មន្រ្តីអតីតបក្សប្រឆាំង គ្រោងដាក់ញត្តិទៅការិយាល័យសិទ្ធិមនុស្ស អសប
មន្រ្តីអតីតគណបក្សសង្គ្រោះជាតិ ដែលកំពុងរស់នៅក្នុងស្រុក គ្រោងប្រមូលស្នាមដៃអតីតសមាជិកក្រុមប្រឹក្សាឃុំសង្កាត់ នៃគណបក្សសង្គ្រោះជាតិ ដាក់ទៅការិយាតំណាងអង្គការសហប្រជាជាតិប្រចាំនៅកម្ពុជា។ គម្រោងនេះ ធ្វើឡើងបន្ទាប់ពីពួកគេគ្មានសង្ឃឹមថា ព្រះបរមរាជវាំងនឹងឆ្លើយតបចំពោះលិខិតសុំព្រះរាជអន្តរាគមន៍ពីព្រះមហាក្សត្រ ដែលពួកគេដាក់ទៅកាលពីមុនចូលឆ្នាំខ្មែរ។ ជាលិខិតដែលទូលសុំព្រះមហាក្សត្រ ធ្វើព្រះរាជអន្តរាគមន៍ឲ្យអតីតមន្ត្រីគណបក្សសង្គ្រោះជាតិ១១៨រូបមានសិទ្ធិធ្វើនយោបាយឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
លោក អ៊ូ ច័ន្ទរ័ត្ន មន្ត្រីអតីតអ្នកតំណាងរាស្ត្រគណបក្សសង្គ្រោះជាតិ បានអះអាងប្រាប់វិទ្យុបារាំងនៅថ្ងៃអាទិត្យនេះថា ការណ៍ដែលលោកនិងសហការី ងាកទៅរកដំណោះស្រាយពីក្រៅមកវិញ ក៏ដោយសារតែការប្រើប្រាស់យន្តការក្នុងស្រុកគ្មានដំណោះស្រាយ និងទំនងជាគ្មានការឆ្លើយតប។ ជាក់ស្ដែងព្រះបរមរាជវាំងដែលជាស្ថាប័នចុងក្រោយ នៅតែមិនទាន់ឆ្លើយតបចំពោះលិខិតរបស់មន្ដ្រីអតីតបក្សប្រឆាំង ដែលដាក់ទៅកាន់ព្រះបរមរាជវាំងតាំងពីមុនចូលឆ្នាំខ្មែរ។ ជាលិខិតស្នើសុំព្រះរាជអន្តរាគមន៍ពីព្រះមហាក្សត្រ ឲ្យទម្លាក់ចោលបម្រាមធ្វើនយោបាយលើអតីតមន្ត្រី១១៨រូបរបស់អតីតគណបក្សប្រឆាំង។
មិនបានទទួលការឆ្លើយតបក៏ពិតមែន តែ លោក អ៊ូ ច័ន្ទរ័ត្ន បញ្ជាក់ថា ព្រះបរមរាជវាំង បានបញ្ជូនលិខិតនោះទៅដល់ព្រះហត្តព្រះមហាក្សត្រ និងបញ្ជូនបន្តទៅកាន់រដ្ឋាភិបាលហើយ។ ប៉ុន្តែអ្វីដែលលោករង់ចាំនៅពេលនេះ គឺចម្លើយមួយ ថាតើលិខិតនោះត្រូវបានច្រានចោល ឬទទួលស្គាល់យកទៅពិចារណាតែប៉ុនណោះ។ នេះបើតាមលោក អ៊ូ ច័ន្ទរ័ត្ន។
គួរជម្រាបជូនថា ដោយចង់បានសិទ្ធិត្រឡប់ចូលឆាកនយោបាយវិញ មន្ដ្រីអតីតគណបក្សសង្គ្រោះជាតិនៅក្នុងស្រុក បានព្យាយាមប្រើប្រាស់គ្រប់មធ្យោបាយ រាប់ចាប់តាំងពីការស្នើសុំទៅកាន់តុលាការកំពូល ឡើងទៅដល់ព្រះបរមរាជវាំង។ ប៉ុន្តែសំណើនោះ មិនទទួលបានការឆ្លើយតបជាវិជ្ជមានទេ។ ខណៈយន្តការក្នុងស្រុកមិនទទួលជោគជ័យ លោក អ៊ូ ច័ន្ទរ័ត្ន សង្ឃឹមថា ស្ថាប័នអន្តរជាតិតាមរយៈការិយាល័យសិទ្ធិមនុស្សនៃអង្គការសហប្រជាជាតិប្រចាំកម្ពុជា អាចជួយពួកគេបាន ដោយសារតែការដាក់បម្រាមបិទសិទ្ធិធ្វើនយោបាយ គឺស្មើនឹងការរំលោភសិទ្ធិធ្វើយោបាយនិយាយដោយឡែក និងជាការរំលោភសិទ្ធិមនុស្សតែម្ដង និយាយជារួម។
សូមបញ្ជាក់ថា អតីតមន្រ្តីគណបក្សសង្គ្រោះជាតិបានសិទ្ធិធ្វើនយោបាយចាប់តាំងពីការរំលាយគណបក្សសង្គ្រោះជាតិ កាលពីថ្ងៃទី១៦ខែវិច្ឆិកាឆ្នាំ២០១៧។ ភ្លាមៗក្រោយបាត់សិទ្ធិធ្វើនយោបាយ និងរំលាយបក្សអតីតមន្រ្តីនៃគណបក្សនេះ បានស្វែងរកអន្តរាគមន៍នានា តាំងពីនោះរហូតមកដល់ដោយរាប់តាំងពីអន្តរាគមន៍ក្នុងស្រុកនិងក្រៅស្រុកប៉ុន្តែនៅគ្មានដំណោះស្រាយសម្រាប់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ