តំណាងកម្ពុជានៅ អសប ច្រានចោលការរិះគន់របស់សហគមន៍អឺរ៉ុបចំពោះស្ថានការណ៍នយោបាយកម្ពុជា
ឯកអគ្គរាជទូតតំណាងអចិន្រ្តៃយ៍កម្ពុជាប្រចាំអង្គការសហប្រជាជាតិ កាលពីម្សិលមិញ បានប្រតិកម្មទៅនឹងសេចក្តីថ្លែងការណ៍របស់ប្រទេសប៊ុលហ្គារី តំណាងឱ្យសហគមន៍អឺរ៉ុប នៅក្នុងសម័យប្រជុំលើកទី៣៨ នៃក្រុមប្រឹក្សាសិទ្ធិមនុស្ស។ ជាសេចក្ដីថ្លែងការណ៍ រិះគន់ពីស្ថានការណ៍នយោបាយនៅកម្ពុជា។ គណៈប្រតិភូតំណាងអចិន្រ្តៃយ៍កម្ពុជាប្រចាំអង្គការសហប្រជាជាតិ ចាត់ទុកសេចក្តីថ្លែងការណ៍នេះ ថាធ្វើទ្បើងដោយមិនសមហេតុផល មិនត្រឹមត្រូវ និងជ្រៀតជ្រែកចូលទៅក្នុងកិច្ចការផ្ទៃក្នុង របស់ប្រទេសកម្ពុជា។
ចុះផ្សាយនៅថ្ងៃ៖
ស្តាប់ - ០២:២៣
នៅក្នុងសេចក្ដីថ្លែងការណ៍របស់ប្រទេសប៊ុលហ្គារី តំណាងឱ្យសហគមន៍អឺរ៉ុប និងប្រទេសគាំទ្រមួយចំនួនរបស់ខ្លួន នៅក្នុងសម័យប្រជុំលើកទី៣៨ នៃក្រុមប្រឹក្សាសិទ្ធិមនុស្ស ប្រទេសប៊ុលហ្គារីបានជម្រុញរាជរដ្ឋាភិបាលកម្ពុជា ធ្វើយ៉ាងណាឱ្យអតីតគណបក្សសង្រ្គោះជាតិរស់ឡើងវិញ និងដោះលែង លោក កឹម សុខា អតីតប្រធានគណបក្សនេះឱ្យមានសេរីភាពឡើងវិញ។
ប្រទេសប៊ុលហ្គារី តំណាងឱ្យសហគមន៍អឺរ៉ុប និងប្រទេសគាំទ្រមួយចំនួនរបស់ខ្លួន នៅក្នុងសម័យប្រជុំលើកទី៣៨ នៃក្រុមប្រឹក្សាសិទ្ធិមនុស្ស កាលពីពាក់កណ្តាលខែមិថុនានេះ បានរិះគន់ និងបដិសេធមិនទទួលយកលទ្ធផលបោះឆ្នោតជ្រើសរើសតំណាងរាស្រ្ត នៅខែកក្កដា ខាងមុខនេះ បើគ្មានវត្តមានអតីតគណបក្សសង្រ្គោះជាតិ ។
ឆ្លើយតបនឹងការលើកឡើងដូច្នេះ ឯកអគ្គរាជទូតតំណាងអចិន្រ្តៃយ៍កម្ពុជាប្រចាំមន្ទីរអង្គការសហប្រជាជាតិ លោក ណី សំអុល បានអះអាងថា ការរំលាយអតីតគណបក្សសង្រ្គោះជាតិ និងការឃុំខ្លួនមេដឹកនាំបក្សនេះគឺជាការអនុវត្តច្បាប់ និងពង្រឹងនីតិរដ្ឋ ហើយរាជរដ្ឋាភិបាល មិនមានតួនាទីនៅក្នុងការអន្តរាគមន៍ពាក់ព័ន្ធនឹងសេចក្តីសម្រេចរបស់តុលាការឡើយ។ និងថា រឿងនេះក៏មិនជាប់ពាក់ព័ន្ធអ្វីទៅនឹងការបោះឆ្នោតខាងមុខនេះដែរ។
សេចក្តីថ្លែងការណ៍ដែលមានកម្រាស់បីទំព័ររបស់តំណាងអចិន្រ្តៃយ៍កម្ពុជាដដែល ចាត់ទុកសេចក្តីថ្លែងការណ៍របស់ប្រទេសប៊ុលហ្គារី ថាធ្វើទ្បើងដោយមិនសមហេតុផល មិនត្រឹមត្រូវ និងជ្រៀតជ្រែកចូលទៅក្នុងកិច្ចការផ្ទៃក្នុងរបស់ប្រទេសកម្ពុជា ជាពិសេសគឺរំលោភគោលការណ៍ក្រុមប្រឹក្សា និងធម្មនុញ្ញរបស់ក្រុមប្រឹក្សាសន្តិសុខអង្គការសហប្រជាជាតិ និងបន្ទាបតម្លៃអធិបតេយ្យភាពកម្ពុជា។
តំណាងអចិន្រ្តៃយ៍កម្ពុជាប្រចាំអង្គការសហប្រជាជាតិ បានហៅការរិះគន់កម្ពុជា ពីសំណាក់សហគមន៍អឺរ៉ុប គឺជាការធ្វើឡើងដែលមានរបៀបវារៈលាក់បាំងសមិទ្ធផលដែលរាជរដ្ឋាភិបាលកម្ពុជាបច្ចុប្បន្នសម្រេចបាន និងមានបំណងបន្ទច់បង្អាក់គណបក្សកាន់អំណាច។
គួរជម្រាបជូនថា ក្រៅពីប្រទេសប៊ុលការី ប្រទេសនូវែលសេឡង់ កាលពីសប្តាហ៍មុន ក៏ទើបចេញសេចក្តីថ្លែងការណ៍រួមអំពីស្ថានភាពសិទ្ធិមនុស្សនៅកម្ពុជា នៅក្នុងកិច្ចប្រជុំក្រុមប្រឹក្សាសិទ្ធិមនុស្សលើកទី៣៨នៅក្នុងទីក្រុងហ្សឺណែវប្រទេសស្វីសផងដែរ។ សេចក្តីថ្លែងការណ៍ដែលមានកម្រាស់ពីរទំព័រ បានបរិយាយពីបញ្ហាសិទ្ធិមនុស្ស និងការបោះឆ្នោតនៅកម្ពុជា។ ក្នុងនោះប្រទេសនូវែលសេឡង់ បានអំពាវនាវដល់សហគមន៍អន្តរជាតិឱ្យបន្តយកចិត្តទុកដាក់និងឃ្លាំមើលស្ថានភាពបោះឆ្នោតនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ