មន្រ្តីក្រសួងសុខាភិបាលថាកម្ពុជាមិនទាន់មានករណីឆ្លងជំងឺ MERS ទេ
ជំងឺផ្លូវដង្ហើមមជ្ឈឹមបូព៌ា កំពុងតែរីករាលដាលគួរឲ្យបារម្ភនៅតំបន់អាស៊ី។ នៅកូរ៉េខាងត្បូង អ្នកជំងឺ MERS ២នាក់បានស្លាប់ និង២៣នាក់ទៀតកំពុងតែសម្រាកព្យាបាលនៅមន្ទីរពេទ្យ។ ដោយឡែក ចំពោះប្រទេសកម្ពុជា នៅមិនទាន់មានករណីឆ្លងជំងឺ MERS នេះទេ។ ប៉ុន្តែយ៉ាងណាក៏ដោយ មន្ដ្រីជំនាញសុខាភិបាលបានអំពាវនាវដល់ប្រជាពលរដ្ឋទាំងអស់ ឲ្យមានការប្រុងប្រយ័ត្នខ្ពស់ ដើម្បីចៀសឲ្យផុតពីជំងឺផ្លូវដង្ហើមនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
កម្ពុជាមិនទាន់មានករណីឆ្លងជំងឺផ្លូវដង្ហើមមជ្ឈឹមបូព៌ា MERS នៅឡើយទេ។ នេះគឺជាការអះអាងរបស់លោកវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាលកម្ពុជា។ បើតាមលោកវេជ្ជបណ្ឌិត លី សូវ៉ាន់ ក្រសួងសុខាភិបាលកំពុងតែតាមដានជំងឺនេះយ៉ាងយកចិត្តទុកដាក់ទាំងនៅក្នុងប្រទេស ក្នុងតំបន់ និងក្នុងសកលលោក។ ក្រៅពីនេះ បើតាមលោកវេជ្ជបណ្ឌិត ក្រសួងសុខាភិបាលក៏បានត្រៀមខ្លួនរួចរាល់អស់ហើយដែរ ដើម្បីឆ្លើយតបទៅនឹងការឆ្លងរាតត្បាតជំងឺ MERS មកកម្ពុជា។ ក្នុងនោះ មណ្ឌលនិងឧបករណ៍ស្រាវជ្រាវជំងឺ MERS ត្រូវបានរៀបចំនៅអាកាសយាន្តដ្ឋានភ្នំពេញ និងសៀមរាប។ បន្ថែមពីលើនោះ ក្រសួងសុខាភិបាលកម្ពុជាក៏បានរៀបចំមន្ទីរពិសោធន៍ និងក្រុមឆ្លើយតបបន្ទាន់ រួចស្រេចហើយដែរ។
គួរជម្រាបជូនថា ការបញ្ជាក់របស់លោកវេជ្ជបណ្ឌិតដូច្នេះ ធ្វើឡើងខណៈដែលជំងឺផ្លូវដង្ហើមមជ្ឈឹមបូព៌ា កំពុងតែរីករាលដាលយ៉ាងគួរឲ្យព្រួយបារម្ភនៅប្រទេសក្នុងឧបទ្វីបមជ្ឈឹមបូព៌ា និងនៅប្រទេសចិន ព្រមទាំងប្រទេសកូរ៉េខាងត្បូង។
ជំងឺផ្លូវដង្ហើមមជ្ឈឹមបូព៌ាកូរ៉ូណាវីរុស ហៅកាត់ថា MERS មានលក្ខណៈស្រដៀងនឹងជំងឺ SARS និងមានប្រភពមកពីតំបន់មជ្ឈឹមបូព៌ា នៅឆ្នាំ២០១២។ កូរ៉ូណាវីរុស ត្រូវបានគេរកឃើញថា មាននៅលើសត្វប្រចៀវ និងសត្វអូដ្ឋ។
ជំងឺផ្លូវដង្ហើមមជ្ឈឹមបូព៌ា MERS មានរោគសញ្ញាដូចជា គ្រុនក្ដៅ ក្អក ពិបាកដកដង្ហើម រងារញាក់ និងឈឺបំពង់ក ជាដើម។ ដោយសារតែជំងឺនេះ មានរោគសញ្ញាស្រដៀងទៅនឹងជំងឺផ្ដាសាយធម្មតា លោកវេជ្ជបណ្ឌិត លី សូវ៉ាន់ បានសំណូមពរឲ្យប្រជាពលរដ្ឋទាំងអស់ ប្រុងប្រយ័ត្ន និងប្រញាប់ទៅមន្ទីរពេទ្យជាបន្ទាន់ ប្រសិនបើមានរោគសញ្ញាអស់ទាំងនេះ។ ហើយដើម្បីបង្កាជំងឺនេះ លោកវេជ្ជបណ្ឌិតផ្ដល់ជាអនុសាសន៍ថា សាធារណជនទូទៅ ត្រូវសម្អាតដៃឲ្យបានញឹកញាប់ ត្រូវខ្ទប់មាត់ឬពាក់ម៉ាស នៅពេលក្អកឬកណ្ដាស់។ ផលិតផលសាច់និងស៊ុត ត្រូវចម្អិនឲ្យឆ្អិនល្អ និងមិនត្រូវបរិភោគសត្វឈឺឬងាប់ដោយសារជំងឺ។ ចំណែកអ្នកដែលធ្វើដំណើរទៅតំបន់មជ្ឈឹមបូព៌ា ឬប្រទេសដែលមានជំងឺ MERS រាតត្បាត ចាំបាច់ត្រូវប្រកាន់ស្មារតីប្រុងប្រយ័ត្នខ្ពស់ ពិសេសជៀសវាងប៉ះពាល់ជាមួយអ្នកជំងឺផ្លូវដង្ហើម សត្វឈឺ ឬ សត្វអូដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ