អង្គការសហប្រជាជាតិជំរុញឲ្យមានការស៊ើបអង្កេតលើករណីវាយប្រហារតំណាងរាស្ត្រគណបក្សប្រឆាំង
អង្គការសហប្រជាជាតិ កាលពីថ្ងៃសុក្រម្សិលមិញ បានសម្ដែងនូវការព្រួយបារម្ភយ៉ាងខ្លាំងលើករណីវាយប្រហារតំណាងរាស្ត្រគណបក្សប្រឆាំងនៅកម្ពុជា បណ្ដាលឲ្យរងរបួសជាទំងន់។ ស្ថាប័នកំពូលអន្ដរជាតិនេះ ក៏បានជំរុញឲ្យមានការស៊ើបអង្កេតឯករាជ្យ និងហ្មត់ចត់ ទៅលើករណីនេះផងដែរ។ សូមជម្រាបថា ការលើកឡើងរបស់អង្គការសហប្រជាជាតិដូច្នេះ ធ្វើឡើងស្របពេលដែលគណៈកម្មការពិសេសរបស់ក្រសួងមហាផ្ទៃ បដិសេធមិនផ្ដល់ព័ត៌មានលម្អិតឡើយ ដោយអះអាងថា ករណីនេះកំពុងស្ថិតនៅ ក្នុងការស៊ើបអង្កេតនៅឡើយ។
ចុះផ្សាយនៅថ្ងៃ៖
ស្តាប់ - ០២:០៨
«យើងព្រួយបារម្ភអំពីបរិយាកាសកាន់តែអាក្រក់សម្រាប់អ្នកនយោបាយប្រឆាំងនិងសកម្មជននៅកម្ពុជា»។ នេះជាអ្វីដែលលោកស្រី Ravina Shamdasani អ្នកនាំពាក្យឧត្តមស្នងការសិទ្ធិមនុស្សនៃអង្គការសហប្រជាជាតិ ថ្លែងប្រាប់អ្នកកាសែតនៅទីក្រុងហ្សឺណែវកាលពីថ្ងៃសុក្រ។ ជាប្រតិកម្មដែលធ្វើឡើងបន្ទាប់ពីតំណាងរាស្ត្រមកពីគណបក្សប្រឆាំងនៅកម្ពុជាចំនួនពីររូប ត្រូវជនមិនស្គាល់មុខវាយប្រហារឲ្យរងរបួសជាទម្ងន់ កាលពីថ្ងៃចន្ទដើមសប្ដាហ៍។
អ្នកនាំពាក្យឧត្តមស្នងការសិទ្ធិមនុស្សនៃអង្គការសហប្រជាជាតិរូបនេះ ក៏បានជំរុញឲ្យមានការស៊ើបអង្កេតឯករាជ្យ និងហ្មត់ចត់ ទៅលើករណីនេះផងដែរ។ លោកស្រី Ravina Shamdasani សង្កត់ធ្ងន់ថា អ្នកទទួលខុសត្រូវចំពោះអំពើហិង្សានេះ ដាច់ខាតត្រូវតែនាំយកទៅផ្តន្ទាទោសតាមច្បាប់ជាធរមាន។
គួររំលឹកជូនថា មួយថ្ងៃបន្ទាប់ពីការវាយប្រហារលើតំណាងរាស្ត្រគណបក្សប្រឆាំងទាំងពីររូប គណៈកម្មការពិសេសមួយត្រូវបានបង្កើតឡើង ដើម្បីធ្វើការស៊ើបអង្កេត ឈានទៅដល់ការចាប់ខ្លួននិងផ្ដន្ទាទោសក្រុមជនដៃដល់។ លោក ឯម សំអាន រដ្ឋលេខាធិការក្រសួងមហាផ្ទៃ និងជាប្រធានគណៈកម្មការស្រាវជ្រាវស៊ើបអង្កេតករណីវាយអ្នកតំណាងរាស្ត្រនេះ បានបញ្ជាក់ថា អាជ្ញាធរកំពុងធ្វើការស្រាវជ្រាវដើម្បីកំណត់មុខអត្តសញ្ញាណរបស់ជនដៃដល់ហើយ។ យ៉ាងណាក៏ដោយ ប្រធានគណៈកម្មការពិសេសនេះ បដិសេធមិនផ្ដល់ព័ត៌មានលម្អិតទេ ដោយអះអាងថា ករណីនេះកំពុងស្ថិតនៅក្នុងការស៊ើបអង្កេតនៅឡើយ។
ករណីវាយអ្នកតំណាងរាស្ត្របក្សប្រឆាំង លោក ញ៉យ ចំរើន និងលោក គង់ សភា កាលពីថ្ងៃទី២៦តុលា នៅក្នុងបាតុកម្មទាមទារដកលោក កឹម សុខា ចេញពីតំណែងអនុប្រធានរដ្ឋសភា បានទទួលការចាប់អារម្មណ៍យ៉ាងខ្លាំងពីសហគមន៍អន្ដរជាតិ។ អង្គការឃ្លាំមើលសិទ្ធិមនុស្សអន្ដរជាតិ Human Rights Watch លើកឡើងនៅថ្ងៃសៅរ៍នេះថា ការវាយប្រហារលើតំណាងរាស្ត្រគណបក្សប្រឆាំងនេះ ជាការគម្រាមកំហែងយ៉ាងខ្លាំងចំពោះលំហប្រជាធិបតេយ្យនៅកម្ពុជា ដែលកំពុងមានទំហំតូចស្រាប់។ អង្គការអន្ដរជាតិនេះ បានទាមទារឲ្យមានការស៊ើបអង្កេតឯករាជ្យពីអង្គការសហប្រជាជាតិ និងប្ដេជ្ញាចាត់វិធានការម៉ឺងម៉ាត់ចំពោះលទ្ធផលនៃការស៊ើបអង្កេតនោះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ