តុលាការបញ្ជាក់ពីភាពស្របច្បាប់នៃការចាប់ខ្លួនលោក អ៊ុំ សំអាន
អយ្យការអមសាលាដំបូងរាជធានីភ្នំពេញ បានគូសបញ្ជាក់នៅក្នុងសេចក្ដីថ្លែងការណ៍ចុះថ្ងៃទី១២មេសាថា ការចាប់ខ្លួនលោក អ៊ុំ សំអាន តំណាងរាស្ត្រមណ្ឌលសៀមរាបមកពីគណបក្សសង្គ្រោះជាតិ ត្រូវបានធ្វើឡើងស្របតាមច្បាប់ជាធរមាន។ ការបញ្ជាក់របស់អយ្យការអមសាលាដំបូងរាជធានីភ្នំពេញដូច្នេះ ធ្វើឡើងបន្ទាប់ពីអង្គការសង្គមស៊ីវិល និងគណបក្សសង្គ្រោះជាតិ ហៅការចាប់ខ្លួនលោក អ៊ុំ សំអាន ថា ធ្វើឡើងដោយរំលោភលើអភ័យឯកសិទ្ធិអ្នកតំណាងរាស្ត្រ ដែលធានាដោយច្បាប់និងរដ្ឋធម្មនុញ្ញ។
ចុះផ្សាយនៅថ្ងៃ៖
ស្តាប់ - ០២:៣២
ការផ្សព្វផ្សាយខ្លឹមសារជាអក្សរ វីដេអូ ផែនទីពាក់ព័ន្ធនឹងបញ្ហាព្រំដែនវៀតណាម របស់លោក អ៊ុំ សំអាន នៅលើបណ្ដាញសង្គម ត្រូវបានអយ្យការអមសាលាដំបូងរាជធានីភ្នំពេញវាយតម្លៃថា មានខ្លឹមសារ និងចរិតញុះញង់ បង្កឲ្យមានភាពវឹកវរដល់សន្តិសុខសង្គម និងការញុះញង់ឲ្យមានការរើសអើង។ ថ្វីត្បិតតែការផ្សព្វផ្សាយត្រូវបានធ្វើឡើងតាំងពីឆ្នាំ២០១៥ ប៉ុន្តែរហូតមកទល់បច្ចុប្បន្ននេះ គេនៅតែអាចរកឃើញខ្លឹមសារជាអក្សរ និងវីដេអូដើមទាំងស្រុងនៅឡើយ។ តាមរយៈការផ្សព្វផ្សាយនេះ អយ្យការអមសាលាដំបូងក្រុងភ្នំពេញ ចាត់ទុកថា សកម្មភាពរបស់លោក អ៊ុំ សំអាន ជាបទល្មើសជាក់ស្ដែង ដែលអនុញ្ញាតឲ្យសមត្ថកិច្ចចាប់ខ្លួនតំណាងរាស្ត្ររូបនេះបានស្របតាមច្បាប់ជាធរមាន ដោយមិនចាំបាច់មានការយល់ព្រមពីរដ្ឋសភា ឬគណៈកម្មាធិការអចិន្ត្រៃយ៍របស់រដ្ឋសភាឡើយ។
សូមជម្រាបជូនថា លោក អ៊ុំ សំអាន ត្រូវបានចាប់ខ្លួននៅថ្ងៃទី១១ខែមេសា និងក្រោយមក ត្រូវបានព្រះរាជអាជ្ញាអមសាលាដំបូងរាជធានីភ្នំពេញ សម្រេចចោទប្រកាន់ពីបទញុះញង់បង្កភាពវឹកវរធ្ងន់ធ្ងរដល់សន្តិសុខសង្គម តាមមាត្រា៤៩៥ និងបទញុះញង់ឲ្យមានការរើសអើង តាមមាត្រា៤៩៦ នៃក្រមព្រហ្មទណ្ឌកម្ពុជា។ សាលាដំបូងក្រុងភ្នំពេញសម្រេចឃុំខ្លួនលោក អ៊ុំ សំអាន ដើម្បីបន្តសំណុំរឿងក្ដីនេះបន្ថែមទៀត បន្ទាប់ពីទទួលបានការសម្រេចរបស់រដ្ឋសភា ឲ្យបន្តនីតិវិធីលើសំណុំរឿងរបស់លោក អ៊ុំ សំអាន ចុះថ្ងៃទី១២មេសា។
សូមជម្រាបជូនថា ការបញ្ជាក់របស់អយ្យការអមសាលាដំបូងរាជធានីភ្នំពេញដូច្នេះ ធ្វើឡើងបន្ទាប់ពីអង្គការសង្គមស៊ីវិល និងគណបក្សសង្គ្រោះជាតិហៅការចាប់ខ្លួនលោក អ៊ុំ សំអាន ថា ធ្វើឡើងដោយរំលោភលើអភ័យឯកសិទ្ធិអ្នកតំណាងរាស្ត្រ ដែលធានាដោយច្បាប់និងរដ្ឋធម្មនុញ្ញ។ សម្រាប់សង្គមស៊ីវិល និងគណបក្សសង្គ្រោះជាតិ ដោយយោងតាមមាត្រា៨០នៃរដ្ឋធម្មនុញ្ញ តំណាងរាស្ត្រដែលមានអភ័យឯកសិទ្ធិសភា មិនអាចត្រូវចោទប្រកាន់ ចាប់ខ្លួន ឃាត់ខ្លួន ឬឃុំខ្លួន ដោយហេតុថាបានសម្ដែងយោបល់ ឬបញ្ចេញមតិក្នុងការបំពេញមុខងាររបស់ខ្លួនសោះឡើយ។
សម្រាប់ការប្រជុំរដ្ឋសភាដើម្បីបោះឆ្នោតឲ្យតុលាការបន្តនីតិវិធីលើសំណុំរឿងលោក អ៊ុំ សំអាន ទៀតសោត គណបក្សសង្គ្រោះជាតិ តាមរយៈសេចក្ដីថ្លែងការណ៍ចុះថ្ងៃទី១៣មេសា បានបរិហារថា ជាកិច្ចប្រជុំដែលរំលោភធ្ងន់ធ្ងរលើរដ្ឋធម្មនុញ្ញកម្ពុជា។ បើតាមគណបក្សសង្គ្រោះជាតិ ដើម្បីសម្រេចអំពីការចោទប្រកាន់ ចាប់ខ្លួន ឃាត់ខ្លួន ឬឃុំខ្លួនសមាជិកណាមួយនៃរដ្ឋសភា គេត្រូវការកូរ៉ុមប្រជុំនិងសំឡេងអនុម័តលើសពី២ភាគ៣នៃចំនួនសមាជិករដ្ឋសភាទាំងមូល។
គួររំលឹកថា ការប្រជុំសម្រេចបន្តនីតិវិធីលើសំណុំរឿងលោកអ៊ុំ សំអាន របស់រដ្ឋសភា កាលពីថ្ងៃទី១២មេសា ធ្វើឡើងដោយមានតំណាងរាស្ត្រមកពីគណបក្សកាន់អំណាច៦៣រូបប៉ុណ្ណោះចូលរួមប្រជុំ។ តំណាងរាស្ត្រមកពីគណបក្សសង្គ្រោះជាតិទាំងអស់បានធ្វើពហិការ មិនចូលប្រជុំអនុម័តសេចក្ដីសម្រេចនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ