ទូរទស្សន៍គណបក្សប្រឆាំងនឹងផ្សាយតាមប្រព័ន្ធ Analog ក្នុងពេលខាងមុខនេះ
ផ្តើមចេញពីជំនួបទ្វេរភាគីរវាងមេដឹកនាំកំពូលគណបក្សជាប់ឆ្នោតទាំងពីរកាលពីម្សិលមិញក្រសួងព័ត៌មានបានសម្រេចអនុញ្ញាតឲ្យក្រុមហ៊ុន Cambodian Independent Media Co, Ltdរបស់គណបក្សប្រឆាំង ចាប់ផ្តើមដំណើរការស្ថានីយផ្សាយទូរទស្សន៍របស់ខ្លួននៅរាជធានីភ្នំពេញនិងនៅតាមបណ្តាខេត្ត។លិខិតដែលចុះហត្ថលេខាដោយលោកខៀវ កាញារិទ្ធ និងមានការយល់ព្រមពីលោកនាយករដ្ឋមន្ត្រីហ៊ុន សែន ផ្តល់ឲ្យទូរទស្សន៍បក្សប្រឆាំង ផ្សាយតាមប្រព័ន្ធ Analog ដោយក្រសួងបានដកហ្វ្រេកង់មួយពីក្រុមហ៊ុនទូរទស្សន៍ខ្សែរកាបរាជធានីភ្នំពេញចំនួន១Channel ។
ចុះផ្សាយនៅថ្ងៃ៖
ស្តាប់ - ០១:៥៦
ក្រសួងព័ត៌មានបានសម្រេចកាលពីថ្ងៃទី២៧ខែវិច្ឆិកា ឆ្នាំ២០១៤ អនុញ្ញាតឲ្យក្រុមហ៊ុន Cambodian Independent Media Co, Ltd ដំណើរការស្ថានីយទូរទស្សន៍តាមប្រព័ន្ធ Analogនៅរាជធានីភ្នំពេញ ដែលមានកំលាំងផ្សាយ ១០ គីឡូវ៉ាត់ កម្ពស់បង្គោលអង់តែន ១២០ម៉ែត្រនិងប្រើ Channel UHF-E41 និងស្ថានីយទូរទស្សន៍ប្រព័ន្ធ Analog ផ្សាយតាមបណ្តាខេត្តទូទាំងប្រទេសដែលមានកម្លាំងផ្សាយ ១គីឡូវ៉ាត់ កម្ពស់បង្កោលអង់តែន ១០០ម៉ែត្រនិងប្រើChannelដដែល។
លើសពីនេះក្រុមហ៊ុន Cambodian Independent Media Co, Ltd ត្រូវក្រសួងព័ត៌មានប្រាប់ឲ្យទៅបំពេញបែបបទស្នើសុំអាជ្ញាប័ណ្ណដើម្បីដំណើរការស្ថានីយ៍ទូរទស្សន៍ផ្សាយបន្តនៅតាមបណ្តាខេត្តនៅក្រសួងព័ត៌មាន។
ការចេញលិខិតដែលមានចំណារយល់ព្រមពីលោកនាយករដ្ឋមន្ត្រី ហ៊ុន សែន ដែរនោះ ហើយ ត្រូវបានបង្ហោះនៅលើទំព័រហ្វេសប៊ុកលោក សម រង្ស៊ី ប្រធានគណបក្សសង្គ្រោះជាតិ បានធ្វើឡើងបន្ទាប់ពីជំនួបរវាងមេដឹកនាំគណបក្សជាប់ឆ្នោតទាំងពីរកាលពីថ្ងៃសុក្រម្សិលមិញ។
នៅក្នុងចំណុចទី១នៃលទ្ធផលជំនួប ហ៊ុន សែន-សម រង្សី នេះដែរ ត្រូវបានគូសបញ្ជាក់ថា ចំពោះសំណើរសុំរបស់លោក សម រង្សី ទាក់ទងទៅនឹងការដាក់ឲ្យដំណើរការស្ថានីយទូរទស្សន៍ និងការដាក់ឲ្យស្ថានីយវិទ្យុផ្សាយបន្តនៅតាមខេត្ត លោកនាយករដ្ឋមន្ត្រី ហ៊ុន សែនបានផ្តល់ការឯកភាពជាគោលការណ៍ ដោយតម្រូវឲ្យក្រុមហ៊ុនពាក់ព័ន្ធត្រូវបំពេញបែបបទស្នើសុំអាជ្ញាប័ណ្ណនៅក្រសួងព័ត៌មាន។
លោក យ៉ែម បុញ្ញឬទ្ធិ អ្នកនាំពាក្យគណបក្សសង្គ្រោះជាតិថ្លែងថា ជាគោលការណ៍គណបក្សរបស់លោកយល់ព្រមផ្សាយជាបណ្តោះអាសន្នសិនតាមប្រព័ន្ធAnalog ដោយសារតែប្រព័ន្ធនេះមានគុណភាពមិនទាន់ល្អដូចផ្សាយតាមប្រព័ន្ធDigital មែនតែអ្នកទស្សនា អាចមើលទូរទស្សន៍ថ្មីនេះបានភ្លាម។ ដោយឡែកទាក់ទងទៅនឹងការចាប់ផ្តើមវិញ អ្នកនាំពាក្យរូបនេះបញ្ជាក់ថា កំពុងតែរៀបចំកម្មវិធី និងដំណើរការផ្សេងៗទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ