ពិធីគោរពព្រះវិញ្ញាណក្ខន្ធសម្ដេចព្រះ នរោត្តម សីហនុ នៅឆ្នាំនេះ ស្ងប់ស្ងាត់ជាងឆ្នាំមុនៗ
ពិធីគោរពព្រះវិញ្ញាណក្ខន្ធសម្ដេចព្រះបាទ នរោត្តម សីហនុ គម្រប់ខួប៣ឆ្នាំ នៅឆ្នាំនេះ ត្រូវបានប្រារព្ធធ្វើឡើងដូចរៀងរាល់ឆ្នាំដែរ។ ស្ថាប័នជាតិ រួមទាំងថ្នាក់ដឹកនាំកំពូលៗ ព្រឹទ្ធសភា រដ្ឋសភា និងរដ្ឋាភិបាល គ្រប់ក្រសួងមន្ទីរ បានដាក់វេនគ្នា ដើម្បីគោរពព្រះវិញ្ញាណក្ខន្ធ ព្រះបរមរតនកោដ្ឋ នៅវិមានតម្កល់ព្រះបរមរូប ខាងកើតវិមានឯករាជ្យ នៅព្រឹកថ្ងៃទី១៥ខែតុលា។ បើទោះបីជាមានរៀបចំឡើងដូចរាល់ឆ្នាំក៏ពិតមែន ក៏ប៉ុន្តែពិធីគោរពព្រះវិញ្ញាណក្ខន្ធសម្ដេចព្រះ នរោត្តម សីហនុ នៅឆ្នាំនេះត្រូវគេកត់សម្គាល់ឃើញថា មានបរិយាកាសស្ងប់ស្ងាត់ជាងឆ្នាំមុនៗ។
ចុះផ្សាយនៅថ្ងៃ៖
ស្តាប់ - ០២:១០
ចាប់តាំងពីព្រឹកព្រលឹម ថ្ងៃព្រហស្បតិ៍ទី១៥តុលានេះ ថ្នាក់ដឹកនាំកំពូលៗ ព្រឹទ្ធសភា រដ្ឋសភា និងរដ្ឋាភិបាល គ្រប់ក្រសួងមន្ទីរ បានដាក់វេនគ្នា ដើម្បីគោរពព្រះវិញ្ញាណក្ខន្ធ ព្រះបរមរតនកោដ្ឋ នៅវិមានតម្កល់ព្រះបរមរូប ខាងកើតវិមានឯករាជ្យ។ ដោយអវត្តមានលោកនាយករដ្ឋមន្ដ្រីហ៊ុន សែន លោក ស ខេង នាយករដ្ឋមន្ដ្រីស្ដីទី បានដឹកនាំគណៈប្រតិភូរដ្ឋាភិបាល ដាក់កម្រងផ្កា គោរពព្រះវិញ្ញាណក្ខន្ធព្រះករុណា នៅវិមានតម្កល់ព្រះបរមរូប។
ក្រៅពីពិធីនៅវិមានតម្កល់ព្រះបរមរូប ខាងកើតវិមានឯករាជ្យ ពិធីគោរពព្រះវិញ្ញាណក្ខន្ធព្រះករុណា សម្ដេចព្រះបាទនរោត្តម សីហនុ ក៏មានប្រារព្ធធ្វើផងដែរ នៅព្រះបរមរាជវាំង នៅថ្ងៃទី១៥តុលានេះ។ ជាពិធីបែបសាសនាផ្លូវការ ដោយមានការនិមន្តព្រះសង្ឃបង្សុកូលឧទ្ទិសកុសលថ្វាយដល់ព្រះវិញ្ញាណក្ខន្ធព្រះបរមរតនកោដ្ឋ។ ថ្នាក់ដឹកនាំស្ថាប័នកំពូលៗពីព្រឹទ្ធសភា រដ្ឋសភា និងរដ្ឋាភិបាល ត្រូវបានអញ្ជើញឲ្យចូលរួមនៅក្នុងពិធីសាសនាផ្លូវការនៅក្នុងព្រះបរមរាជវាំង រួមជាមួយព្រះរាជវង្សានុវង្សផងដែរ។
ដោយឡែក គណបក្សប្រឆាំងធំជាងគេនៅកម្ពុជា គឺគណបក្សសង្គ្រោះជាតិ បានប្រារព្ធពិធីរំលឹកព្រះវិញ្ញាណក្ខន្ធនេះដែរ នៅទីស្នាក់ការគណបក្ស ដោយមានការអញ្ជើញចូលរួមពីមន្ដ្រីជាន់ខ្ពស់របស់ខ្លួនជាច្រើនរូប។ លោក កឹម សុខា ប្រធានស្ដីទីគណបក្សសង្គ្រោះជាតិ បានឆ្លៀតក្នុងឱកាសនោះ រំលឹកពីស្នាព្រះហស្តរបស់ព្រះករុណា ព្រះបាទនរោត្តម សីហនុ ក្នុងការការពារ និងដឹកនាំប្រទេសកម្ពុជានាពេលកន្លងមកផងដែរ។
បើទោះបីជាមានរៀបចំឡើងដូចរាល់ឆ្នាំក៏ពិតមែន ក៏ប៉ុន្តែពិធីគោរពព្រះវិញ្ញាណក្ខន្ធសម្ដេចព្រះ នរោត្តម សីហនុ នៅឆ្នាំនេះត្រូវគេកត់សម្គាល់ឃើញថា មានបរិយាកាសស្ងប់ស្ងាត់ជាងឆ្នាំមុនៗ និងគ្មានការផ្សាយបន្តផ្ទាល់តាមទូរទស្សន៍និងវិទ្យុទេ។ គួររំលឹកថា កាលពីឆ្នាំកន្លងទៅ ពិធីគោរពព្រះវិញ្ញាណក្ខន្ធព្រះករុណា សម្ដេចព្រះ នរោត្តម សីហនុ ត្រូវបានរៀបចំឡើងយ៉ាងអធឹកអធម។ ក្រៅពីពិធីនៅវិមានតម្កល់ព្រះបរមរូបខាងកើតវិមានឯករាជ្យ និងពិធីសាសនានៅព្រះបរមរាជវាំង ក៏មានផងដែរពិធីរាប់បាត្រព្រះសង្ឃរាប់រយអង្គនៅមុខព្រះបរមរាជវាំង ដោយមានការចូលរួមពីប្រជាពលរដ្ឋ និងមន្ដ្រីរាជការយ៉ាងច្រើនកុះករ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ