ការផ្ទៀងផ្ទាត់៖ ផែនទីរដ្ឋាភិបាល និង UN ដូចគ្នាទាំងស្រុង តែបក្សប្រឆាំងមិនទាន់មានប្រតិកម្ម
ដូចការគ្រោងទុកនៅព្រឹកថ្ងៃព្រហស្បតិ៍នេះ រដ្ឋាភិបាលកម្ពុជាបានរៀបចំធ្វើការផ្ទៀងផ្ទាត់ផែនទីដែលខ្លួនកំពុងប្រើប្រាស់បច្ចប្បន្ន និងផែនទីដែលខ្ចីពីអង្គការសហប្រជាជាតិចំនួន១៨ ផ្ទាំងនៅវិមានសន្តិភាព។ ការផ្ទៀងផ្ទាត់បានបង្ហាញថា ផែនទីដែលរដ្ឋាភិបាលកម្ពុជាកំពុងប្រើប្រាស់គឺដូចគ្នាទាំងស្រុងនឹងផែនទីដែលបានខ្ចីនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៦
បន្ទាប់ពីធ្វើការផ្ទៀតផ្ទាត់គ្នាអស់រយៈពេលប្រមាណជិត២ម៉ោងរួចមក គណៈកម្មការចំពោះកិច្ចដើម្បីទទួល ប្រគល់ និងផ្ទៀងផ្ទាត់ផែនទីដែលខ្ចីពីអង្គការសហប្រជាជាតិ បានប្រកាសថា ផែនទីទាំងពីរមានលក្ខណៈដូចគ្នាទាំងស្រុង។
លោកហោ ណាំហុង រដ្ឋមន្ត្រីក្រសួងការបរទេសកម្ពុជា និង ជាប្រធានគណៈកម្មការចំពោះកិច្ចនេះបានបញ្ជាក់ថា៖ “ យើងមាន២៦សន្លឹក ព្រំដែនយើងមាន២៦សន្លឹក ប៉ុន្តែយើងយកមក១៨ដើម្បីឲ្យស្របតាម១៨របស់អង្គការសហប្រជាជាតិហ្នឹងគឺឃើញថា អត់ខុសគ្នាសោះ។
លោកហោ ណាំហុង បានសង្កត់ធ្ងន់ផងដែរថា លទ្ធផលនៃការផ្ទៀងផ្ទាត់នេះ នឹងជួយជម្រះនូវមន្ទិលសង្ឃ័យនានាមកលើផែនទីដែលរដ្ឋាភិបាលកម្ពុជាកំពុងប្រើប្រាស់សព្វថ្ងៃក្នុងការបោះបង្គោលព្រំដែនជាមួយប្រទេសវៀតណាម។ បើតាមលោកហោ ណាំហុង រដ្ឋាភិបាលកម្ពុជា នឹងធ្វើការផ្ទៀងផ្ទាត់ផែនទីដែលខ្លួនមានទាំងនេះ ជាមួយនឹងផែនទីដែលបារាំងនឹងផ្តល់ឲ្យកម្ពុជានៅពេលខាងមុខទៀត ដើម្បីបញ្ជាក់ឲ្យឃើញកាន់តែច្បាស់ពីភាពត្រឹមត្រូវនៃផែនទីរបស់រដ្ឋាភិបាល។
លោកអូ ច័ន្ទឫទ្ធិមន្ត្រីជាន់ខ្ពស់គណបក្សសង្គ្រោះជាតិដែលបានចូលរួមផ្ទៀងផ្ទាត់ផែនទីនេះដែរ មិនទាន់បង្ហាញពីជំហររបស់គណបក្សប្រឆាំងចំពោះលទ្ធផលនៃការផ្ទៀងផ្ទាត់នេះនោះទេ។ លោកអ៊ូ ច័ន្ទឫទ្ធិ ៖ “ យើងមិនអាចប្រកាសជំហរយើងថាតើផែនទីហ្នឹងយ៉ាងណាទេ យកមកផ្ទៀងផ្ទាត់ យកមកឃើញពេលនេះ។ យើងរង់ចាំដែលរដ្ឋាភិបាលលោកមានប្រសាសន៍ហើយថា នឹងខ្ចីផែនទីឫក៏សុំពីខាងបារាំងមកទៀត។ ខ្ញុំយល់ថា ជារឿងមួយល្អដែលយើងអាចផ្ទៀងផ្ទាត់ផែនទីទាំងអស់ គ្រប់ប្រភពទាំងអស់ ដើម្បីបញ្ជាក់ពីភាពស្របច្បាប់ឫក៏ភាពត្រឹមត្រូវដែលរដ្ឋាភិបាលបច្ចប្បន្នប្រើផែនទីបាទ “។
គួរបញ្ជាក់ថា ផែនទីដែលអង្គការសហប្រជាជាតិឲ្យកម្ពុជាខ្ចីនិងធ្វើការផ្ទៀងផ្ទាត់នៅព្រឹកមិញនេះ គឺជាប្រភេទផែនទីUTM ខ្នាត១លើ១រយពាន់ដែលខុសគ្នានឹងផែនទីដែលរដ្ឋាភិបាលកម្ពុជាកំពុងប្រើប្រាស់សព្វថ្ងៃគឺប្រភេទបោន ខ្នាត១លើ១រយពាន់។ អង្គការសហប្រជាជាតិ បានផ្តល់ផែនទីនេះដល់កម្ពុជា បន្ទាប់ពីខ្លួនរកមិនឃើញនូវផែនទីបោនខ្នាត១លើ១រយពាន់បោះពុម្ភដោយវិទ្យាស្ថានក្រុមភូមិសាស្ត្រឥណ្ឌូចិន ដែលស្នើខ្ចីដោយប្រមុខរដ្ឋាភិបាលកម្ពុជា។ ផែនទីនោះ ត្រូវបានគេជឿថា រដ្ឋាភិបាលសម័យសង្គមរាស្ត្រនិយមបានយកទៅតំកល់នៅអង្គការសហប្រជាជាតិនៅក្នុងឆ្នាំ១៩៦៤។
លោកវ៉ា គឹមហុង ប្រធានគណៈកម្មាធិការកិច្ចការចម្រុះព្រំដែនកម្ពុជា និងជាអនុប្រធានគណៈកម្មការចំពោះកិច្ច ដើម្បីទទួល ប្រគល់ និង ផ្ទៀងផ្ទាត់ផែនទី បានគូសបញ្ជាក់ថា បើទោះបីផែនទីទាំងពីរខុសគ្នាក៏ដោយ ក៏ប៉ុន្តែខ្សែបន្ទាត់ព្រំដែននៅលើផែនទីទាំងពីរនោះ គឺមិនខុសគ្នាឡើយ។
គួរជំរាបជូនផងដែរថា ការផ្ទៀងផ្ទាត់ផែនទីនៅព្រឹកមិញនេះ គឺបានធ្វើឡើងភ្លាមៗ បន្ទាប់ពីមន្ត្រីអង្គការសហប្រជាជាតិបានប្រគល់ និងចាកចេញពីវិមានសន្តិភាពនៅម៉ោងប្រមាណជាង៩ព្រឹក។ ការផ្ទៀងផ្ទាត់ក៏មានការចូលរួមពីតំណាងគណបក្សប្រជាជនកម្ពុជា គណបក្សសង្គ្រោះជាតិ គណបក្សហ៊ុនស៊ិនប៉ិច រាជបណ្ឌិតសភាកម្ពុជា ក្រុមប្រឹក្សាធម្មញ្ញ និងប្រធានគណៈកម្មការរបស់រដ្ឋសភាមួយចំនួនទៀតផងដែរ។
លោកសុខ ទូច អ្នកវិភាគព្រឹត្តិការណ៍នយោបាយខ្មែរ និងជាប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជា បានបញ្ជាក់ថា ការផ្ទៀងផ្ទាត់ផែនទីខ្ចីពីអង្គការសហប្រជាជាតិជាមួយនឹងផែនទីរបស់រដ្ឋាភិបាលកម្ពុជានេះ គឺបានចង្អុលបង្ហាញប្រាប់ដល់ប្រជាពលរដ្ឋកម្ពុជាឲ្យឈប់ច្រឡំប្រវត្តិសាស្ត្រ។ ប្រវត្តិសាស្ត្រដែលថា កម្ពុជាបានតម្តល់ផែនទីនៅអង្គការសហប្រជាជាតិនោះ។ ជាមួយនឹងលទ្ធផលនៃការផ្ទៀងផ្ទាត់ផែនទី លោកសុខ ទូច បានលើកឡើងថា អ្នកនយោបាយគួរឈប់បំពុលមហាជនដោយប្រើប្រាស់ផែនទីក្លែងក្លាយទៀតទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ