លោក មាជ សុវណ្ណារ៉ា បន្តជាប់ឃុំ រង់ចាំសវនាការនៅថ្ងៃទី២៥មីនា
ចៅក្រមតុលាការកំពូល នាព្រឹកថ្ងៃទី១១មីនានេះ បានសម្រេច បន្តឃុំខ្លួនលោកមាជសុវណ្ណារ៉ា ប្រធានផ្នែកផ្សព្វផ្សាយរបស់គណបក្សសង្គ្រោះជាតិ។ លោកមាជសុវណ្ណារ៉ា ត្រូវឡើងតុលាការ នៅសាលាដំបូងរាជធានីភ្នំពេញ នាថ្ងៃទី២៥មីនា ដើម្បីជំនុំជម្រះក្នុងសំណុំរឿងបាតុកម្មកើតអំពើហិង្សា ថ្ងៃ១៥កក្កដា។
ចុះផ្សាយនៅថ្ងៃ៖
ស្តាប់ - ០២:២២
ដូចការសម្រេចរបស់ចៅក្រមតុលាការសាលាឧទ្ធរណ៍ និងសាលាដំបូងរាជធានីភ្នំពេញ គឺនៅព្រឹកថ្ងៃពុធ ទី១១មីនានេះ ចៅក្រមតុលាការកំពូល បានសម្រេច មិនដោះលែង លោក មាជ សុវណ្ណារ៉ា ប្រធានផ្នែកផ្សព្វផ្សាយរបស់គណបក្សសង្គ្រោះជាតិឡើយ។
កាលពីព្រឹកថ្ងៃទី៤ ខែមីនា ឆ្នាំ២០១៥ តុលាការកំពូល បានបើកសវនាការលើបណ្តឹងនៅក្រៅឃុំ របស់សកម្មជនគណបក្សសង្គ្រោះជាតិ លោក មាជ សុវណ្ណារ៉ា។ លោក មាជ សុវណ្ណារ៉ា នៅព្រឹកថ្ងៃទី១១មីនានេះ នៅតែចាត់ទុកសំណុំរឿងក្តីលើរូបលោក ថាជារឿងនយោបាយ។ លោកទាមទារឲ្យមានកិច្ចប្រជុំរវាងលោកសមរង្ស៊ី និងលោកនាយករដ្ឋមន្ត្រីហ៊ុនសែន ទើបអាចដោះស្រាយបាន។
លោកមាជសុវណ្ណារ៉ា បានបញ្ជាក់ថា “ក្នុងនាមយើងជាគណៈកម្មការនាយក ខ្ញុំមនុស្សទី៦៤ ក្នុងចំណោមមនុស្ស ១២៣ នាក់ នៅក្នុងគណបក្ស ហើយរឿងអីខ្ញុំទៅជាមេដឹកនាំកុប្បកម្ម ហើយដែរទៅនេះ គឺទៅក្នុងនាមយើងគោរពរដ្ឋធម្មនុញ្ញមាត្រា ៣៨ ដើម្បីទៅចូលរួមបញ្ចេញមតិយោបល់ បែរជាទៅជាខ្ញុំជាអ្នកដឹកនាំកុប្បកម្ម។ វាអត់ត្រូវ។ កាលណាគេមាននយោបាយចាត់តាំង គេមាននយោបាយច្បាស់លាស់ណាស់។ វាមិនដែលអាណាទៅធ្វើមនុស្ស ៥០ ទៅ ៦០ នាក់។ នៅពេលនោះ ទិដ្ឋភាពជាក់ស្តែង អ្នកកាសែតឯករាជ្យ មើលឃើញហើយថា នរណា វាយនរណា?។ ខ្ញុំនិយាយ មានតែអហិង្សាទៅទៀត ហើយបែរជាអីចឹង? ខ្ញុំអត់យល់ទេ!។
សំណុំរឿងបាតុកម្មកើតអំពើហិង្សា ថ្ងៃ១៥កក្កដា នឹងត្រូវតុលាការសាលាដំបូងរាជធានីភ្នំពេញ បើកសវនាការលើអង្គសេចក្តី នៅថ្ងៃទី២៥មីនា។ ជាសំណុំរឿង ដែលតុលាការ បានចោទប្រកាន់លើលោកមាជសុវណ្ណារ៉ា ព្រមទាំងសកម្មជនគណបក្សសង្គ្រោះជាតិ សរុបចំនួន ១១ នាក់ ក្នុងនោះ ៥ នាក់ នៅក្នុងពន្ធនាគារ ពីបទដឹកនាំកុប្បកម្ម និងបង្កអំពើហិង្សា ក្នុងពេលធ្វើបាតុកម្មរំដោះទីលានប្រជាធិបតេយ្យ ដែលមានការប៉ះទង្គិចរវាងបាតុករ និងក្រុមកងសន្តិសុខរាជធានីភ្នំពេញ កាលពីព្រឹកថ្ងៃទី១៥ ខែកក្កដា ឆ្នាំ២០១។
លោក មាជ សុវណ្ណារ៉ា ដែលត្រូវបានចាប់ឃុំខ្លួន កាលពីថ្ងៃទី១១ ខែវិច្ឆិកា ឆ្នាំ២០១៤អាចប្រឈមមុខនឹងការផ្តន្ទាទោសដាក់ពន្ធនាគារ ពីជាង ២០ ឆ្នាំ ទៅជិត ៤០ ឆ្នាំ។ ប៉ុន្តែសង្គមស៊ីវិល និងអ្នកតាមដាននយោបាយ នៅតែមើលឃើញថា ករណីចាប់ខ្លួន និងកាត់ទោសសកម្មជនគណបក្សសង្គ្រោះជាតិនោះ ជារឿងនយោបាយ។ ម្យ៉ាងទៀត សំណុំរឿងហិង្សាដូចគ្នា ដែលក្រុមសន្តិសុខ និងកងកម្លាំងប្រដាប់អាវុធ វាយ និងបាញ់សម្លាប់បាតុករ គឺមិនត្រូវតុលាការ ចាត់ការឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ