ព្រះសង្ឃ១អង្គ និងប្រធានអង្គការសង្គមស៊ីវិល២រូបទៀត ត្រូវចោទពីបទរំលោភទំនុកចិត្ត បន្ទាប់ពីមរណភាពលោកកែម ឡី
ព្រះតេជគុណប៊ុត ប៊ុនតិញលោកប៉ា ងួនទៀង និងលោកមឿន តុលា ត្រូវស្ថាប័នអយ្យការនៃសាលាដំបូងរាជធានីភ្នំពេញធ្វើការចោទប្រកាន់ពីបទ រំលោភទំនុកចិត្ត តាមមាត្រា៣៩១ និង៣៩២ នៃក្រមព្រហ្មទណ្ឌ។ ការចោទប្រកាន់នេះ ធ្វើឡើងបន្ទាប់ពីអតីតសមាជិកគណៈកម្មការបុណ្យសព លោកបណ្ឌិតកែម ឡី ទាំង៣រូបនេះ រងនូវពាក្យបណ្តឹងរបស់ប្រធានគណបក្សយុវជនកម្ពុជា ពាក់ព័ន្ធនឹងតម្លាភាពនៃការគ្រប់គ្រងថវិកាបុណ្យសពលោកកែម ឡី។
ចុះផ្សាយនៅថ្ងៃ៖
ស្តាប់ - ០១:៤៧
ព្រះរាជអាជ្ញារងសាលាដំបូងរាជធានីភ្នំពេញ លោកគុជ គឹមឡុង បានសម្រេចបើកការស៊ើបសួរលើអង្គហេតុនិងដាក់ឲ្យស្ថិតក្រោមការឃុំខ្លួនបណ្តោះអាសន្ន ដល់បុគ្គលទាំងបីរូបរួមមាន ព្រះតេជគុណ ប៊ុត ប៊ុនតិញ ប្រធានបណ្តាញព្រះសង្ឃឯករាជ្យកម្ពុជា លោកមឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស(សង់ត្រាល់) និងលោក ប៉ា ងួនទៀង នាយកប្រតិបត្តិនៃមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ។
នៅក្នុងលិខិតរបស់ព្រះរាជអាជ្ញា ដែលចុះកាលបរិច្ឆេទកាលពីថ្ងៃទី៤មករា ហើយទើបដល់ដៃប្រព័ន្ធផ្សព្វផ្សាយនៅថ្ងៃនេះ លើកឡើងថា អតីតសមាជិកគណៈកម្មការបុណ្យសព បណ្ឌិតកែម ឡី ទាំង៣រូប បានប្រព្រឹត្តពាក់ព័ន្ធទៅនឹងការចាត់ចែងថវិកា ដែលជាបច្ច័យចាប់តាំងពីបុណ្យសព រហូតដល់បុណ្យ១០០ថ្ងៃ ដែលមានប្រហែល ៣០០ ០០០ដុល្លារ។ អត្ថបទរបស់ព្រះរាជអាជ្ញាបញ្ជាក់ថា ក្រុមគ្រួសារលោកកែម ឡី ទទួលបច្ច័យពីប្រជាពលរដ្ឋចំនួនតែ ៦ពាន់ដុល្លារ ថវិកាលោកនាយករដ្ឋមន្ត្រីហ៊ុន សែន ចំនួន៥ម៉ឺនដុល្លារ និងថវិកាក្រុមការងារលោកពេជ្រ ស្រស់ ជាង៣លានរៀលប៉ុណ្ណោះ។
ទោះយ៉ាងណាព្រះតេជគុណ ប៊ុត ប៊ុនតិញ លោកមឿន តុលា និងលោកប៉ា ងួនទៀង នៅមិនមានប្រតិកម្មអ្វីទេ ប្រឈមនឹងការចោទប្រកាន់ពេលនេះ ហើយអ្នកទាំង៣ ក៏មិនទាន់ត្រូវបានឃាត់ខ្លួននៅឡើយដែរ។ ក៏ប៉ុន្តែកាលពីខែវិច្ឆិកាឆ្នាំ២០១៧ កន្លងទៅនេះ លោកមឿន តុលាបានប្រាប់វិទ្យុបារាំងថា ការចោទប្រកាន់ទាំងអស់មកលើរូបលោកគឺមិនពិតទេ។
សូមបញ្ជាក់ថា ការចោទប្រកាន់របស់ស្ថាប័នអយ្យការ ទៅលើអតីតសមាជិកគណៈកម្មការបុណ្យសពលោកបណ្ឌិត កែម ឡី បានធ្វើឡើងបន្ទាប់ពីមានពាក្យបណ្តឹងរបស់លោកពេជ្រ ស្រស់ ប្រធានគណបក្សយុវជនកម្ពុជា កាលពីថ្ងៃទី៨ខែកញ្ញាឆ្នាំ២០១៧ ជុំវិញការបាត់ថវិកាបុណ្យសព រហូតដល់បុណ្យ១០០ថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ