ក្រុមប្រឹក្សាសន្តិសុខអង្គការសហប្រជាជាតិ បើកកិច្ចប្រជុំនៅសប្ដាហ៍ក្រោយ អំពីការរំលោភសិទ្ធិមនុស្សនៅកូរ៉េខាងជើង
ក្រុមប្រឹក្សាសន្តិសុខអង្គការសហប្រជាជាតិ នឹងជួបប្រជុំនៅសប្ដាហ៍ក្រោយនេះ ដើម្បីពិភាក្សាអំពីការរំលោភសិទ្ធិមនុស្សនៅកូរ៉េខាងជើង។ កិច្ចប្រជុំនេះ ត្រូវបានរៀបចំឡើងចំពេលដែលមានការអំពាវនាវឲ្យក្រុមប្រឹក្សាសន្តិសុខ ដាក់ពាក្យបណ្ដឹង ប្ដឹងកូរ៉េខាងជើង ទៅតុលាការព្រហ្មទណ្ឌអន្ដរជាតិ ពីបទឧក្រិដ្ឋកម្មប្រឆាំងនឹងមនុស្សជាតិ។
ចុះផ្សាយនៅថ្ងៃ៖
ស្តាប់ - ០១:៥០
នៅក្នុងកិច្ចប្រជុំនៅសប្ដាហ៍ក្រោយ សមាជិកទាំង១៥នៃក្រុមប្រឹក្សាសន្តិសុខ នឹងបានស្ដាប់មន្ដ្រីសិទ្ធិមនុស្សនៃអង្គការសហប្រជាជាតិ ដែលនឹងជម្រាបជូនពីស្ថានភាពសិទ្ធិមនុស្សនៅកូរ៉េខាងជើង។ នេះបើតាមការបញ្ជាក់ពីអ្នកនាំពាក្យពីប្រទេសឆាដដែលកំពុងតែកាន់តំណែងជាប្រធានផ្លាស់វេននៃក្រុមប្រឹក្សាសន្តិសុខអង្គការសហប្រជាជាតិសម្រាប់ខែធ្នូឆ្នាំ២០១៤នេះ។
អ្នកនាំពាក្យរូបនេះគូសបញ្ជាក់ទៀតថា កិច្ចប្រជុំពិភាក្សានឹងត្រូវធ្វើឡើងនៅថ្ងៃទី២២ ឬថ្ងៃទី២៣ខែធ្នូខាងមុខនេះ។ លោកថា កាលបរិច្ឆេទដ៏ច្បាស់លាស់មួយនឹងត្រូវកំណត់ បន្ទាប់ពីបានទទួលការបញ្ជាក់ពីវត្តមានរបស់មន្ដ្រីសិទ្ធិមនុស្សនៃអង្គការសហប្រជាជាតិ។
សូមជម្រាបថា កិច្ចប្រជុំស្ដីពីការរំលោភសិទ្ធិមនុស្សនៅកូរ៉េខាងជើងនេះ ធ្វើឡើងក្រោយពីមានសំណើពីសមាជិក១០ប្រទេសនៅក្នុងចំណោមសមាជិកទាំង១៥ប្រទេសនៃក្រុមប្រឹក្សាសន្តិសុខ។ ប្រទេសទាំង១០ ដែលមានដូចជាអូស្ដ្រាលី បារាំង អាមេរិក អង់គ្លេស លុចសំបួរ រវ៉ាន់ដា ហ្ស៊កដានី លីទុយអានី និងកូរ៉េខាងត្បូង បានសម្ដែងក្ដីព្រួយបារម្ភយ៉ាងខ្លាំង ចំពោះស្ថានការណ៍រំលោភសិទ្ធិមនុស្សនៅកូរ៉េខាងជើង។ និងថា ការរំលោភសិទ្ធិមនុស្សរបស់របបក្រុងព្យុងយ៉ាង នឹងបង្កឲ្យមានអស្ថិរភាពនៅក្នុងតំបន់ ព្រមទាំងសន្តិភាព និងសន្តិសុខអន្ដរជាតិ។
របាយការណ៍ចេញផ្សាយនៅខែកុម្ភៈឆ្នាំ២០១៤ របស់គណៈកម្មការស៊ើបអង្កេតអង្គការសហប្រជាជាតិឲ្យដឹងថា ការរំលោភសិទ្ធិមនុស្សនៅកូរ៉េខាងជើងមានដូចជា ការធ្វើទារុណកម្ម ការបង្អត់អាហារ ការសម្លាប់ផ្ដាច់ពូជ ទាសភាព និងការធ្វើទុក្ខបុកម្នេញក្រោមហេតុផលនយោបាយ សាសនា ឬជាតិសាសន៍ជាដើម។ គណៈកម្មការសិទ្ធិមនុស្សរបស់អង្គការសហប្រជាជាតិ កាលពីខែវិច្ឆិកាកន្លងទៅ បានអនុម័តសេចក្តីសម្រេចចិត្តមួយ ដោយបានស្នើក្រុមប្រឹក្សាសន្តិសុខឲ្យបញ្ជូនរឿងរំលោភសិទ្ធិមនុស្សនៅកូរ៉េខាងជើង ទៅកាន់តុលាការព្រហ្មទណ្ឌ អន្តរជាតិថែមទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ