អាជ្ញាធរវៀតណាមដោះលែងប្រធានអង្គការកុមាររបស់កម្ពុជានៅថ្ងៃនេះ
ប្រធានអង្គការកុមារ C-Rights ក្នុងខេត្តស្វាយរៀងត្រូវបានអាជ្ញាធរវៀតណាម ដោះលែងវិញ នៅថ្ងៃទី៥ ខែកក្កដានេះ។ នេះបើតាមលោក ឯម សុភាអ្នកចាត់ការទូទៅអង្គការ C-rights។ ជាការដោះលែង ក្រោយពីលោកត្រូវបានប្រជាពលរដ្ឋវៀតណាមចាប់ខ្លួនដោយអំពើហិង្សានៅឃុំត្នោតស្រុកកំពង់រោទិ៍ ខេត្តស្វាយរៀង ដោយចោទប្រកាន់ថារូបលោកបានចូលក្នុងតំបន់ព្រំដែនដោយគ្មានការអនុញ្ញាត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
ការដោះលែងលោក ផែន ប៊ុនធឿន ប្រធានអង្គការ C-Rights ជាអង្គការកុមារ ប្រចាំខេត្តស្វាយរៀង បានធ្វើឡើងនៅថ្ងៃនេះ ដោយមានការសហការជាមួយនឹងអាជ្ញាធរកម្ពុជា និងអាជ្ញាធរវៀតណាម។ នេះបើតាមការបញ្ជាក់របស់ លោក ឯម សុភា អ្នកចាត់ការទូទៅរបស់អង្គការ C-Rights។ លោកបានបន្ថែមថា ការចាប់ខ្លួន លោក ផែន ប៊ុនធឿន បានធ្វើឡើងនៅរសៀលម៉ោង ៤ ថ្ងៃទី៤ ខែកក្កដា ដោយប្រជាពលរដ្ឋវៀតណាមមួយក្រុម។
ការចាប់ខ្លួននោះត្រូវបានលោក ឯម សុភា ប្រាប់ឲ្យដឹងទៀតថា នៅថ្ងែនោះលោក ផែន ប៊ុនធឿន បានរៀបចំកម្មវិធីមួយសម្រាប់កុមារៗ ប្រមាណ៤០នាក់ ដែលចង់ស្គាល់ព្រំដែនកម្ពុជា ហើយលោកក៏បានដឹកនាំកុមារទាំងនោះ ទៅកាន់តំបន់ព្រំដែនក្នុងឃុំត្នោត ស្រុកកំពង់រោទិ៍ ដែលនៅមិនឆ្ងាយប៉ុន្មានពីការិយាល័យអង្គការ C-Rights ។
ក្រោយពីនាំកុមារដើរមិនទានដល់តំបន់ព្រំដែននោះផង លោកក៏ត្រូវបានចាប់ខ្លួន ដោយមានទាំងការប្រើអំពើហិង្សាមកលើរាងកាយរបស់លោកផងដែរ។ មិនយូរប៉ុន្មាន ក្រោយពីការចាប់ខ្លួនភ្លាមៗ លោកក៏ត្រូវបានអាជ្ញាធរវៀតណាមបញ្ជូនខ្លួនទៅកាន់ខេត្តឡុង អាន ប្រទេសវៀតណាម។ ចំណែកឯកុមារប្រមាណ៤០នាក់នោះមិនត្រូវបានប្រជាពលរដ្ឋវៀតណាមធ្វើបាបអ្វីនោះទេ ហើយពួកគេក៏បានត្រឡប់មកការិយាល័យអង្គការវិញដោយសុវត្ថិភាព។
សូមបញ្ជាក់ថាបង្គោលព្រំដែនស្ថិតក្នុងឃុំត្នោត ស្រុកកំពុងរោទិ៍ កាលពីថ្ងៃទី២៨ ខែមិថុនាកន្លងទៅ ធ្លាប់កើតអំពើហិង្សាម្តងរួចមកហើយរវាងភាគីកម្ពុជា និងវៀតណាម ដែលបានបណ្តាលឲ្យភាគីកម្ពុជាប្រមាណ១០នាក់រងរបួស និងភាគីវៀតណាមប្រមាណ៨នាក់រងរបួស។
មន្ត្រីនគរបាលព្រំដែនក្នុងស្រុកកំពង់រោទិ៍ ខេត្តស្វាយរៀងបានបញ្ជាក់ប្រាប់វិទ្យុបារាំងថា ខាងអាជ្ញាធរវៀតណាមបានបញ្ជូនខ្លួនលោក ផែន ប៊ុនធឿន មកក្នុងទឹកដីកម្ពុជាវិញនៅព្រឹកនេះ។ ហើយលោកបញ្ជាក់ថាការចាប់ខ្លួននេះ គឺភាគីវៀតណាមចោទប្រកាន់ លោក ផែន ប៊ុនធឿនថាបានចូលក្នុងតំបន់ព្រំដែនដោយគ្មានការអនុញ្ញាត។
ចំណែកឯលោក នុន បូពិនណារ័ត្ន ជាមន្ត្រីអង្គការលីកាដូប្រចាំខេត្តស្វាយរៀងបានបញ្ជាក់ថាការដោះលែងលោក ផែន ប៊ុនធឿន នេះគឺដោយសារតែមានការអន្តរាគមពីអាជ្ញាធរខេត្តស្វាយរៀង ទៅអាជ្ញាធរខេត្តឡុង អាន ប្រទេសវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ