សង្គមស៊ីវិល ព្រមានបោះឆ្នោតទំលាក់បក្សកាន់អំណាច បើអនុម័តច្បាប់អង្គការ
ក្រុមអង្គការសង្គមស៊ីវិល ប្រមាណជា១០០នាក់នៅព្រឹកថ្ងៃអង្គារទី២៣ មិថុនានេះ បានជួបប្រជុំគ្នានៅមុខសភាជាតិ ដើម្បីដាក់ញត្តិតវ៉ាប្រឆាំងនឹងច្បាប់សហជីព សមាគម និងអង្គការក្រៅរដ្ឋាភិបាល ដែលរដ្ឋសភាគ្រោងនឹងដាក់អនុមត័។ សង្គមស៊ីវិលក៏បានអះអាងផងដែរថា ខ្លួននឹងបោះឆ្នោតទំលាក់គណបក្សនយោបាយណាដែលគាំទ្រច្បាប់អង្គការសង្គមស៊ីវិលនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
សង្គមស៊ីវិលបានព្រមានបោះឆ្នោតទំលាក់គណបក្សប្រជាជនកម្ពុជាប្រសិនបើគណបក្សកាន់អំណាចនៅតែបន្តអនុម័តច្បាប់ស្តីពីសមាគម និងអង្គការមិនមែនរដ្ឋាភិបាល។ នេះគឺជាខ្លឹមសារដែលសង្គមស៊ីវិលបានព្រមានទៅកាន់រដ្ឋាភិបាលតាមរយៈញត្តិផ្ញើជូនប្រធានរដ្ឋសភា។ សង្គមស៊ីវិលបានបង្ហាញជំហរយ៉ាងមុតមាំថា «ក្នុងករណីដែលច្បាប់ថ្មីត្រូវបានអនុម័តដោយមិនកែប្រែស្របតាមគោលការណ៍សិទ្ធមនុស្ស ថ្នាក់ដឹកនាំបុគ្គលិក នៃអង្គការ សមាគម នឹងមិនបោះឆ្នោតគាំទ្រគណបក្សនយោបាយណាដែលបានចូលរួមគាំទ្រការអនុម័តច្បាប់នេះនោះទេ»។
សង្គមស៊ីវិល បានបញ្ជាក់ថាច្បាប់ដែលមាន៩ជំពូក និង៣៩មាត្រានេះ គឺពីផ្ទុយរដ្ឋធម្មនុញ្ញកម្ពុជា និងសេចក្តីថ្លែងការណ៍ជាសកលរបស់អង្គការសហប្រជាជាតិស្តីពីសិទ្ធមនុស្ស។ សិទ្ធមនុស្សដែលត្រូវបានធានាការពារ និងលោកស្ទួយសិទ្ធសេរីភាពគ្រប់យ៉ាង។ ក្នុងញត្តិដែលបានផ្ញើជូនប្រធានរដ្ឋសភា លោក ហេង សំរិន ក្រុមអ្នកតវ៉ាវបន្ថែមថា ខ្លឹមសារនៃសេចក្តីព្រាងច្បាប់នេះ គឺផ្ទុយពីគោលនយោបាយរបស់រដ្ឋាភិបាលខ្លួនឯងផងដែរ។
សូមបញ្ជាក់ថា តាំងពីម៉ោងប្រមាណជាង៨កន្លះ រហូតដល់ម៉ោងប្រមាណជាង១០ព្រឹក ក្រុមអ្នកតវ៉ាបានលើកបដាព័ណ៌ស និងព័ណ៌ខ្មៅ ដែលមានសរសេរអក្សរថា និយាយថាទេចំពោះច្បាប់សហជីព សមាគម និងអង្គការ។ អ្នកចូលរួមមានមកពីសមាគមសេដ្ឋកិច្ចក្រៅប្រព័ន្ធរបស់លោកវ៉នពៅ ក្រុមសកម្មជនដីធ្លីស្ត្រីបឹងកក់ និងអង្គការជាច្រើនផ្សេងៗទៀត។ ក្រៅពីស្រែកតវ៉ានៅខាងមុខសភាហើយនោះ ក្រុមអ្នកតវ៉ា បានដើរជុំវិញសភាចំនួនពី២ជុំមុននឹងបំបែកគ្នា។ យ៉ាងណាក៏ដោយសមត្ថកិច្ចដែលឃ្លាំមើលមិនបានរារាំងបាតុកម្មនោះទេ។
ក្នុងអំឡុងពេលដែលសង្គមស៊ីវិល កំពុងធ្វើបាតុកម្មប្រឆាំងតវ៉ានៅខាងក្រៅសភានោះ គណបក្សសង្គ្រោះជាតិក្នុងកិច្ចប្រជុំគណៈអចិន្រ្តៃយ៍រដ្ឋសភានៅព្រឹកនេះ បានប្រកាសពីគោលជំហររបស់ខ្លួនដែរថា សេចក្ដីព្រាងច្បាប់នេះ មិនបានឆ្លុះបញ្ចាំងពីការលើកស្ទួយឲ្យកាន់តែទូលំទូលាយឡើង នូវសិទ្ធិសេរីភាពរបស់សង្គមស៊ីវិល និង អង្គការក្រៅរដ្ឋាភិបាល ដែលជាធាតុសំខាន់ នៅក្នុងដំណើរការលទ្ធិប្រជាធិបតេយ្យនៅកម្ពុជានោះដែរ។គណបក្សប្រជាជនកម្ពុជា បានបញ្ជាក់ថា បក្សកាន់អំណាចមិនព្រួយបារម្ភចំពោះការព្រមាននេះនោះទេ ព្រោះតែជាការព្រមានរបស់ក្រុមអង្គការសង្គមស៊ីវិលមួយក្តាប់តូចតែប៉ុណ្ណោះ ក្នុងចំណោមអង្គការទាំង៣៥០០អង្គការនៅកម្ពុជា។ នេះជាការបញ្ជាក់ពីលោក សុខ ឥសាន អ្នកនាំពាក្យគណបក្សកាន់អំណាច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ