អង្គការ៩ រួមគ្នាបង្កើតកម្មវិធីប្រកាសទ្រព្យសម្បត្តិដោយស្ម័គ្រចិត្តតាម Online ជាលើកដំបូងនៅកម្ពុជា
ដើម្បីបង្កើនប្រសិទ្ធនិងតម្លាភាពជំនួយបរទេសនៅកម្ពុជា អង្គការចំនួន៩ នៅកម្ពុជាបានរួមគ្នាបង្កើតកម្មវិធីប្រកាសទ្រព្យសម្បតិ្តជាសាធារណៈតាមប្រព័ន្ធ Online ជាលើកដំបូងនៅកម្ពុជា។ ការប្រកាសនេះ ត្រូវបានធ្វើឡើងនៅក្នុងសន្និសីទស្តីពីការប្រកាសទ្រព្យសម្បតិ្តដោយស្ម័គ្រចិត្ត នៅព្រឹកថ្ងៃទី២៩ កុម្ភៈនេះ នៅ Development Innovations Cambodia ក្នុងទីក្រុងភ្នំពេញ។ កម្មវិធីនេះក៏មានការចូលរួមពីលោកហូ វណ្ណ ប្រធានគណៈកម្មការអង្កេត បោសសំអាត និងប្រឆាំងអំពើពុករលួយរបស់រដ្ឋសភាកម្ពុជាផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
លោកហូ វណ្ណ ប្រធានគណៈកម្មការទី១០ របស់រដ្ឋសភាកម្ពុជាបានបង្ហាញការគាំទ្រចំពោះក្រុមអង្គការសង្គមស៊ីវិលចំនួន៩ ដែលបានរួមគ្នាបង្កើតកម្មវិធីប្រកាសទ្រព្យសម្បត្តិដោយស្ម័គ្រចិត្ត និងជាសាធារណៈនៅតាមប្រព័ន្ធ Online។ លោកបានបន្តឲ្យដឹងទៀតថា នេះជាក្រុមអង្គការទីមួយហើយដែលបានរួមគ្នាជួយលើកកម្ពស់តម្លាភាព និងកាត់បន្ថយអំពើពុករលួយនៅក្នុងសង្គម ព្រោះថាកន្លងមកមានតែអង្គភាពប្រឆាំងអំពើពុករលួយតែមួយប៉ុណ្ណោះដែលធ្វើការងារនេះ។ ប៉ុន្តែការប្រកាសមិនត្រូវបានបង្ហាញជាសាធារណៈនោះទេ គឺធ្វើជាឡើងជាលក្ខណៈកញ្ចប់ ហើយមិនត្រូវបានប្រកាសឲ្យដឹងជាសាធារណៈនោះទេ។
លោក គុយ មាសសំណាង ប្រធានអង្គការគណនេយ្យភាពកម្ពុជា ដែលជាអង្គការមួយក្នុងចំណោមអង្គការទាំង៩ ដែលបានផ្តួចផ្តើមបង្កើតកម្មវិធីប្រកាសទ្រព្យសម្បតិ្តដោយស្ម័គ្រចិត្តនេះ បានបញ្ជាក់ប្រាប់វិទ្យុបារាំងថា កម្មវិធីនេះត្រូវបានបង្កើតឡើងក្នុងគោលបំណងចូលរួមជាមួយនឹងរដ្ឋាភិបាល ដើម្បីប្រឆាំងនិងអំពើពុករលួយ ដោយចាប់ផ្តើមពីក្រុមអង្គការសង្គមស៊ីវិលទៅមុនក្នុងការបង្ហាញ និងប្រកាសជាសាធារណៈ។ លោកបានបន្តថា បន្ទាប់ពីប្រធានអង្គការសង្គមស៊ីវិល ក៏មានការចូលរួមប្រកាសពីសិស្សនិសិត្សផងដែរ ដើម្បីជាគំនូរ និងបង្ហាញពីភាពស្អាតស្អំ និងភាពស្មោះត្រង់នៅពេល ដែលពួកគេក្លាយជាអ្នកដឹកនាំនៅថ្ងៃអនាគត។
លោក គុយ មាសសំណាង សង្ឃឹមថា កម្មវិធីប្រកាសទ្រព្យសម្បត្តិជាសាធារណៈនេះ និងចូលរួមចំណែកជួយសង្គមកម្ពុជាឲ្យកាន់តែរីកចម្រើន និងជួយកាត់បន្ថយអំពើពុករលួយនៅក្នុងសង្គម។ លោកបានបញ្ជាក់ទៀតថា ក្រុមការងាររបស់លោកនឹងរៀបចំកម្មវិធីនេះ ជាបន្តទៀតនៅខែក្រោយៗ ហើយនិងមានការចូលរួមពីសិស្សនិសិត្សកាន់តែច្រើនផងដែរ ព្រោះថាមានមនុស្សច្រើននៅក្នុងសង្គមចាប់ផ្តើមចង់ឃើញការផ្លាស់ប្តូរនៅក្នុងសង្គម។
សូមបញ្ជាក់ផងដែរថា គេហទំព័រដែលត្រូវបានធ្វើឡើងដើម្បីដាក់ប្រកាសទ្រព្យសម្បត្តិជាសាធារណៈនោះមានអាស័យដ្ឋាន www.accountabilityinternational.org.au ។ គេហទំព័រនេះកំពុងតែស្ថិតក្រោមដំណើរការនៅឡើយ។ បើតាមលោក គុយ មាសសំណាង គេហទំព័រនេះ នឹងរួចរាល់ជាផ្លូវការ នៅប៉ុន្មានខែខាងមុខនេះហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ