ADB ផ្តល់កម្ចី ១៩០លានដុល្លារ ជួយគម្រោងកាត់បន្ថយគម្លាតប្រជាជនទីក្រុង-ជនបទ
ធនាគារអភិវឌ្ឍន៍អាស៊ី ហៅកាត់ថា ADB នៅព្រឹកថ្ងៃទី ៦កក្កដានេះ បានចុះហត្ថលេខាជាមួយ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកម្ពុជា លើកិច្ចព្រមព្រៀងហិរញ្ញប្បទានសហប្រតិបត្តិការសម្រាប់គម្រោងចំនួន ២ នៅកម្ពុជា ដែលមានទឹកប្រាក់ ១៩០លានដុល្លារអាមេរិក។ គម្រោងទាំង ២នោះ រួមមាន គម្រោងខ្សែច្រវាក់ផលិតកម្មប្រកបដោយភាគរៈបរិស្ថាន និងគម្រោងកែលម្អផ្លូវជនបទជំហានទី៣។
ចុះផ្សាយនៅថ្ងៃ៖
ស្តាប់ - ០១:៥៨
គម្រោងខ្សែច្រវាក់ផលិតកម្មប្រកដដោយភាគរៈបរិស្ថាន គ្រោងចំណាយថវិកាប្រមាណជាង ១៤១លានដុល្លារអាមេរិក។ គម្រោងនេះ នឹងគាំទ្រដល់ការបង្កើនប្រាក់ចំណូល ដល់ប្រជាជនតាមជនបទ និងជំរុញនូវការប្រកួតប្រជែងនៃច្រវាក់ផលិតកម្មកសិកម្ម ស្របតាមផែនការយុទ្ធសាស្ត្រអភិវឌ្ឍន៍វិស័យកសិកម្ម គោលនយោបាយរបស់រាជរដ្ឋាភិបាល ស្តីពី «ការជំរុញផលិតកម្មដំណាំស្រូវ និងការនាំចេញអង្ករ» និងគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ ២០១៥-២០២៥។
ចំណែកគម្រោងកែលម្អផ្លូវជនបទជំហានទី ៣ គ្រោងចំណាយថវិកាសរុប ៦៦លានដុល្លារ សម្រាប់ធ្វើការកែលម្អបន្ថែមផ្លូវជនបទ ដោយក្រាលកៅស៊ូ ២ជាន់ និងបេតុង ចំនួន ២២ខ្សែ ដែលមានប្រវែងប្រមាណជាង ៣០, ០០០គីឡូម៉ែត្រ ក្នុងខេត្តកំពង់ចាម ត្បូងឃ្មុំ ព្រៃវែង ស្វាយរៀង និងក្រចេះ។ តាមការរំពឹងទុក គម្រោងនេះ នឹងចូលរួមចំណែកក្នុងការអនុវត្តគោលនយោបាយអភិវឌ្ឍន៍ជនបទ រួមទាំងធានាលើកកម្ពស់កម្រិតជីវភាពរស់នៅរបស់ប្រជាពលរដ្ឋជនបទ ឲ្យមានគម្លាតខិតជិតទីប្រជុំជន នៅឆ្នាំ ២០២៥។
ពិធីចុះហត្ថលេខាលើកិច្ចព្រមព្រៀងនេះ ត្រូវបានធ្វើឡើងនៅទីស្តីការក្រសួងសេដ្ឋកិច្ច និងហិរញ្ញវត្ថុ ក្រុងភ្នំពេញ រវាងលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាមួយលោក Hideaki Iwasaki នាយកស្តីទីស្ថានតំណាងធនាគារ ADB ប្រចាំកម្ពុជា។ លោក អូន ព័ន្ធមុនីរ័ត្ន បានបញ្ជាក់ថា គម្រោងនេះ មានសារៈសំខាន់ ក្នុងការកាត់បន្ថយភាពក្រីក្ររបស់ប្រជាជនកម្ពុជា និងជួយធានាសម្រេចឲ្យបាននូវចីរភាពនៃកំណើនសេដ្ឋកិច្ចក្នុងរយៈពេលវែង។
គួរជម្រាបជូនថា គិតមកដល់ពេលនេះ ADB បានផ្តល់ហិរញ្ញប្បទានសហប្រតិបត្តិការសរុបប្រមាណជិត ៣,០០០ លានដុល្លារ ដល់កម្ពុជា លើកិច្ចព្រមព្រៀងចំនួន ៥ ដែលក្នុងនោះ ឥណទានសម្បទានមានទឹកប្រាក់ប្រមាណជិត ២, ៥០០លានដុល្លារអាមេរិក សម្រាប់អនុវត្តលើកម្មវិធី ឬ គម្រោងចំនួន ១០១ និងហិរញ្ញប្បទានឥតសំណង មានទឹកប្រាក់ជិត ៥០០លានដុល្លារ សម្រាប់អនុវត្តលើកម្មវិធី ឬ គម្រោងចំនួន ៥១នៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ