អាជ្ញាធរអប្សរា នឹងសាងសង់ទីលានបដិសណ្ឋារកិច្ចភ្ញៀវទេសចរ នៅមុខប្រាសាទអង្គរវត្ត
ប៉ាកវី អង្គរ Parvis Angkor ឬទីលានបដិសណ្ឋារកិច្ចភ្ញៀវទេសចរ នឹងត្រូវរៀបចំនៅមុខប្រាសាទអង្គរ នៅក្នុងពេលដ៏ឆាប់ខាងមុខ។ តាមរយៈការសាងសង់ទីលានបដិសណ្ឋារកិច្ចភ្ញៀវទេសចរនេះ អាជ្ញាធរជាតិអប្សរាសង្ឃឹមថា នឹងអាចលើកតម្លៃប្រាសាទអង្គរវត្តដែលជាបេតិកភណ្ឌពិភពលោក។ បន្ថែមពីលើនេះ គម្រោង ប៉ាកវី អង្គរ ក៏នឹងជួយឲ្យចំណូលពីវិស័យទេសចរកើនឡើងបន្ថែមទៀតផងដែរ។ នេះបើតាមអាជ្ញាធរជាតិអប្សរា។
ចុះផ្សាយនៅថ្ងៃ៖
ស្តាប់ - ០២:០៥
គម្រោងប៉ាកវី អង្គរ Parvis Angkor ឬទីលានបដិសណ្ឋារកិច្ចភ្ញៀវទេសចរ ត្រូវបានអាជ្ញាធរជាតិអប្សរាលើកឡើងតាំងពីឆ្នាំ២០១០ ដោយផ្អែកលើស្ថានភាពបច្ចុប្បន្ននៃសណ្ដាប់ធ្នាប់នៅមុខប្រាសាទអង្គរវត្ត ដែលនៅមិនទាន់មានរបៀបរៀបរយនៅឡើយ។
រហូតមកដល់ចុងឆ្នាំ២០១៤ ដំណាក់កាលទី១នៃគម្រោងនេះ បានសាងសង់ចប់រួចរាល់ នូវចំណតរថយន្តសាធារណៈ។ ហើយដំណាក់កាលទី២ ដែលជាអគារបដិសណ្ឋារកិច្ចភ្ញៀវទេសចរ នឹងត្រូវចាប់ផ្ដើមសាងសង់ក្នុងពេលដ៏ឆាប់ខាងមុខ។ នេះបើតាមវីដេអូឯកសារស្ដីពីគម្រោង Parvis អង្គរ ដែលត្រូវបានអាជ្ញាធរជាតិអប្សរាផលិត និងផ្សព្វផ្សាយនៅថ្ងៃទី៣១ខែឧសភា។
លោក អ៊ុក សូមេត្ត អគ្គនាយករងអាជ្ញាធរជាតិអប្សរា បានឲ្យដឹងថា ទីលានបដិសណ្ឋារកិច្ចភ្ញៀវទេសចរអង្គរ នឹងត្រូវរៀបចំឡើងដើម្បីផ្ដល់សេវាកម្មខ្នាតអន្ដរជាតិមួយចំនួន ដូចជាកន្លែងទទួលភ្ញៀវ ភោជនីយដ្ឋាន កន្លែងធ្វើពិព័រណ៍ សួនកម្សាន្ត បន្ទប់សង្គ្រោះបន្ទាន់ កន្លែងជ្រកភ្លៀង ជ្រកកម្ដៅថ្ងៃ បណ្ណាល័យតូចសម្រាប់ស្រាវជ្រាវ និងកន្លែងលក់វត្ថុអនុស្សាវរីយ៍ជាដើម។ អាជីវករនៅមុខប្រាសាទអង្គរវត្តសព្វថ្ងៃដែលមានឈ្មោះនៅក្នុងបញ្ជី នឹងត្រូវផ្លាស់ទៅលក់ដូរនៅអគារថ្មី ក្រោយការសាងសង់បញ្ចប់។
គម្រោង ប៉ាកវីអង្គរ បានឆ្លងកាត់ការពិគ្រោះយោបល់ និងទទួលបានការគាំទ្រពីគណៈកម្មាធិការសម្របសម្រួលអន្ដរជាតិ ដើម្បីការអភិរក្សនិងអភិវឌ្ឍតំបន់អង្គរ ហៅកាត់ថា ICC អង្គរ។ ទន្ទឹមនឹងការគាំទ្រ ICC អង្គរ បានផ្ដល់នូវអនុសាសន៍មួយចំនួនផងដែរ។ អនុសាសន៍ទាំងនោះ មានជាអាថិ៍៖ គម្រោង ប៉ាកវី អង្គរ ត្រូវឋិតក្នុងទំហំសមល្មម និងកំពស់ត្រឹម៨ម៉ែត្រ។ ស្ថាបត្យកម្មត្រូវមានលក្ខណៈបែបខ្មែរ និងបើកចំហ ដើម្បីផ្សាភ្ជាប់ជាមួយបរិស្ថានធម្មជាតិ។ ប្រើប្រាស់សម្ភារៈសាងសង់ក្នុងស្រុកតាមលក្ខណៈប្រពៃណីខ្មែរ។ រៀបចំបណ្ដាញទឹកនិងអគ្គីសនីឲ្យមានសុវត្ថិភាព ចៀសវាងកុំឲ្យប៉ះពាល់ដល់បរិស្ថាននៅមុខប្រាសាទអង្គរវត្ត។ រៀបចំសួននិងដាំដើមឈើប្រវត្តិសាស្ត្រ ដើម្បីលើកតម្លៃអង្គរ។ រៀបចំផ្លូវដើរសម្រាប់ភ្ញៀវទេសចរ និងសួនដើមឈើសម្រាប់កម្សាន្តជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ