ការដឹកជញ្ជូនដោយរថយន្តធុនធំនៅតែគ្មានសុវត្ថិភាពសម្រាប់អ្នកដទៃ
ចុះផ្សាយនៅថ្ងៃ៖
ស្តាប់ - ០៤:៣៧
សុវត្ថិភាពពលរដ្ឋខ្មែរ ដែលធ្វើដំណើរតាមកង់ម៉ូតូ និងតាមរថយន្តធុនតូច កំពុងប្រឈមនូវភាពភ័យខ្លាចនៅតាមដងផ្លូវ ទាំងនៅក្នុងរាជធានីភ្នំពេញ និងនៅតាមផ្លូវជាតិនានា។ ភ័យខ្លាចដោយសារតែមួយរយៈកន្លងទៅនេះ រថយន្តកុងតឺន័រធំៗ និងរថយន្តទេសចរណ៍ដឹកអ្នកដំណើរបានបង្កហេតុញឹកញាប់ បណ្តាលឲ្យមានការរងគ្រោះដល់ជនស្លូតត្រង់ ដែលមិនដឹងអ្វីសោះ។បញ្ហាបច្ចេកទេស ឥរិយាបទនិងបទពិសោធន៍អ្នកបើកបររថយន្តធំៗ និងការមិនគោរពច្បាប់ចរាចរណ៍ នៅតែជាចំណោទគួរឲ្យព្រួយបារម្ភនៅឡើយ។
បន្ទាប់ពីមានការភ្ញាក់ផ្អើល ដោយសាររថយន្តធុនធ្ងន់ ដឹកទំនិញលើសការកំណត់ឡើងស្ពានត្សឹបាសា ឬស្ពានអ្នកលឿងមិនរួច បណ្តាលឲ្យខូចខាតកៅស៊ូស្ពានរួចមក មហាជនគិតថាបញ្ហារថយន្តធុនធ្ងន់ ប្រហែលជាអាចដោះស្រាយបានហើយ ដោយសារមានការតាមចាប់អ្នកបើកបរឲ្យមកទទួលខុសត្រូវ។ កាលណោះក្រសួងសាធារណការនិងដឹកជញ្ជូន បានប្រឹងប្រែងខ្លាំងក្នុងរឿងនេះ បន្ទាប់ពីបញ្ជារបស់នាយករដ្ឋមន្ត្រី។
ក៏ប៉ុន្តែវាហាក់ដូចជាការសង្ឃឹមថាសុវត្ថិភាពនៅតាមដងផ្លូវចៀសផុតពីការគំរាមកំហែងពី រថយន្តធំៗ ជាពិសេសរថយន្តកុងតឺន័រ នៅឆ្ងាយនៅឡើយ។ ភាពអស់សង្ឃឹមនិងការព្រួយបារម្ភរបស់អ្នកធ្វើដំណើរតាមដងផ្លូវ បានកើតឡើងបន្ទាប់ពីឃើញមានរថយន្តដឹកកុងតឺន័រមួយគ្រឿងកាលពីថ្ងៃទី១ ខែសីហាថ្មីៗនេះ បានរបូតទូកុងតឺន័រមកក្រោយ ដោយសារឡើងទួលមិនរួចនៅចំណុចផ្លូវ២៧១ ជាប់រង្វង់មូលផ្សារដើមថ្កូវ បណ្តាលឲ្យខូចខាតរថយន្តតូចមួយគ្រឿងផ្នែកខាងមុខ។
ឃ្លាតគ្នាមិនបានប៉ុន្មានថ្ងៃផង រថយន្តខ្នាតយក្សសណ្តោងកុងតឺន័រមួយគ្រឿងទៀត បានឡើងស្ពានអាកាសស្ទឹងមានជ័យមិនរួចដែរក៏រអិលថយក្រោយវិញទាំងកំរោល និងទើកណ្តាលស្ពាន។ តែសំណាងល្អករណីព្រលឹងចុងសក់ទាំងពីរថ្មីៗនេះមិនមានគ្រោះថ្នាក់ដល់ជីវិតមនុស្សនោះទេ។ ការដែលមិនមានគ្រោះថ្នាក់ពេលនេះ មិនមែនមានន័យថាពលរដ្ឋខ្មែរ ដែលធ្វើដំណើរក្បែររថយន្តធំៗទាំងនោះរួចខ្លួននោះទេទៅថ្ងៃក្រោយ ប្រសិនបើស្ថានភាពនេះមិនត្រូវបានគេកែប្រែ។
ទាំងនេះនៅមិនទាន់រាប់បញ្ចូលករណីជាច្រើនទូទាំងរាជធានី-ខេត្ត ដែលមានលក្ខណៈស្រដៀងគ្នា ហើយដែលបានកើតឡើងកាលពីឆ្នាំកន្លងទៅ។
ដដែលជាដដែល គេតែងលើកសំណួរថាហេតុអ្វីចេះតែមានបញ្ហាដូច្នេះកើតឡើង? ឯណាទៅពាក្យថាសុវត្ថិភាពរបស់ប្រជាពលរដ្ឋនៅតាមដងផ្លូវ ដែលកំពុងបើកបរលាយឡំគ្នាជាមួយនឹងរថយន្តសណ្តោងកុងតឺន័រធំ? ចំលើយ បានក្លាយទៅជាចំងល់ មូលហេតុអ្វីបានជាមានរថយន្តធុនធំបើកកាត់ក្រុងទាំងពេលថ្ងៃ ដែលមានការហាមឃាត់! តើរថយន្តដែលមានទំហំប៉ុនៗផ្លូវលំទាំងនោះ មានការត្រួតពិនិត្យលក្ខណៈបច្ចេកទេសពីជំនាញក្រសួងសាធារណៈការដែរឬទេ!
ការដែលគ្រវែងទូកុងតឺន័រ ចេញពីតួរថយន្ត បង្ហាញថាមិនមានការមួលភ្ជាប់រថយន្ត និងទូកុងតឺន័រទេ។ ការបើកឡើងទួលមិនរួចបង្ហាញពីសមត្ថភាព និងបទពិសោធន៍ច្បាស់លាស់របស់អ្នកបើកបរមិនមានទាល់តែសោះ។ ការបំពានបើកបរលើស្ពានអាកាសរបស់រថយន្តសណ្តោងធំៗ មិនត្រូវបានសមត្ថកិច្ចហាមឃាត់។ ឯណាទៅការរឹតបន្តឹង និងការគោរពច្បាប់ចរាចរណ៍ជើងគោក? ឬមួយករណីដែលកើតឡើងដដែលៗទាំងនេះ នៅមិនទាន់មានមនុស្សស្លាប់ និងរបួសច្រើននៅឡើយ?
ជាការពិតស្ថានភាពសង្គម និងចរាចរណ៍នៅក្នុងប្រទេសកម្ពុជា ជាពិសេសនៅរាជធានីភ្នំពេញមានការប្រែប្រួល តែពិនិត្យមើលទៅឥរិយាបទអ្នកបើកបរហាក់ដូចជាមានការប្រែប្រួលតិចតួចណាស់។ ដូច្នេះស្ថាប័នមានសមត្ថកិច្ច ជាពិសេសក្រសួងដឹកជញ្ជូនគួរតែពិនិត្យឡើងវិញលើប្រធានបទ «ការដឹកជញ្ជូនប្រកបដោយសុវត្ថិភាព» ទៅលើរថយន្តធុនធ្ងន់ក្នុងនោះមានរថយន្តសណ្តោងកុងតឺន័រ, រថយន្តទេសចរណ៍វែងៗឬរថយន្តក្រុង រថយន្តដឹកដែក និងគ្រឿងសំណង់ដោយហេតុថា ប្រភេទរថយន្តទាំងអស់នេះប្រសិនបើបង្កគ្រោះថ្នាក់ គឺជាគ្រោះថ្នាក់បែបសមូហភាព ពោលគឺបង្កើនតួរលេខអ្នករងគ្រោះដោយចរាចរណ៍កាន់តែធំទៅៗ និងបង្កសោកនាដកម្មកាន់តែអាក្រក់ទៅផងដែរ។
គួរបញ្ជាក់ដែរថាចាប់តាំងពីមានការអនុវត្តការរឹតបន្តឹងច្បាប់ចរាចរណ៍ជើងគោកកន្លងមកចំនួនអ្នកស្លាប់ដោយសារគ្រោះថ្នាក់ចរាចរណ៍ត្រូវគេវាយតម្លៃជាមធ្យមចន្លោះពី៥ទៅ៦នាក់ ដដែលក្នុងមួយថ្ងៃ។
ការអប់រំ ការផ្សព្វផ្សាយពីទ្រឹស្តី វាជាចំណុចប្រសើរមួយហើយ តែការតាំងចិត្តពីការកែទម្រង់ និងនាំមនុស្សឲ្យទៅរកការគោរពច្បាប់ចរាចរណ៍ គឺជាការចាំបាច់ត្រូវតែមានការអនុវត្តជាក់ស្តែង ហើយហ៊ានអារកាត់តាមបែបវិមជ្ឈការអំណាច កុំរង់ចាំតែការសម្រេចរបស់នាយករដ្ឋមន្ត្រី។ បើពុំដូច្នោះទេ ភាពដដែលៗ គ្មានការកែប្រែនឹងក្លាយជាសត្រូវដ៏ធំដល់ការអភិវឌ្ឍជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ