ចាងហ្វាងកាសែតឌឹខេមបូឌា ដេលី ពីររូប ត្រូវបានហាមមិនឲ្យចេញពីប្រទេសកម្ពុជា
ចាងហ្វាងកាសែត ឌឹខេមបូឌា ដេលី ពីររូប នៅថ្ងៃទី ០៤ កញ្ញា នេះ ត្រូវបានអគ្គនាយកដ្ឋានពន្ធដារ ហាមមិនចេញពីប្រទេសកម្ពុជា ដរាបណា ពួកគេមិនបានបង់ពន្ធជាង ៦ លានដុល្លារអាមេរិក ជូនរដ្ឋ។ ការហាមនេះ ត្រូវបានធ្វើឡើង ក្រោយពេលចាងហ្វាងកាសែតឌឹខេមបូឌា ដេលី បានប្រកាសកាលពីថ្ងៃទី ០៣ កញ្ញា ថា ចាប់ពីថ្ងៃទី ០៤ កញ្ញា តទៅ កាសែតនេះ ឈប់បោះពុម្ពផ្សាយទៀតហើយ។
ចុះផ្សាយនៅថ្ងៃ៖
ស្តាប់ - ០១:៥១
អគ្គនាយកដ្ឋានពន្ធដារបានផ្ញើលិខិតមួយច្បាប់ទៅអគ្គនាយក នៃអគ្គនាយកដ្ឋានអន្ដោប្រវេសន៍ ដោយស្នើហាមមិនឲ្យអភិបាលសហគ្រាស លោកស្រី Deborath Krisher Steele និង អ្នកចាត់ការទូទៅ លោក Douglas Eric Steele របស់កាសែត ឌឹខេមបូឌា ដេលី ចេញពីប្រទេសកម្ពុជាឡើយ។ អគ្គនាយកដ្ឋានពន្ធដារបានបញ្ជាក់ថា ការទប់ស្កាត់ចំពោះការធ្វើដំណើររបស់អ្នកទាំងពីរ គឺដើម្បីជំរុញឲ្យពួកគេចូលខ្លួនមកទូទាត់បំណុលពន្ធជូនរដ្ឋ។
បើតាមអគ្គនាយកដ្ឋានពន្ធដារ នៅថ្ងៃទី ០៤ កញ្ញា ឆ្នាំ ២០១៧ នេះ គឺជាថ្ងៃផុតកំណត់នៃការតវ៉ា ដូច្នេះការកំណត់ពន្ធឡើងវិញនេះត្រូវចាប់ចូលជាបំណុលពន្ធ។ លិខិតដដែលនេះបន្ដថា កាសែត The Cambodia Daily អាចមានហានិភ័យក្នុងការប្រមូលចំណូល ក្រោយកាសែតបានបានប្រកាសបញ្ឈប់ការផ្សាយរបស់ខ្លួនកាលពីថ្ងៃទី ០៣ ខែកញ្ញា។ អគ្គនាយកដ្ឋានបញ្ជាក់ថា ដូច្នេះរដ្ឋបាលសារពើពន្ធ ត្រូវអនុវត្តវិធានការតឹងរឹង ទាបំណុលពន្ធ ស្របតាមមាត្រា ១១១ ដល់មាត្រា ១១៥ នៃច្បាប់ស្ដីពីសារពើពន្ធ។ អគ្គនាយកដ្ឋានពន្ធដារបានបញ្ជាក់ជាថ្មីថា កាសែតឌឹខេមបូឌា ដេលី ជំពាក់បំណុលពន្ធប្រមាណជាង ៦ លានដុល្លារ។
សូមបញ្ជាក់ថា កាសែតឌឹខេមបូឌា ដេលី បានប្រកាសកាលពីថ្ងៃទី ០៣ កញ្ញា ថា នឹងឈប់បោះពុម្ភផ្សាយ ចាប់ពីថ្ងៃទី ០៤ កញ្ញា នេះតទៅ។ ហើយនៅថ្ងៃទី ០៤ កញ្ញា នេះ ការិយាល័យរបស់កាសែតនេះ ពិតជាមានការបិទដូចការប្រកាសរបស់ខ្លួនមែន។
នៅថ្ងៃទី ០៤ កញ្ញា នេះដែរ ក្លឹបអ្នកកាសែតកម្ពុជាបានចេញសេចក្ដីប្រកាសព័ត៌មាន ដោយសម្ដែងការសោកស្ដាយចំពោះការបញ្ឈប់ដំណើរការនេះ។ ក្លឹបអ្នកកាសែតកម្ពុជា ក៏អំពាវនាវដល់ម្ចាស់កាសែត ខេមបូឌាដេលី គួររកវិធីសម្របសម្រួលជាមួយអគ្គនាយកដ្ឋានពន្ធដារដើម្បីរកដំណោះស្រាយសមស្របមួយដែលអាច អនុញ្ញាតឲ្យកាសែតនេះដំណើរការឡើងវិញបាន។ ក្លឹបអ្នកកាសែតកម្ពុជាបញ្ជាក់ថា ការប្រកាសបិទទ្វារដោយខ្លួនឯង របស់កាសែតខេមបូឌាដេលី ជាការបាត់បង់ប្រភពព័ត៌មានមួយសម្រាប់អ្នកអានរបស់ខ្លួន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ