លោក ជា ស៊ីម៖ មរណភាពជាសច្ចធម៌ ឯអំពើល្អជាប្រវត្តិសាស្ត្រ
ចុះផ្សាយនៅថ្ងៃ៖
ស្តាប់ - ០៧:០៨
លោក សម រង្ស៊ី បានហៅសពលោក ជា ស៊ីម ថា«វីរបុរស»។ ទីបំផុត វីរភាពនៃអតីតមេដឹកនាំរណសិរ្សសាមគ្គីសង្គ្រោះជាតិកម្ពុជា ត្រូវបានទទួលស្គាល់ជាសាធារណៈដោយប្រធានគណបក្សប្រឆាំង។ នេះជាកាយវិការដែលគួរតែជាគំរូចំពោះប្រជាជនកម្ពុជាឯទៀតៗ ក្នុងការលើកទឹកចិត្តអ្នកស្នេហាជាតិខ្មែរផ្សេងៗទៀត។
ប្រជាជនកម្ពុជាមួយចំនួនគឺអសីលធម៌ និងខ្វះសុជីវធម៌យ៉ាងខ្លាំងចំពោះមរណភាពនៃរដ្ឋបុរសម្នាក់។ ពួកគេបានបង្ហាញជាសាធារណៈ នូវភាពរីករាយចំពោះការបាត់បង់លោក ជា ស៊ីម ដែលជាអតីតប្រធានព្រឹទ្ធសភាកម្ពុជា និងជាអតីតប្រធានគណបក្សប្រជាជនកម្ពុជា។ ផ្ទុយទៅវិញ លោក សម រង្ស៊ី ដែលតែងតែប្រឆាំងនឹងគណបក្សប្រជាជនកម្ពុជាខ្លាំងជាងគេ បានទទួលស្គាល់លោក ជា ស៊ីម ថាជា«វីរជន»។
លោកប្រមុខគណបក្សសង្គ្រោះជាតិ បានកត់សម្គាល់ឃើញតាំងពីឆ្នាំ១៩៩៣មកថា លោក ជា ស៊ីម បានបង្ហាញ«ឧត្តមគតិរួបរួមជាតិ និងស្នេហាជាតិ»ដូចព្រះបរមរតនកោដ្ឋ នរោត្តម សីហនុ ដែរ។ ការថ្លែងរបស់លោក សម រង្ស៊ី នៅថ្ងៃម្សិលមិញ គូសបញ្ជាក់អំពីគុណូបការៈនៃអតីតប្រធានរដ្ឋសភាជាតិកម្ពុជា។ នៅក្នុងសារលិខិតរំលែកទុក្ខរបស់គណបក្សសង្គ្រោះជាតិជូនក្រុមគ្រួសារសព លោក សម រង្ស៊ី ក៏បានលើកឡើងថា លោក ជា ស៊ីម «បានលះបង់កម្លាំងកាយ កម្លាំងចិត្ត ក្នុងការងារស្ថាបនាជាតិ និងបង្រួបបង្រួមជាតិ»កម្ពុជាដែរ។
ទន្ទឹមនឹងនេះ សមាគមអាដហុក កាពារសិទ្ធិមនុស្ស និងអភិវឌ្ឍន៍នៅកម្ពុជា ដែលជាទូទៅមិនសូវទុកមុខឱ្យចន្លោះប្រហោងក្នុងការគ្រប់គ្រងរបស់រដ្ឋាភិបាល យល់ឃើញថា អវត្តមានរបស់អតីតប្រធានគណបក្សប្រជាជនកម្ពុជា «គឺជាការបាត់បង់មគ្គុទេ្ទសក៍ដ៏ឆ្នើម»របស់កម្ពុជា។ អង្គការមិនមែនរដ្ឋាភិបាលក្នុងស្រុកនេះមើលឃើញថា លោក ជា ស៊ីម «មានគុណូបការៈក្នុងការសង្គ្រោះអាយុជីវិតប្រជាជនកម្ពុជាឱ្យចាកផុតពីរបបប្រល័យពូជសាសន៍ និងកសាងប្រទេសកម្ពុជា ឱ្យរីកចម្រើនឡើងវិញ»។
ជាក់ស្តែងណាស់ លោក ជា ស៊ីម ពេលនោះជាប្រធានស្រុកមួយរូប បានងើបបះបោរប្រឆាំងនឹងរបប កម្ពុជាប្រជាធិបតេយ្យ ពេលមេដឹកនាំខ្មែរក្រហមបានធ្វើឱ្យប្រជាជនកម្ពុជាស្លាប់ជាបន្តបន្ទាប់ប្រមាណជា១លាន៧សែននាក់ ដោយសារជំងឺ ការបង្អត់អាហារ និងការកាប់សម្លាប់។ ការរើបម្រះចេញពីអំពើឃោឃៅនៃពួកកុម្មុយនីស្តជ្រុលនិយម តាមរយៈការបង្កើតរណសិរ្សសាមគ្គីសង្គ្រោះជាតិកម្ពុជា នៅថ្ងៃ០២ ខែធ្នូ ឆ្នាំ១៩៧៨ ដោយមានរូបលោកជាអនុប្រធាន និងលោក ហេង សំរិន ជាប្រធាន បានរំដោះប្រជាជនកម្ពុជាឱ្យរួចផុតពីការកាប់សម្លាប់ទូទាំងប្រទេសនៅថ្ងៃទី០៧ ខែមករា ឆ្នាំ១៩៧៩។ ចលនាបដិវត្តន៍នេះ បានស្តារកម្ពុជាឡើងវិញបន្តិចម្តងៗ ពីការបំផ្លិចបំផ្លាញដល់ឫសគល់ស្ទើរគ្រប់វិស័យនៃសង្គម រហូតឈានដល់ការរីកចម្រើនក្នុងកម្រិតបច្ចុប្បន្ន។
ជាការពិត ក្នុងការរំដោះប្រជាជនកម្ពុជាពីរបបកម្ពុជាប្រជាធិបតេយ្យ រណសិរ្សសាមគ្គីសង្គ្រោះជាតិកម្ពុជារបស់លោក ជា ស៊ីម បានពឹងផ្អែកលើកម្លាំងកងទ័ពវៀតណាមស្ទើរតែទាំងស្រុង។ ការណ៍នេះត្រូវបានអ្នកសង្កេតការណ៍ជាច្រើនចោទថា វៀតណាមបានឈ្លានពានកម្ពុជា និងបានត្រួតត្រាប្រទេសនេះតាមរយៈ«បក្សប្រជាជនបដិវត្តន៍កម្ពុជា» ក្រោយមកប្តូរជា«គណបក្សប្រជាជនកម្ពុជា» ដែលជាឧបករណ៍នយោបាយរបស់រណសិរ្សសាមគ្គីសង្គ្រោះជាតិកម្ពុជា។ នេះជាមូលហេតុដែលធ្វើឱ្យអ្នកប្រឆាំងនឹងការឈ្លានពាននោះ ចោទគណបក្សប្រជាជនកម្ពុជាពេញៗមាត់ថាជា«អាយ៉ង»របស់វៀតណាម បើទោះបីជារដ្ឋាភិបាលនេះបានខិតខំពង្រីកចំណងការទូត ទាក់ទងពាណិជ្ជកម្ម និងធ្វើសហប្រតិបត្តិការជាមួយបណ្តាប្រទេសនានាលើពិភពលោកដោយសេរីក៏ដោយ។ មេដឹកនាំគណបក្សប្រជាជនកម្ពុជា ដែលកាន់កាប់អំណាចអស់រយៈពេល៣៦ឆ្នាំជាប់ៗគ្នា ត្រូវបានគណបក្សប្រឆាំង និងប្រជាជនកម្ពុជាកាន់តែច្រើនឡើង មើលឃើញថាមានគុណវិបត្តិធំៗមួយចំនួនខាងផ្នែកសេដ្ឋកិច្ច សង្គមកិច្ច បរិស្ថាន និងការពារជាតិ។ បញ្ហាទាំងនោះធ្វើឱ្យគណបក្សប្រជាជនកម្ពុជារបស់លោក ជា ស៊ីម បាត់បង់ការគាំទ្រយ៉ាងគំហុក។
ទោះបីជាយ៉ាងណាក៏ដោយ គេក៏ត្រូវទទួលស្គាល់ដែរថា ការដឹកនាំរដ្ឋាភិបាលខ្មែរក្រោយរបបកម្ពុជាប្រជាធិបតេយ្យ ដែលបានព្យាយាមលុបបំបាត់វប្បធម៌រាប់ពាន់ឆ្នាំរបស់ខ្មែរ តាមរយៈការបង្កើតមនុស្សថ្មីដែលបដិសេធចំណេះដឹង និងសមិទ្ធិផលរបស់បុព្វការី គឺជាបន្ទុកដ៏ធ្ងន់របស់មេដឹកនាំគណបក្សប្រជាជនកម្ពុជាក្នុងការស្តារមាតុភូមិរបស់ខ្លួន។ ទន្ទឹមនឹងនេះ គេក៏សង្កេតឃើញមានការរីកចម្រើនគួរឱ្យកត់សម្គាល់ដែរក្រោមការដឹកនាំរបស់គណបក្សប្រជាជនកម្ពុជា ដែលមានលោក ជា ស៊ីម ជាប្រធានតាំងពីឆ្នាំ១៩៩១មក។ លទ្ធផលនេះមិនពិបាកយល់ទេសម្រាប់អ្នកដែលធ្លាប់បានហែលឆ្លងសម័យសង្គ្រាម និងរបបខ្មែរក្រហម ប៉ុន្តែវាទំនងជាពិបាកយល់ណាស់ចំពោះអ្នកដែលមិនធ្លាប់បានរត់លូនក្រោមគ្រាប់ផ្លោង និងដែលមិនធ្លាប់ឆ្លងកាត់ការបង្ខំឱ្យធ្វើការហួសកម្លាំង ការបង្អត់អាហារ ការឈឺគ្មានថ្នាំព្យាបាល ការធ្វើទារុណកម្ម និងការកាប់សម្លាប់ដោយគ្មានការជំនុំជម្រះតាមផ្លូវច្បាប់។ តាមពិត អ្វីៗទាំងនេះបានកើតឡើងចំពោះប្រជាជនកម្ពុជានៅទូទាំងប្រទេស ក្នុងរបបកម្ពុជាប្រជាធិបតេយ្យ ដែលលោក ជា ស៊ីម និងសហការីរបស់គាត់ជាច្រើនរូបទៀតបានពុះពារលុបបំបាត់រហូតដល់បានជ័យជម្នះ។
ពេលនេះជាពេលដែលប្រជាជនកម្ពុជាភាគច្រើនមានឱកាសបានក្រេបជញ្ជក់ចំណេះដឹងពីសាលារៀន និងមានលទ្ធភាពរស់នៅប្រសើរជាងសម័យសង្គ្រាម និងសម័យខ្មែរក្រហម។ មិនគួរប្រជាជនកម្ពុជាខ្លះបែរជាបដិសេធព្រឹត្តិការណ៍ប្រវត្តិសាស្ត្រ ហើយបង្ហាញសេចក្តីរីករាយលើគំនរទុក្ខជនរួមជាតិរបស់ខ្លួន ជាពិសេសចំពោះមរណទុក្ខនៃលោក ជា ស៊ីម ដែលបានប្រឆាំងយ៉ាងមុតមាំចំពោះការជិះជាន់ ការបំបាត់សិទ្ធិសេរីភាព ក៏ដូចជាប្រឆាំងនឹងអំពើអមនុស្សធម៌គ្រប់ប្រភេទ តាំងពីពេលដែលលោកទើបមានអាយុ១៥ឆ្នាំនៅឡើយ តាមរយៈការចូលតស៊ូក្នុងចលនាខ្មែរឥស្សរៈដើម្បីឯករាជ្យជាតិកម្ពុជា។
លោក សម រង្ស៊ី បានធ្វើជាគំរូល្អសម្រាប់អ្នកប្រឆាំងនឹងមេដឹកនាំគណបក្សប្រជាជនកម្ពុជាហើយ។ លោកបានទទួលស្គាល់នូវវីរភាពរបស់លោក ជា ស៊ីម។ កាយវិការរបស់លោកប្រធានគណបក្សសង្គ្រោះជាតិ ពិតជានឹងអាចរួមចំណែកលើកស្ទួយសីលធម៌ និងសុជីវធម៌ក្នុងការរស់នៅរបស់ប្រជាជនកម្ពុជាមួយកម្រិតទៀត។ ជនណាដែលមើលឃើញតែគុណវិបត្តិរបស់លោក ជា ស៊ីម ហើយមើលស្រាលចំពោះទឹកចិត្តស្នេហាជាតិ និងការលះបង់សេចក្តីសុខផ្ទាល់ខ្លួនរបស់រដ្ឋបុរសកម្ពុជារូបនេះ ដើម្បីប្រយោជន៍មាតុភូមិកម្ពុជា គឺជាជនអកតញ្ញូ។ ចំពោះយុវជនជំនាន់ក្រោយ គេចាំបាច់ត្រូវដឹងថា លោក ជា ស៊ីម ជាបុព្វការី ដែលបានជួយឪពុកម្តាយ ឬជីដូនជីតា ពួកគេឱ្យរួចជីវិតពីរសេចក្តីស្លាប់ក្នុងរបបវាលពិឃាត។ ការសិក្សាស្វែងយល់អំពីវីរភាពរបស់លោក ជា ស៊ីម ឱ្យបានច្បាស់លាស់ទើបសមជាកុលបុត្រ កុលធីតាខ្មែរ។ លោក ជា ស៊ីម ស្លាប់គឺជាសច្ចធម៌ រីឯអំពើល្អរបស់លោកចំពោះមាតុភូមិគឺជាប្រវត្តិសាស្ត្រកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ