គម្រោងសាងសង់ប្រាសាទអង្គរវត្តចម្លងនៅឥណ្ឌាត្រូវផ្អាក ក្រោយប្រតិកម្មពីកម្ពុជា
នៅទីបំផុត មូលនិធិ Mahavir Mandir Trust របស់ឥណ្ឌា បានសម្រេចផ្អាកគម្រោងសាងសង់ប្រាសាទអង្គរវត្តចម្លង ក្រោយពីមានប្រតិកម្មពីកម្ពុជា។ នេះបើតាមការចុះផ្សាយរបស់សារព័ត៌មានឥណ្ឌា នៅថ្ងៃសុក្រទី០៣ កក្កដាម្សិលមិញ។ យ៉ាងណាក៏ដោយ មន្ដ្រីនៃមូលនិធិ Mahavir Mandir Trust បានអះអាងពីភាពខុសគ្នានៃប្រាសាទអង្គរវត្តពិតប្រាកដ និងប្រាសាទដែលគ្រោងសាងសង់នៅឥណ្ឌា។ និងថា ខ្លួនរីករាយនឹងធ្វើការពន្យល់បំភ្លឺដល់មន្ដ្រីជំនាញនៃរដ្ឋាភិបាលកម្ពុជា អំពីភាពខុសគ្នានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
ក្រោយប្រតិកម្មរបស់កម្ពុជា ក្រសួងការបរទេសនិងក្រសួងវប្បធម៌ឥណ្ឌា បានស្នើឲ្យមូលនិធិ Mahavir Mandir Trust ផ្អាកការសាងសង់ប្រាសាទអង្គរវត្តចម្លងនៅប្រទេសឥណ្ឌាសិន។ ការសាងសង់ប្រាសាទដែលគ្រោងចាប់ផ្ដើមនៅខែមិថុនា នឹងត្រូវពន្យាពេល រហូតទាល់តែបញ្ហាចម្រូងចម្រាស់នេះត្រូវបានដោះស្រាយរួច។ នេះបើតាមការឲ្យដឹងពីលោក Acharya Kishore Kunal អគ្គលេខាធិការនៃមូលនិធិ Mahavir MandirTrust នៅថ្ងៃសុក្រ ទី០៣ ខែកក្កដា។ លោក Kunal បានគូសបញ្ជាក់បន្ថែមថា លោកគោរពមនោសញ្ចេតនារបស់ប្រជាពលរដ្ឋកម្ពុជាចំពោះប្រាសាទអង្គរវត្ត ប៉ុន្តែលោកចង់ពន្យល់កម្ពុជាថា ប្រាសាទដែលមូលនិធិលោកគ្រោងសាងសង់នោះ មិនមែនចម្លងទាំងស្រុងពីប្រាសាទអង្គរវត្តនោះទេ។
បើតាមអគ្គលេខាធិការរូបនេះ លក្ខណៈនៃស្ថាបត្យកម្មយ៉ាងហោចណាស់៦០ភាគរយ គឺមិនដូចគ្នាទាល់តែសោះ។ លោកថា ប្រាសាទ Viraat Ramayan Mandir ខុសពីប្រាសាទអង្គរវត្តរបស់កម្ពុជា ព្រោះវាមានបែបបទស្ថាបត្យកម្មទាន់សម័យ បង្កប់ដោយលក្ខណៈពិសេសរបស់ប្រាសាទល្បីៗនៅឥណ្ឌា។
នៅសប្ដាហ៍ក្រោយ អគ្គលេខាធិការនៃមូលនិធិ Mahavir Mandir Trust នឹងដឹកនាំក្រុមស្ថាបត្យករនៃប្រាសាទទៅកាន់រដ្ឋធានីដេលី ដើម្បីជួបជាមួយមន្ដ្រីរដ្ឋាភិបាលកម្ពុជា ព្រមទាំងតំណាងក្រសួងការបរទេសនិងក្រសួងវប្បធម៌របស់ឥណ្ឌា។ វិទ្យុបារាំងអន្ដរជាតិ មិនអាចស្វែងរកការបំភ្លឺពីក្រសួងការបរទេសកម្ពុជាបានទេ នៅថ្ងៃសៅរ៍ ទី០៤កក្កដានេះ។ ប៉ុន្តែលោក Kunal ចង់ជួបជាមួយក្រុមស្ថាបត្យកររបស់កម្ពុជា ដែលអាចយល់បានពីបច្ចេកវិទ្យានៃការរចនាប្រាសាទ។ ព្រោះបើតាមលោក Kunal បញ្ហានេះ គឺជារឿងបច្ចេកទេសសុទ្ធសាធ និងមិនអាចដោះស្រាយតាមផ្លូវនយោបាយការទូតនោះទេ។
គួរជម្រាបជូនថា គម្រោងរបស់ឥណ្ឌាដែលចង់សាងសង់ប្រាសាទចម្លងតាមប្រាសាទអង្គរវត្ត បានលេចលឺតាំងពីឆ្នាំ២០១២មកម្ល៉េះ។ គម្រោងប្រាសាទដំបូងនោះ ត្រូវបានដាក់ឈ្មោះថា Virat Angkor Wat Ram Mandir ប៉ុន្តែក្រោយមកបានប្ដូរឈ្មោះមកជា Viraat Ramayan Mandir វិញ។ កាលពីខែមិថុនាកន្លងទៅ ក្រសួងការបរទេសកម្ពុជា បានផ្ញើកំណត់ទូតតវ៉ាទៅក្រសួងការបរទេសឥណ្ឌា ឲ្យមូលនិធិឥណ្ឌា Mahavir Mandir Trust បញ្ឈប់គម្រោងសាងសង់ប្រាសាទដែលចម្លងតាមប្រាសាទអង្គរវត្ត។ រដ្ឋាភិបាលកម្ពុជាបានចាត់ទុកការសាងសង់ប្រាសាទ ចម្លងតាមប្រាសាទអង្គរវត្ត ដើម្បីផលប្រយោជន៍ពាណិជ្ជកម្មនេះថា គឺជាការរំលោភបំពានយ៉ាងធ្ងន់ធ្ងរដល់សម្បត្តិបេតិកភណ្ឌពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ