កម្ពុជា ពង្រឹងប្រព័ន្ធការពារជំងឺ MERS បន្ថែម ខណៈថៃ មានរកឃើញមេរោគនេះ
ទោះបីជាកម្ពុជា មិនទាន់រកឃើញមានមេរោគផ្លូវដង្ហើមមជ្ឈិមបូព៌ា ឬ មើស នៅក្នុងប្រទេសក៏ដោយ ប៉ុន្តែក្រសួងសុខាភិបាល បានរៀបចំវិធានការណ៍បន្ថែមរួចជាស្រេច ដើម្បីបង្ការកុំឲ្យមានការរីករាលដាលមេរោគនេះ ចូលក្នុងប្រទេស។ សកម្មភាពបំពាក់ឧបករណ៍ពិនិត្យអ្នកទេសចរ ត្រូវបានធ្វើឡើងជាបន្តបន្ទាប់ នៅតាមព្រលានយន្តហោះអន្តរជាតិ ទាំងក្នុងទីក្រុងភ្នំពេញ និងខេត្តសៀមរាប និងនៅតាមច្រកព្រំដែន។ គិតមកដល់ថ្ងៃទី ២០មិថុនានេះ មេរោគមើស បានសម្លាប់មនុស្ស ២៤នាក់ នៅក្នុងប្រទេសកូរ៉េខាងត្បូង និងមានអ្នកឆ្លង ១៦៦នាក់។ ប្រទេសថៃ ទើបបានប្រកាសក្នុងសប្តាហ៍នេះថា បានរកឃើញមេរោគនេះពីអ្នកទេសចរ សញ្ជាតិអូម៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
ក្រសួងសុខាភិបាល បានបញ្ជាក់ពី សកម្មភាពចាត់វិធានការណ៍ទប់ស្កាត់មេរោគមជ្ឈិមបូព៌ា ឬហៅថា មើស ជាបន្តបន្ទាប់នៅលើគេហទំព័ររបស់ខ្លួន បន្ទាប់ពីទទួលបានដំណឹងថាប្រទេសថៃ បានរកឃើញមេរោគនេះ ពីបុរសសញ្ជាតិអូម៉ង់ វ័យ ៧៥ឆ្នាំម្នាក់។ សកម្មភាពទាំងនោះ រួមមានការបំពាក់ម៉ាស៊ីនស្កេន និងឧបករណ៍ពិនិត្យរកសញ្ញានៃមេរោគមើស នៅតាមព្រលានយន្តហោះអន្តរជាតិ ក្នុងទីក្រុងភ្នំពេញ និងខេត្តសៀមរាប និងនៅតាមច្រកព្រំដែន។
ក្រៅពីនោះ ក្រសួងសុខាភិបាល ក៏មានវិធានការណ៍បង្ការ និងឆ្លើយតបរួចជាស្រេច ដោយរួមមានការតាមដានសុខភាពអ្នកដំណើរ ដែលមកពីក្រៅប្រទេស ជាពិសេសមកពីប្រទេសកូរ៉េខាងត្បូង និងមជ្ឈិមបូព៌ា។ ត្រៀមមន្ទីរពិសោធន៍សំរាប់រកអត្តសញ្ញាណមេរោគលើករណីអ្នកជំងឺសង្ស័យ។ ត្រៀមមន្ទីរពេទ្យព្យាបាល និងដាក់អ្នកជំងឺដោយឡែក។ ហើយក្រសួង បានបើកទូរស័ព្ទទាន់ហេតុការណ៍ លេខ ១១៥ សម្រាប់ករណីសង្ស័យពីមេរោគមើសនេះ។
ក្នុងនោះ ក្រសួងសុខាភិបាលកម្ពុជា បានសំណូមពរឲ្យប្រជាជន ត្រូវតែការពារខ្លួនឲ្យបានល្អ ដើម្បីកុំឲ្យឆ្លងមេរោគនេះ។ ពលរដ្ឋ ត្រូវលាងសម្អាតដៃឲ្យបានញឹកញាប់ជាមួយសាប៊ូ និងទឹក ជាពិសេសបន្ទាប់ពីប៉ះពាល់ដោយផ្ទាល់ជាមួយអ្នកជំងឺ ឬបរិស្ថានជុំវិញអ្នកជំងឺ។ ជៀសវាងការប៉ះពាល់ជិតស្និទ្ធជាមួយកសិដ្ឋាន ឬសត្វរស់ ជាដើម។ ហើយសម្រាប់អ្នកមានរោគសញ្ញាដូចជា គ្រុនក្តៅ ក្អក និងពិបាកដកដង្ហើម ត្រូវតែទៅជួបគ្រូពេទ្យភ្លាម។
គួរជម្រាបជូនថា ជំងឺផ្លូវដង្ហើមមជ្ឈិមបូព៌ា (មើស) បង្កដោយវីរុសឈ្មោះ កូរ៉ូណាវីរុស។ ជំងឺនេះ មានលក្ខណៈស្រដៀងនឹងជំងឺ SARS និងត្រូវបានរកឃើញដំបូង នៅក្នុងប្រទេសអារ៉ាប់ប៊ីសាអូឌីត នៅឆ្នាំ២០១២។ ហើយនៅថ្ងៃទី ២០ឧសភា ឆ្នាំ ២០១៥កន្លងទៅនេះ ប្រទេសកូរ៉េខាងត្បូង បានបញ្ជាក់ពីការផ្ទុះឡើងនៃជំងឺនេះ នៅក្នុងប្រទេស។ ខណៈក្នុងសប្តាហ៍នេះ នៅប្រទេសថៃ ក្បែរខាងកម្ពុជា ក៏បានបញ្ជាក់ពីវត្តមានរបស់មេរោគមើសនេះ ក្នុងប្រទេសរបស់ខ្លួនផងដែរ។ តាមរដ្ឋមន្ត្រីក្រសួងសុខាភិបាលថៃ អ្នកមានផ្ទុកមេរោគមើសនោះ មិនមែនជាជនជាតិថៃទេ តែជាបុរសជនជាតិអូម៉ង់ មានអាយុ ៧៥ឆ្នាំដែលបានមកដល់ទឹកដីថៃ កាលពីថ្ងៃទី១៥ មិថុនា ដើម្បីព្យាបាលជំងឺបេះដូងនៅក្នុងមន្ទីរពេទ្យដ៏ធំមួយស្ថិត ក្នុងទីក្រុងបាងកក។ ប៉ុន្តែស្ថានភាពរបស់បុរសនោះ បានធូរស្បើយហើយ នៅពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ