នាយករដ្ឋមន្ត្រីដោះស្រាយបញ្ហាប្រឈមក្នុងវិស័យបរិស្ថាន
នៅថ្ងៃទី២២ សីហា នេះ រដ្ឋាភិបាលបានបើកវេទិកាស្តីពីការការពារ និងអភិរក្សធនធានធម្មជាតិ ដែលមានអ្នកចូលរួមពីសកម្មជនការពារបរិស្ថាន អង្គការការពារបរិស្ថាន ដើម្បីបើកឱ្យអ្នកចូលរួមទាំងអស់លើកពីបញ្ហាបរិស្ថានដល់ប្រមុខរដ្ឋាភិបាល។ អង្គការសង្គមស៊ីវិល និងសកម្មជន ដែលបានសម្តែងមតិជាចំហរបស់ខ្លួន បានទទួលយកគោលការណ៍សម្រេចរបស់ប្រមុខរដ្ឋាភិបាល។
ចុះផ្សាយនៅថ្ងៃ៖
ស្តាប់ - ០៣:១៧
វេទិកាចំហជាលើកដំបូងរវាងរដ្ឋាភិបាល និងអ្នកពាក់ព័ន្ធស្តីពីបញ្ហាបរិស្ថានត្រូវបានបើកឡើងដោយមានការចូលរួមពីសកម្មជនបរិស្ថានដ៏សកម្ម ព្រះតេជគុណប៊ុត ប៊ុនទិញ និងអង្គការសង្គមស៊ីវិលដ៏សកម្មផ្សេងៗទៀត។ ទន្ទឹមនឹងនោះប្រមុខរដ្ឋាភិបាលសម្រេចឆ្លើយតបភ្លាមៗនៅនឹងកន្លែងចំពោះបញ្ហា ដែលបានលើកឡើងពីអ្នកការពារបរិស្ថានដោយផ្ទាល់។ លោកនាយករដ្ឋមន្ត្រីហ៊ុន សែន ដែលបានប្រើប្រាស់វិមានសន្តិភាព ដើម្បីទទួលអ្នកចូលរួមទាំងអស់បញ្ចេញមតិ បានលើកឡើងថា វេទិកាដែលអ្នកចូលរួមជាច្រើនរយនាក់នេះ គឺជាវេទិកានិយាយត្រង់ទៅត្រង់មក ដើម្បីគោលដៅរួម គឺការថែរក្សាបរិស្ថានឱ្យនៅគង់វង្ស។
ក្នុងវេទិកាដែលរៀបចំដោយក្រសួងបរិស្ថាន អ្នកចូលរួមទាំងអស់ត្រូវបានអនុញ្ញាតិឱ្យសំដែងមតិ និងលើកពីកង្វល់របស់ខ្លួន ហើយនាយករដ្ឋមន្ត្រីសម្រេចភ្លាមចេញជាយន្តការ ដើម្បីដោះស្រាយតែម្តង។ ក្នុងវេទិកាដ៏កម្រនិងលោកទី១នេះ ព្រះតេជគុណប៊ុតប៊ុនទិញ ដែលជាសកម្មជនបរិស្ថានដ៏មានប្រជាប្រិយភាពមួយរូប បានស្នើសុំកិច្ចសហការពីអាជ្ញាធរមូលដ្ឋាន ដើម្បីដាំដើមឈើ និងកិច្ចការពារព្រៃឈើនៅតំបន់ព្រៃឡង់ និងតំបន់ព្រៃផ្សេងទៀត ក្រៅពីនេះ ប្រធានអង្គការសមាគមន៍ ប្រជាសហគមន៍តំណាងខេត្ត និងអតីតអ្នកគាំទ្រខ្លាំងក្លារបស់គណបក្សសង្គ្រោះជាតិ កញ្ញាធី សុវណ្ណថា ក៏បានស្នើសុំ និងលើកពីកង្វល់របស់ខ្លួនផងដែរ។ ហើយនាយករដ្ឋមន្រ្តីកម្ពុជា ដែលប្រសិទ្ធនាមថាជាបុរសខ្លាំង បានសម្រេចផ្តល់យោបល់ឱ្យមន្ត្រីក្រោមអំណាចចូលរួមការពារព្រៃឈើជាមួយសង្គមស៊ីវិល និងសកម្មជនបរិស្ថានផងដែរ។ ក្រៅពីនេះ ដើម្បីឱ្យកិច្ចការពារបរិស្ថានមានប្រសិទ្ធភាព លោកនាយករដ្ឋមន្ត្រីហ៊ុន សែន បានសម្រេចបង្កើតឱ្យមានវេទិការវាងរដ្ឋាភិបាល និងសកម្មជនបរិស្ថាន រួមទាំងអង្គការសង្គមស៊ីវិលជារៀងរាល់បីខែម្តង ដើម្បីស្តាប់បញ្ហាពិតប្រាកដជារបាយការណ៍កុហុក៥ឆ្នាំម្តង។ ប្រមុខរដ្ឋាភិបាលរូបនេះ បានទទួលស្គាល់ថា រដ្ឋាភិបាលរបស់លោកមានភាពចន្លោះប្រហោង និងខ្វះយន្តការទប់ស្កាត់ការកាប់បំផ្លាញព្រៃឈើ និងធនធានធម្មជាតិ។ បន្ថែមពីនេះ លោកនាយករដ្ឋមន្ត្រីបានសម្រេចផ្ទេរការគ្រប់គ្រងព្រៃឈើ និងជលផល ដែលជារដ្ឋបាលមួយដាច់ដោយឡែក ឱ្យស្ថិតនៅក្រោមមន្ទីកសិកម្ម ដែលស្ថិតនៅក្រោមអំណាចបញ្ជាផ្ទាល់បន្ថែមពីចៅហ្វាយខេត្តក្នុងការទប់ស្កាត់បទល្មើស។
លោកនាយករដ្ឋមន្ត្រី ក៏បានសម្រេចពង្រីកចំនួនឧទ្យានុរក្សចំនួន៣០០នាក់បន្ថែម សម្រាប់ឆ្នាំ២០១៧ផងដែរ។ សូមបញ្ជាក់បញ្ហាកាប់បំផ្លាញព្រៃឈើ និងធនធានធម្មជាតិ គឺជាបញ្ហារសើបបំផុតមួយក្នុងសង្គមកម្ពុជា ដែលបានអូសទម្លាក់ប្រជាប្រិយភាពរបស់រដ្ឋាភិបាល ដោយសារតែមានការកាប់ទន្ទ្រានឈើខុសច្បាប់ជាច្រើន។ រដ្ឋាភិបាលកម្ពុជា បានប្រកាសពង្រីកតំបន់អភិរក្សព្រៃបន្ថែមចំនួន ដែលមានបច្ចុប្បន្នប្រមាណជិត៦លានហិកតានៅទូទាំងប្រទេស។
រដ្ឋមន្ត្រីបរិស្ថាន លោក សាយ សំអាល់ បានលើកឡើងថា វេទិកាស្តីពីការការពារ និងអភិរក្សនេះ គឺឈរលើឆន្ទៈចង់ឃើញគ្រប់ភាគីពាក់ព័ន្ធដើរក្រោមដំបូលតែមួយ ដើម្បីការពារបរិស្ថានកម្ពុជាសម្រាប់ពលរដ្ឋគ្រប់ជំនាន់។ យ៉ាងណាក៏ដោយក្រោយការបញ្ចប់វេទិកាបរិស្ថានដ៏កម្រនេះ អ្នកចូលរួមទាំងអស់បានស្វាគមន៍ចំពោះរដ្ឋាភិបាលដើម្បីថែរក្សា និងការពារវិស័យបរិស្ថាននៅកម្ពុជា ដែលធ្លាប់រងការបំផ្លិចបំផ្លាញ និងមិនសូវអើពើរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ