សង្គ្រោះជាតិជ្រើសរើសអនុប្រធាន ៣រូបដោយគ្មានការកែប្រែ បើទោះបីជាមានការបដិសេធច្រើនលើក
គណៈកម្មាធិការនាយកគណបក្សរបស់គណបក្សសង្គ្រោះជាតិបានជួបប្រជុំគ្នានៅថ្ងៃទី ១៧ ឧសភានេះដើម្បីជ្រើសរើសអនុប្រធានទាំង ៣រូបដែល បន្ទាប់ពីក្រសួងមហាផ្ទៃបានទទួលស្គាល់លក្ខន្តិកៈជាផ្លូវការណ៍កាលពីថ្ងៃទី ២៥ មេសា។ ក្រោយកិច្ចប្រជុំបេក្ខភាពអនុប្រធានទាំងបីគឺគ្មានការផ្លាស់ប្តូរនោះទេ។
ចុះផ្សាយនៅថ្ងៃ៖
ស្តាប់ - ០២:១៨
លោកអេង ឆៃអ៊ាង លោកស្រីមូរ សុខហួរ និងលោកប៉ុល ហំមនៅតែជាអនុប្រធានគណបក្សសង្គ្រោះជាតិដដែល បន្ទាប់ពីការបដិសេធជាច្រើនលើករបស់ក្រសួងមហាផ្ទៃ។ គណៈកម្មាធិការនាយកគណបក្សនៅថ្ងៃទី ១៧ ឧសភាបានសម្រេចដោយសំឡេងស្ទើរជា ឯកច្ឆន្ទក្នុងចំណោមសមាជិកប្រមាណ ៩៨នាក់ ជ្រើសរើសសមាជិកជាន់ខ្ពស់គណបក្សទាំង ៣រូបនេះ។ ក្នុងការជ្រើសរើសនេះ លោក កឹម សុខា ប្រធានគណបក្សបានធ្វើជាអធិបតីភាព។
សូមបញ្ជាក់ថា ទំរាំបានក្លាយជាប្រធាន និងអនុប្រធានពេញសិទ្ធិដូចពេលនេះ គណបក្សសង្គ្រោះជាតិ និងក្រសួងមហាផ្ទៃឆ្លងកាត់ការផ្ទុះវោហារសាស្ត្រដាក់គ្នាជាច្រើនលើក ជាច្រើនសារ។
ក្រោយលោកសម រង្ស៊ី បានចាក់ចេញពីតំណែងប្រធានគណបក្សសង្គ្រោះជាតិកាលពីថ្ងៃទី ១៦ កុម្ភៈ គណបក្សសង្គ្រោះជាតិបានធ្វើសមាជវិសាមញ្ញម្តងហើយកាលពីថ្ងៃទី០២ មិនាដើម្បីជ្រើសរើសប្រធាន និងអនុប្រធានគណបក្សដោយប្រើប្រាស់រូបមន្ត ប្រធាន ១រូប និងអនុប្រធានចំនួន៣រូប។ ប៉ុន្តែកាលណោះក្រសួងមហាផ្ទៃមិនព្រមទទួលស្គាល់ព្រោះតែខុសលក្ខន្តិកៈផ្ទៃក្នុងរបស់គណបក្សប្រឆាំងខ្លួនឯងត្រង់ប្រការ ៤៧ចាស់។ ប្រការនេះ មិនអនុញ្ញាតឱ្យមានការជ្រើសរើសអនុប្រធានគណបក្សរហូតដល់បីរូបនោះទេ។
វាជាពេលដែល ក្រសួងមហាផ្ទៃ និងគណបក្សប្រឆាំងបានកើនឡើងដល់ចំណុចតានតឹងមួយ និងមានការធ្វើអត្ថាធិប្បាយរិះគន់គ្នាទៅវិញទៅមកផងដែរ។ ប៉ុន្តែក្រោយមកគណបក្សសង្គ្រោះជាតិ បានបន្ទន់ឥរិយាបថសម្របសម្រួលធ្វើសមាជកែប្រែប្រការ ៤៧សាជាថ្មីនៅថ្ងៃទី២៥ មេសា ឱ្យគណបក្សប្រឆាំងមួយនេះ មានអនុប្រធានលើសពី ១ដែលជាការសម្រេចនយោបាយផ្ទៃក្នុងរបស់បក្ស និងបានផ្ញើរទៅកាន់ក្រសួងមហាផ្ទៃឱ្យទទួលស្គាល់លក្ខន្តិកៈថ្មីនេះ។ ទើបថ្ងៃទី០៣ ឧសភា ក្រសួងមហាផ្ទៃបានប្រកាសទទួលស្គាល់។
លោកអេង ឆៃអ៊ាង អនុប្រធានគណបក្សសង្គ្រោះជាតិ បានប្រាប់វិទ្យុបារាំងថា ចាប់ពីពេលនេះ តទៅគណបក្សមានគ្រប់លក្ខណៈសម្បត្តិដើម្បីចូលរួមការបោះឆ្នោតក្រុមប្រឹក្សាឃុំសង្កាត់ដូចអ្វីដែលក្រសួងមហាផ្ទៃបានណែនាំដែលឱ្យគ្រប់គណបក្សនយោបាយត្រូវមានការរៀបរយចំពោះកិច្ចការផ្ទៃក្នុងមុនថ្ងៃទី ៥ មិថុនា។ សូមបញ្ជាក់ថា ការជ្រើសរើសអនុប្រធានគណបក្សសង្គ្រោះជាតិនេះគឺធ្វើឡើងតែ ៣ថ្ងៃប៉ុណ្ណោះមុនការចាប់ផ្តើមឃោសនាស្វែងរកសំឡេងឆ្នោតសម្រាប់ការបោះឆ្នោតក្រុមប្រឹក្សាឃុំសង្កាត់អាណត្តិទី ៤ដែលនឹងត្រូវធ្វើឡើងនៅថ្ងៃទី ២០ ឧសភានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ