សង្គមស៊ីវិល បង្ហាញភាពមិនប្រក្រតីខាងនយោបាយនៅកម្ពុជា
ក្រុម អង្គការសង្គមស៊ីវិល ដែលធ្វើការខាងការបោះឆ្នោត បានបង្ហាញក្នុងកិច្ចពិភាក្សាតុមូល កាលពីព្រឹកថ្ងៃអង្គារនេះ អំពីស្ថានភាពប្រជាធិបតេយ្យ និងភាពមិនប្រក្រតី ខាងនយោបាយនៅកម្ពុជា។ នោះគឺនៅឆ្នាំ២០១៤ កន្លងមកនេះ អង្គការឃ្លាំមើលការបោះឆ្នោត បានមើលឃើញថា ប្រជាធិបតេយ្យនៅកម្ពុជា ពេលខ្លះ ដើរថយក្រោយ ពេលខ្លះដើរទៅមុខ តាមអារម្មណ៍របស់អ្នកនយោបាយ។ ចំណែកភាពមិនប្រក្រតីផ្នែកនយោបាយក្នុងឆ្នាំ២០១៤ រួមមាន ការប្រើប្រាស់ធនធានរដ្ឋមិនត្រឹមត្រូវ ព្រមទាំងអំពើពុករលួយខាងនយោបាយ ដូចជា បក្សពួក ឬសាច់ញាតិនិយម និងការរំលោភអំណាច ជាដើម។ រីឯលោកផៃស៊ីផាន អ្នកនាំពាក្យរដ្ឋាភិបាល បានហៅរបាយការណ៍នេះ ថាមិនប្រាកដប្រជា និងគ្មានមូលដ្ឋាន ដែលអាចយកមកពិចារណាបានទេ។
ចុះផ្សាយនៅថ្ងៃ៖
ស្តាប់ - ០២:០៩
ជម្លោះដែលកើតឡើង នៅក្រោយថ្ងៃប្រកាសលទ្ធផលនៃការបោះឆ្នោតជាតិ ឆ្នាំ២០១៣ និងវិបត្តិនយោបាយជាបន្តបន្ទាប់ បានក្លាយជាឧបសគ្គរាំងស្ទះដល់ដំណើរការអនុវត្តន៍របបប្រជាធិបតេយ្យ នៅកម្ពុជា សាជាថ្មីម្តងទៀត។ ក្នុងនោះ សេរីភាពនៃការជួបជុំដោយសន្តិភាព និងអហិង្សា ត្រូវបានរាំងខ្ទប់យ៉ាងពេញទំហឹង។ នេះបើតាមរបាយការណ៍របស់អង្គការខុមហ្វ្រែល ដែលបានផ្សព្វផ្សាយនៅព្រឹកថ្ងៃទី៣១មីនា។
របាយការណ៍ ស្តីពី “ប្រជាធិបតេយ្យប្រចាំឆ្នាំ និងភាពមិនប្រក្រតីផ្នែកនយោបាយ” បង្ហាញថា ដំណើរការអនុវត្តន៍អភិបាលកិច្ចបែបប្រជាធិបតេយ្យ បានចេញជារូបរាងប្រសើរឡើងខ្លះ បន្ទាប់ពីមានកិច្ចព្រមព្រៀងនយោបាយនាខែកក្កដា ឆ្នាំ២០១។ កំណែទម្រង់ស្ថាប័នរដ្ឋសភា បានពង្រឹងគោលការណ៍បែងចែកអំណាច។
អំពីស្ថានការណ៍ប្រជាធិបតេយ្យ នៅកម្ពុជា ក្នុងឆ្នាំ២០១៤ ត្រូវបានលោក នី ចរិយា មកពីអង្គការអាដហុក មើលឃើញថា ម្តងដើរទៅមុខ ហើយពេលនេះ ដើរថយក្រោយ ទៅតាមស្ថានការណ៍នយោបាយ។
រីឯលោក ព្រាប កុល មកពីអង្គការតម្លាភាពកម្ពុជា យល់ថា ប្រជាធិបតេយ្យ នៅកម្ពុជា ប្រៀបដូចគេរាំចង្វាក់បូរ៉ូឡូ គឺឈានទៅមុខ ៣ ជំហ៊ាន មកក្រោយ ៣ ជំហ៊ាន ទៅតាមអារម្មណ៍របស់អ្នកនយោបាយ។
ចំពោះភាពមិនប្រក្រតីផ្នែកនយោបាយ នៅឆ្នាំ២០១៤ ដែលជារបាយការណ៍លើកដំបូង ត្រូវបានលោក គល់បញ្ញា ប្រធានអង្គការខុមហ្វ្រែល លើកបង្ហាញ រួមមាន ការប្រើប្រាស់ធនធានរដ្ឋ សម្ភារៈ ប្រព័ន្ធផ្សព្វផ្សាយរដ្ឋ និងការប្រើប្រាស់ថវិការដ្ឋមិនត្រឹមត្រូវ ជាពិសេសគឺការរំលោភអំណាច នៅបន្តកើតមានច្រើន ដូចជា ការតែងតាំងរដ្ឋមន្ត្រី រដ្ឋលេខាធិការ និងទីប្រឹក្សាក្នុងក្រសួងស្ថាប័នច្រើនរាប់រយនាក់។ ក្នុងនោះ ក៏មានបញ្ហាសាច់ញាតិគ្រួសារនិយម កើតសឹងជាប្រព័ន្ធក្នុងស្ថាប័នក្រសួងរដ្ឋផងដែរ។
លោកផៃ ស៊ីផាន អ្នកនាំពាក្យរដ្ឋាភិបាល បានចាត់ទុករបាយការណ៍របស់អង្គការខុមហ្វ្រែល ថាជារបាយការណ៍ប្រឆាំងនឹងឆន្ទៈរបស់មហាជន។ ក្នុងនោះ ប្រជាធិបតេយ្យ នៅកម្ពុជា បានឈានទៅមុខជានិច្ច តាមរយៈវប្បធម៌សន្ទនា ដែលប្រមុខរដ្ឋាភិបាល កំពុងបង្កើតឡើងជាមួយគណបក្សប្រឆាំង។ មន្ត្រីអ្នកនាំពាក្យ ក៏បានបដិសេធនូវការលើកឡើងរបស់ខុមហ្វ្រែល ពាក់ព័ន្ធនឹងការប្រើប្រាស់ធនធានរដ្ឋ និងការរំលោភអំណាច ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ