ក្រឡាបញ្ជីខេត្តបន្ទាយមានជ័យត្រូវបានចាប់ខ្លួនពីបទពុករលួយ
អង្គភាពប្រឆាំងអំពើពុករលួយ នៅថ្ងៃទី ២៨ មីនានេះ បានបញ្ចប់ការសួរចម្លើយក្រឡាបញ្ជីតុលាការខេត្តបន្ទាយមានជ័យលោក ហង្ស សាមឿន ដែលត្រូវបានចាប់ខ្លួនកាលពីថ្ងៃម្សិលមិញ។ ក្រឡាបញ្ជីនេះ ត្រូវបានអង្គភាពចាប់ខ្លួនដោយសារ បានទារប្រាក់ពីជនរងគ្រោះសម្រេចរហូតដល់ ៤ដង។ ប៉ុន្តែលោកព្រាប កុលថាការបង្ក្រាបនេះ គឺគ្រាន់តែជាការចាប់ដង្កូវ ប៉ុន្តែមិនមែនព្យាបាលដំបៅនោះទេ។
ចុះផ្សាយនៅថ្ងៃ៖
ស្តាប់ - ០៣:០៦
លោកក្រឡាបញ្ជី ហង្ស សាមឿន ត្រូវបានវាយខ្នោះបញ្ជូនទៅតុលាការខេត្តបន្ទាយមានជ័យវិញហើយ និងត្រៀមខ្លួនប្រឈមមុខនឹងតុលាការ។ អង្គភាពប្រឆាំងអំពើពុករលួយបានចាប់បញ្ជូនក្រឡាបញ្ជីពុករលួយរូបនេះ ទៅកាន់តុលាការខេត្តបន្ទាយមានជ័យវិញបន្ទាប់ពីបានសួរចម្លើយនៅអង្គភាពប្រឆាំងអំពើពុករលួយនៅព្រឹកថ្ងៃទី ២៨ មីនានេះ។ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយធានាចំពោះ ភស្តុតាងរបស់លោកដែលឈានដល់ការចាប់ខ្លួនក្រឡាបញ្ជីចាស់វស្សារូបនេះ គឺមាំទាំណាស់ដែលមិនអាចរួចខ្លួនបាននោះឡើយ។ ហើយជនសង្ស័យ ហង្ស សាមឿន ក៏បានសារភាពទទួលកំហុសផងដែរ។
អង្គភាពប្រឆាំងអំពើពុករលួយបានអះអាងថា លោកហង្ស សាមឿនដែលធ្លាប់ជាក្រឡាបញ្ជីខេត្តកោះកុង និងរាជធានីភ្នំពេញ “បានយកអំណាចគៀបសង្កត់ ទារប្រាក់ពីជនរងគ្រោះដោយគ្មានការខ្លាចញញើតអ្វីទាំងអស់” ហើយក្រឡាបញ្ជីចាស់វស្សារូបនេះ ក៏បានទារប្រាក់រាប់ម៉ឺនដុល្លារពីជនរងគ្រោះផងដែរ។ អង្គភាពប្រឆាំងអំពើពុករលួយរបស់រដ្ឋាភិបាល បានលើកឡើងថា អំពើរបស់ក្រឡាបញ្ជីហង្ស សាមឿន គឺជាទង្វើប៉ះពាល់ដល់កិត្តិយស និងកិត្យានុភាពរបស់ស្ថាប័នជាតិ។
ចំពោះការចាប់ខ្លួននេះ លោកព្រាប កុលប្រធានអង្គការតម្លាភាពម្ពុជា បានស្វាគមន៍ចំពោះវិធានការបង្ក្រាបនេះ ប៉ុន្តែលោកបានអះអាងថាការចាប់ខ្លួននេះ បានបញ្ជាក់ថាប្រព័ន្ធយុត្តិធម៌ត្រូវការកំណែទម្រង់ដើម្បីអាចឱ្យទទួលយកបាន។ បន្ថែមពីនេះលោកព្រាប កុលបានគូសបញ្ជាក់ថាការចាប់ខ្លួនបុគ្គល ១នាក់ ឬ ២នាក់នេះមិនអាចឱ្យចំណាត់ថ្នាក់អាក្រក់របស់កម្ពុជាស្តីពីអំពើពុករលួយនោះមានភាពប្រសើរឡើងវិញនោះទេ។ ហើយថាការចាប់ខ្លួននេះ គឺគ្រាន់តែជាការបេះដង្កូវចេញពីរបួសតែប៉ុណ្ណោះ ហើយមិនមែនជាការព្យាបាលរបួសនោះឡើយ។
សម្រាប់លោកព្រាប កុលការព្យាបាលរបួសគឺការធ្វើឱ្យចៅក្រមក្រឡាបញ្ជីមានឯករាជ្យភាពទាំងអំណាច និងសេដ្ឋកិច្ច។
គួរបញ្ជាក់ថាសម្រាប់រយៈពេលបីខែដើមឆ្នាំ ២០១៧នេះ អង្គភាពប្រឆាំងអំពើពុករលួយបានចាប់ខ្លួនមនុស្សចំនួន ៣រូប គឺមន្ត្រីពីររូបនៅសាលារាជធានីភ្នំពេញ និងក្រឡាបញ្ជីខេត្តបន្ទាយមានជ័យរូបនេះ។ អង្គការតម្លាភាពដែលមានមូលដ្ឋាននៅប្រទេសអាឡឺម៉ង់ បានផ្តល់ចំណាត់ថ្នាក់ឱ្យកម្ពុជាលេខ ១៥៦ក្នុងចំណោមប្រទេស ១៧៦ដែលជាប្រទេសមានអំពើពុករលួយបំផុតនៅអាស៊ីអាគ្នេយ៍។ អង្គការនេះ បានលើកឡើងថា ប្រព័ន្ធយុត្តិធម៌គឺជាផ្នែកសំខាន់បំផុតមួយដែលតែងតែទាញទម្លាក់ភាពស្អាតស្អំរបស់កម្ពុជា។
ប៉ុន្តែយ៉ាងណាក៏ដោយ លោកឱម យ៉ិនទៀង ប្រធានអង្គភាពប្រឆាំងអំពើពុករលួយ បានអះអាងថាការវាយតម្លៃរបស់អង្គការនេះ គឺមិនបានឆ្លុះបញ្ចាំងពីស្ថានភាពពិតក្នុងសង្គមកម្ពុជាចំពោះអំពើពុករលួយនោះទេ ហើយរបាយការណ៍អង្គការនេះ បានបិទភ្នែកចំពោះកិច្ចខិតខំប្រឹងប្រែងក្នុងការកំចាត់អំពើពុករលួយ។ លោកបានបញ្ជាក់ថា ការងារកំចាត់អំពើពុករលួយនៅកម្ពុជា គឺមិនត្រូវការចំណាត់ការពីអង្គការណាមួយនោះទេ ប៉ុន្តែឥរិយាបទសង្គមកម្ពុជាបានដើរទៅរកភាពស្អាតស្អំយ៉ាងពិតប្រាកដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ