លោកហ៊ុន សែន៖ រឿងផ្ទៀងផ្ទាត់ផែនទីចប់ហើយ
លោកនាយករដ្ឋមន្រ្តី ហ៊ុន សែន នៅព្រឹកថ្ងៃទី៤កញ្ញានេះ បានបង្ហាញការចាប់អារម្មណ៍ទៅលើលទ្ធផលនៃការផ្ទៀងផ្ទាត់ផែនទី រវាងផែនទីរដ្ឋាភិបាល និងផែនទីមកពីប្រទេសបារាំងចំនួន២៦ផ្ទាំងដែលបង្ហាញលទ្ធផលថា ដូចគ្នា។ បើតាមលោកនាយករដ្ឋមន្រ្តី ហ៊ុន សែន ការផ្ទៀងផ្ទាត់ផែនទីដទៃ មិនមែនជាការចាំបាច់ទៀតទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ការលើកឡើងរបស់លោកនាយករដ្ឋមន្រ្តី ហ៊ុន សែន បានធ្វើឡើងតែមួយថ្ងៃប៉ុណ្ណោះ ក្រោយពីគណៈកម្មការចំពោះកិច្ចដឹកនាំដោយលោកឧបនាយករដ្ឋមន្រ្តី ហោ ណាំហុង បានបញ្ចប់ការផ្ទៀងផ្ទាត់ផែនទីចំនួន២៦ផ្ទាំង ដែលបញ្ជូនមកពីរដ្ឋាភិបាលនៃសាធារណៈរដ្ឋបារាំង កាលពីថ្ងៃទី៣ខែកញ្ញា នៅឯវិមានសន្តិភាព។ ការផ្ទៀងផ្ទាត់ផែនទីមកពីប្រទេសបារាំងទាំង២៦ផ្ទាំងជាផែនទីផលិតដោយក្រុមភូមិសាស្រ្តឥណ្ឌូចិន និងផែនទីរបស់រដ្ឋាភិបាលដែលប្រើប្រាស់សម្រាប់ការបោះបង្គោលព្រំដែនបច្ចុប្បន្ន គឺបង្ហាញថា ដូចគ្នា។
អញ្ចឹងហើយ បានជានៅថ្ងៃសុក្រទី៤កញ្ញានេះ គឺនៅថ្ងៃដែលលោកនាយករដ្ឋមន្រ្តី ហ៊ុន សែន បានចូលរួមជាអធិបតីនៃកិច្ចប្រជុំគណៈរដ្ឋមន្រ្តី លោកបានធ្វើសេចក្តីសន្និដ្ឋានជារួមថា ការផ្ទៀងផ្ទាត់ផែនទីដទៃទៀត មិនមែនជាការចាំបាច់ទៀតទេ។
កន្លងទៅ រដ្ឋាភិបាលកម្ពុជា បានស្នើទៅប្រធានាធិបតីបារាំង នាយករដ្ឋមន្រ្តី អង់គ្លេស ប្រធានាធិបតីអាមេរិក និងប្រមុខអង្គការសហប្រជាជាតិ ដើម្បីសុំខ្ចីផែនទីកម្ពុជា ដែលតម្កល់នៅតាមបណ្តាប្រទេសខាងលើនេះ មកប្រៀបធៀបជាមួយនឹងផែនទីរបស់រដ្ឋាភិបាលប្រើប្រាស់សម្រាប់ការបោះបង្គោលព្រំដែនបច្ចុប្បន្ន។ ការផ្ទៀងផ្ទាត់ផែនទី គឺដើម្បីបង្ហាញថា តើផែនទីរបស់រដ្ឋាភិបាលប្រើប្រាស់ខ្នាត ១/១០០០០០ ត្រឹមត្រូវឬទេ។
លោកនាយករដ្ឋមន្រ្តីបានថ្លែងថា៖ «កិច្ចការងារនេះក៏ល្មមដល់ទីបញ្ចប់របស់យើងហើយ គឺមិនចាំបាច់មានការបន្ថែមយកមកពីអាមេរិក ឬអង់គ្លេសអ្វីទៀតទេ ប៉ុន្តែបើគេឲ្យមកគឺគ្រាន់តែជាការគួបផ្សំ ប៉ុន្តែអ្វីដែលសំខាន់គឺផែនទីបារាំងដែលប្រគល់ ទទួល និងបានផ្ទៀងផ្ទាត់កាលពីថ្ងៃម្សិលមិញនេះ»។ នេះបើយោងតាមខ្លឹមសាររបស់លោកនាយករដ្ឋមន្រ្តី ហ៊ុន សែន ដែលត្រូវបានទំលាយឲ្យដឹង នៅក្នុងកិច្ចប្រជុំគណៈរដ្ឋមន្រ្តី នៅថ្ងៃសុក្រទី៤កញ្ញានេះ។
នៅក្នុងកិច្ចប្រជុំគណៈរដ្ឋមន្រ្តីនៅថ្ងៃនេះ លោកនាយករដ្ឋមន្រ្តី ហ៊ុន សែន ក៏បានព្រមានចាត់វិធានការតាមផ្លូវច្បាប់ ចំពោះជនទាំងឡាយណា ដែលប្រើភាសាថា ផែនទីក្លែងក្លាយ ឬភាសាអ្វីតទៅទៀតទេ។ លោកនាយករដ្ឋមន្រ្តី ហ៊ុន សែន ថ្លែងថា រឿងផ្ទៀងផ្ទាត់ផែនទីចប់ហើយ ចំណែកឯការងារនីតិរដ្ឋត្រូវតែបន្តអនុវត្តដោយម៉ឺងម៉ាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ