លោកសម រង្ស៊ី៖ ស្ថានភាពរវាងបក្សប្រជាជន និងសង្គ្រោះជាតិមិនតានតឹងនោះទេ
ប្រធានគណបក្សសង្គ្រោះជាតិលោក សម រង្ស៊ីនៅថ្ងៃអង្គារទី២៥ វិច្ឆិកានេះ បានលើកឡើងថាស្ថានភាពនៃការចរចាមិនត្រូវគ្នារវាងជាប់ឆ្នោតទាំងពីរស្តីពីគ.ជ.ប និងការចាប់ខ្លួនសកម្មជនគណបក្សសង្គ្រោះជាតិនោះ មិនមានជាបញ្ហាធំដុំអ្វីនោះទេ។ ប៉ុន្តែត្រូវការពិភាក្សា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
លោក សម រង្ស៊ីបានវាយតម្លៃស្ថានការនយោបាយរវាងគណបក្សប្រជាជនកម្ពុជា និងគណបក្សសង្គ្រោះជាតិនាពេលបច្ចុប្បន្នថា មិនតឹងតែងនោះទេ ហើយមេដឹកនាំគណបក្សទាំងពីរនឹងត្រូវតែជួបគ្នាដើម្បីបិទបញ្ជប់ភាពតានតឹងដែលនៅសេសសល់នេះ។ ការអះអាងរបស់ប្រធានបក្សប្រឆាំងបែបនេះខណៈដែលការចាប់ខ្លួនបេក្ខជនតំណាងរាស្ត្រគណបក្សប្រឆាំងលោក មាជ សុវណ្ណរ៉ាមិនទាន់ដោះស្រាយបាននៅឡើយ ហើយលទ្ធផលនៃការចរចារវាងគណបក្សទាំងពីរស្តីពីការបោះឆ្នោតនៅតែគ្មានលទ្ធផលសម្រេចនោះ។
លោកសម រង្ស៊ី បានឱ្យដឹងថាករណីទាំងពីរដែលនៅជាប់គាំងនោះ គឺក្លាយជារបៀបវារៈនៃការចរចាថ្នាក់កំពូលនយោបាយរវាងលោក និងលោកនាយករដ្ឋមន្ត្រីហ៊ុន សែននាពេលខាងមុខ។ ប៉ុន្តែលោកសមរង្ស៊ី មិនទាន់បានបញ្ជាក់ពីពេលវេលាជំនួបកំពូលរវាងមេដឹកនាំទាំងពីរនោះទេ។ លោកបានសង្កត់ធ្ងន់ថា “លោកមិនអាចកំណត់ជំនួបបាននោះទេ ពោលគឺត្រូវការយល់ព្រមពីភាគីខាងគណបក្សប្រជាជនកម្ពុជា។
សូមរំលឹកថាស្ថានភាពនយោបាយនៅកម្ពុជាត្រូវបានគេមើលឃើញថាមានភាពតានតឹងឡើងវិញ ព្រោះថាបេក្ខជនតំណាងរាស្ត្រគណបក្សសង្គ្រោះជាតិត្រូវបានចាប់ដាក់ពន្ធនាគាជាប់ពាក់ព័ន្ធនឹងបាតុកម្មកាលពីខែកក្កដា។ ចំណែកឯ ក្រុមការងារគណបក្សប្រជាជនកម្ពុជា និងគណបក្សសង្គ្រោះជាតិនៅមិនទាន់សម្រេចដាច់ស្រាច់ជាមួយនៅឡើយនោះទេ។ ករណីនេះចំពោះលោក សម រង្ស៊ី វប្បធម៌នៃការជួបពិភាក្សាគ្នាត្រូវតែបន្តពង្រឹង។
ជាការកត់សំគាល់ថា ខុសពីលោកសម រង្ស៊ីដែលបានលើកឡើងថាស្ថានការណ៍នយោបាយរវាងគណបក្សទាំងពីរមិនតានតឹងនោះ លោកកឹម សុខាអនុប្រធានគណបក្សសង្គ្រោះជាតិ និងជាអនុប្រធានសភា បានប្រកាសដើរចេញពីសភាប្រសិនបើមិនអាចដូរគណៈកម្មាធិការជាតិរៀបចំការបោះឆ្នោតនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ