិកា មិនគ្រប់គ្រាន់ឬយឺតយ៉ាវ។ ជួនកាលទម្រាំតែថវិកាធ្លាក់ដល់ថ្នាក់ក្រោម វាបានជ្រុះតាមផ្លូវអស់មួយចំណែកទៅហើយ។ បញ្ហានេះហើយដែលធ្វើឲ្យមន្ត្រីអ្នកអនុវត្តផ្ទាល់មិនសូវមានទឹកចិត្តនិងមិនសូវទទួលខុសត្រូវចំពោះការងារ។ និយាយតាមបែបផ្សេង លុយសម្បូរតែនៅក្នុងហោប៉ៅបុគ្គលឯកជន ប៉ុន្តែ មិនសូវសម្បូរក្នុងកញ្ចប់ថវិការដ្ឋទេ។ អ៊ីចឹងហើយបានជាខ្ទង់ចំណាយរបស់រដ្ឋមិនអាចអនុញ្ញាតឲ្យមន្ត្រីរាជការសាធារណៈបំពេញការងារដដោយពេញលេញឡើយ។
ម្យ៉ាងទៀត មន្ត្រីសាធារណៈជាច្រើនមានទម្លាប់ស្វែងរកលាភសក្ការៈពីការងាររបស់ខ្លួន។ គឺជាទម្លាប់ដែលមិនទាន់មានការកែប្រែនៅឡើយរហូតមកដល់បច្ចុប្បន្ន។ បន្ថែមពីលើនេះ កង្វះយន្តការត្រួតពិនិត្យការងារគឺជាមូលហេតុមួយទៀតដែលធ្វើឲ្យរដ្ឋបាលសាធារណៈគ្មានប្រសិទ្ធភាពនិងបើកផ្លូវឲ្យមន្ត្រីរាជការទារប្រាក់ពីពលរដ្ឋអ្នកប្រើសេវាកម្មរបស់ពួកគេ។ លោកនាយករដ្ឋមន្ត្រី ហ៊ុន សែន ធ្លាប់សុំឲ្យមន្ត្រីអាជ្ញាធរមូលដ្ឋានធ្វើឯកសារជូនពលរដ្ឋដោយឥតបង់ថ្លៃ ហើយយកទៅប្រគល់ដល់ផ្ទះពួកគេទៀតផង។ ប៉ុន្តែ រហូតមកដល់ពេលនេះ តើអ្នកណាខ្លះទទួលបានសេវាកម្មល្អដែលលោកនាយករដ្ឋមន្ត្រីចង់បាន?
តាមពិត រដ្ឋាភិបាលពិតជាបានយកចិត្តទុកដាក់ចំពោះបញ្ហានេះ។ ការដាក់ឲ្យដំណើរការសាកល្បងច្រកចេញចូលតែមួយក្នុងបណ្តាខេត្តមួយចំនួនគឺជាឧទាហរណ៍ស្រាប់។ ប៉ុន្តែ តើពេលណាទើបពលរដ្ឋខ្មែរទូទាំងប្រទេសបានទទួលសេវាកម្មដោយស្រួលតាមក្តីប្រាថ្នា ខណៈដែលការបោះឆ្នោតមិនរង់ចាំលទ្ធផលដ៏យឺតយ៉ាវនេះបានទេ។
ដូច្នេះ ដំណោះស្រាយបញ្ហាស្មុគស្មាញក្នុងសេវាកម្មសាធារណៈគឺជាគន្លឹះសំខាន់បំផុតមួយដើម្បីបំពេញចិត្តម្ចាស់ឆ្នោត។ រដ្ឋាភិបាលគណបក្សប្រជាជនកម្ពុជាពិតជាមិនអាចមើលរំលងបានឡើយ។ មិនត្រឹមតែមិនអាចមើលរំលងបានប៉ុណ្ណោះទេ តែត្រូវមានវិធានការចាំបាច់ដើម្បីដោះស្រាយបញ្ហានេះជាបន្ទាន់ផងដែរ។
ការលើកចេញឧបសគ្គទាំងឡាយដូចបានលើកឡើងខាងដើមគឺជាការគ្រប់គ្រាន់។ ផ្ទុយទៅវិញ ប្រសិនបើបញ្ហាគន្លឹះតូចតាចនេះមិនអាចដោះស្រាយបានទេ គេមិនចាំបាច់និយាយដល់គោលនយោបាយជាតិផ្សេងទៀតនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ