កម្ពុជាកំពុងតែរងចាំទទួលផែនទីពីបារាំងក្នុងពេលឆាប់ៗនេះ
ក្រោយពីធ្វើការផ្ទៀងផ្ទាត់ផែនទី ពីអង្គការសហប្រជាជាតិ កាលពីថ្ងៃទី២០ សីហា មក កម្ពុជាកំពុងតែបន្តរងចាំផែនទី ពីភាគីពាក់ព័ន្ធផ្សេងៗទៀត ជាពិសេស គឺភាគីប្រទេសបារាំង។ លោក ឡុង វិសាឡូ រដ្ឋលេខាធិការក្រសួងការបរទសកម្ពុជា បានបញ្ជាក់ថាផែនទី ដែលបញ្ជូនមកពីប្រទេសបារាំងអាចនឹងមកដល់ប្រទេសកម្ពុជាក្នុងពេលឆាប់ៗខាងមុខនេះ។ ដូចគ្នានេះដែរ ភាគីគណបក្សប្រឆាំង ក៏កំពុងតែទន្ទឹងរងចាំនូវការមកដល់នៃផែនទីពីប្រទេសបារាំងផងដែរ។
ចុះផ្សាយនៅថ្ងៃ៖
ស្តាប់ - ០២:០៤
លោក ឡុង វីសាឡូរដ្ឋលេខាធិការក្រសួងការបរទសបានបញ្ជាក់ថា ផែនទីពីប្រទសបារាំង អាចនឹងមកដល់ប្រទេសកម្ពុជាក្នុងពេលឆាប់ៗ ខាងមុននេះ។ ហើយរដ្ឋាភិបាលកម្ពុជានឹងធ្វើការផ្ទៀងផ្ទាត់បញ្ជាក់ នូវផែនទីនោះ ដើម្បីបង្ហាញឲ្យកាន់តែច្បាស់នូវភាពត្រឹមត្រូវ ចំពោះផែនទី ដែលរដ្ឋាភិបាលកំពុងប្រើបច្ចុប្បន្ននេះ។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបញ្ជាក់បន្ថែមថា ចំពោះការផ្ទៀតផ្ទាត់ ផែនទីពីបណ្តាលភាគីដទៃទៀត គឺគ្រាន់តែជាតែជាការយកមកផ្ទៀងផ្ទាត់ ថាតើវាខុសគ្នាប៉ុណ្ណាទេ។ ប៉ុន្តែផែនទីជាផ្លូវការ ឬផែនទីស្របច្បាប់ គឺជាផែនទី ដែលបានផ្ទៀងផ្ទាត់នៅពេលនេះ ពោលគឺជាផែនទី ដែលបានដំកល់ នៅអង្គការសហប្រជាជាតិ។ ចំពោះបញ្ហានៃការកើនឡើងកម្តៅរឿងផែនទី ក្នុងប្រទេសកម្ពុជា ដែលកើតឡើងរវាងគណបក្សប្រឆាំង និងរដ្ឋាភិបាលកម្ពុជា គឺបានបញ្ចប់ចាប់តាំងពីពេល ដែលមានការផ្ទៀងផ្ទាត់ផែនទី ដែលព្រះករុណាព្រះបាទនរោត្តមសីហនុ បានដាក់នៅអង្គការសហប្រជាជាតិក្នុងឆ្នាំ១៩៦៤។ នេះបើតាមការបញ្ជាក់ របស់លោក ផៃ ស៊ីផាន។
លោក អ៊ូ ចន្ទរិទ្ធ ដែលបានចូលរួមក្នុងការផ្ទៀងផ្ទាត់ផែនទី កាលពីថ្ងៃទី២០ ខែសីហា បានបញ្ជាក់ថាពេលនេះ គណបក្សសង្រ្គោះជាតិ ក៏កំពុងតែរងចាំ ការមកដល់នៃផែនទីពីប្រទេសបាំរាំងផងដែរ ដើម្បីយកមកផ្ទៀងផ្ទាត់ជាមួយនឹងផែនទីរបស់រដ្ឋាភិបាលកម្ពុជាបច្ចុប្បន្ន។ ប្រសិនបើការផ្ទៀងផ្ទាត់ចេញ ជាលទ្ធផលយ៉ាណានោះ គណបក្សសង្រ្គោះជាតិ នឹងធ្វើការផ្ទៀតផ្ទាត់នៅលើដីផ្ទាល់តែម្តង។ លោកបន្តថា ការផ្ទៀងផ្ទាត់ នៅលើផែនទីខុសគ្នាតែបន្តិច តែការផ្ទៀងផ្ទាត់នៅលើដីអាចនឹងខុសគ្នាច្រើនគីឡូម៉ែត្រ។
សូមបញ្ជាក់ថាលទ្ធផលនៃការផ្ទៀងផ្ទាត់ផែនទី ដែលអង្គការសហប្រជាជាតិបានយកមកចំនួន ១៨ផ្ទាំង កាលពីថ្ងៃទី២០ ខែសីហា នោះ ដូចគ្នានឹងផែនទី ដែលរដ្ឋាភិបាលកម្ពុជាកំពុងប្រើប្រាស់បច្ចុប្បន្ននេះ។ អង្គការសហប្រជាជាតិ បានផ្តល់ផែនទី UTM មកឲ្យកម្ពុជា បន្ទាប់ពីខ្លួនរកមិនឃើញនូវផែនទីបោនខ្នាត ១/១០០.០០០បោះពុម្ភ ដោយវិទ្យាស្ថានក្រុមភូមិសាស្ត្រឥណ្ឌូចិន ដែលស្នើខ្ចី ដោយប្រមុខរដ្ឋាភិបាលកម្ពុជា។ ផែនទីនោះ ត្រូវបានគេជឿថា រដ្ឋាភិបាលសម័យសង្គមរាស្ត្រនិយមបានយកទៅតំកល់ នៅអង្គការសហប្រជាជាតិ នៅក្នុងឆ្នាំ១៩៦៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ