គជប ទទួលអនុសាសន៍ពីស្ថាប័នចំនួន១០ មុនដាក់ឲ្យប្រើប្រាស់បទបញ្ជានិងនីតិវិធីសម្រាប់ការបោះឆ្នោតជាតិ
គណៈកម្មាធិការជាតិរៀបចំការបោះឆ្នោត នៅថ្ងៃទី២៣មករាម្សិលមិញ បានបើកកិច្ចប្រជុំពិគ្រោះយោបល់លើសេចក្ដីព្រាងបទបញ្ជា និងនីតិវិធីសម្រាប់ការបោះឆ្នោតជ្រើសតាំងតំណាងរាស្ត្រ នៅភោជនីយដ្ឋានទន្លេបាសាក់២។ នៅក្នុងកិច្ចប្រជុំពេញមួយថ្ងៃ គជប បានទទួលអនុសាសន៍នានាពីសំណាក់ស្ថាប័នយ៉ាងហោចណាស់ចំនួន១០។ ជាអនុសាសន៍ដែល គជប អះអាងថា ខ្លួននឹងយកទៅពិនិត្យពិភាក្សា មុននឹងសម្រេចដាក់ឲ្យប្រើប្រាស់បទបញ្ជានិងនីតិវិធីជាផ្លូវការនាពេលក្រោយ។
ចុះផ្សាយនៅថ្ងៃ៖
ស្តាប់ - ០២:៣៣
អនុសាសន៍ដែលត្រូវបានលើកឡើងទៅកាន់ គជប ពីសំណាក់ភាគីពាក់ព័ន្ធ នៅក្នុងកិច្ចប្រជុំពិគ្រោះយោបល់នៅថ្ងៃទី២៣មករា ផ្ដោតសំខាន់ទៅលើសន្លឹកឆ្នោតមិនបានការ។ ក្នុងនោះ ភាគីជប៉ុន អង្គការខុមហ្វ្រែល និងគណបក្សប្រជាធិបតេយ្យមូលដ្ឋាន បានស្នើសុំឲ្យបោះត្រាបោះឆ្នោតលើសន្លឹកឆ្នោត ដើម្បីកាត់បន្ថយចំនួនឆ្នោតមិនបានការ។ ក្នុងគោលដៅដូចគ្នាដែរ គណបក្សប្រជាជនកម្ពុជា បានស្នើឲ្យ គជប ពិចារណាជ្រើសយកជម្រើស ឬវិធីសាស្ត្រណាមួយ ដូចជាប្រើប៊ិចដែលអាចចុចចេញសញ្ញាធិចគាំទ្រ។ សំណើនេះធ្វើឡើងដោយគណបក្សនេះយល់ថា អាចដោះស្រាយបញ្ហាតវ៉ារឿងសន្លឹកឆ្នោតបានការ ឬមិនបានការនៅពេលរាប់សន្លឹកឆ្នោតបាន។ ទន្ទឹមគ្នានេះដែរ អង្គការអរុណរះ បានស្នើសុំឲ្យ គជប ពន្យល់ប្រជាពលរដ្ឋឲ្យបានច្បាស់លាស់ អំពីការគូសសញ្ញាគាំទ្រគណបក្សនយោបាយនៅលើសន្លឹកឆ្នោត។
ដោយឡែក ចំពោះអង្គការនិកហ្វិចវិញ បានស្នើឲ្យមានការបន្ថយចំនួនសន្លឹកឆ្នោតបម្រុងពី២០ភាគរយ មកត្រឹម៥ភាគរយនៃចំនួនសន្លឹកឆ្នោតដែលបានបោះពុម្ព។ សម្រាប់អង្គការក្រៅរដ្ឋាភិបាលនេះ គជប ក៏ចាំបាច់ត្រូវពន្យល់បញ្ជាក់ឲ្យបានច្បាស់លាស់ផងដែរ អំពីការអនុញ្ញាតឲ្យអ្នកបោះឆ្នោត អាចឈរសង្កេតមើលការរាប់សន្លឹកឆ្នោតនៅការិយាល័យរាប់សន្លឹកឆ្នោត។ ទាក់ទងនឹងបញ្ហានេះ ភាគីជប៉ុន បានស្នើតែម្ដងទៅកាន់ គជប ថា គួរអនុញ្ញាតឲ្យអ្នកបោះឆ្នោតអាចឈរក្នុងបរិវេណខាងក្នុងការិយាល័យបោះឆ្នោត សង្កេតមើលការរាប់សន្លឹកឆ្នោត ខណៈនៅក្នុងការបោះឆ្នោតឃុំសង្កាត់កាលពីឆ្នាំមុន មណ្ឌលបោះឆ្នោតជាច្រើនត្រូវបានបិទនៅពេលរាប់សន្លឹកឆ្នោត មិនអនុញ្ញាតឲ្យម្ចាស់ឆ្នោតចូលរួមសង្កេតមើលការរាប់សន្លឹកឆ្នោតបានឡើយ។
បញ្ហាការប្រើប្រាស់អត្តសញ្ញាណបណ្ណសម្រាប់បោះឆ្នោត ក៏ត្រូវបានលើកឡើងផងដែរ។ ជាការលើកឡើងរបស់គណបក្សប្រជាជនកម្ពុជា ដែលផ្ដល់យោបល់ទៅកាន់ គជប ថា គួរតែប្រើប្រាស់អត្តសញ្ញាណបណ្ណសញ្ជាតិខ្មែរតែមួយគត់ជាគោលសម្រាប់ការងារបោះឆ្នោត។ ប៉ុន្តែសម្រាប់គណបក្សប្រជាធិបតេយ្យមូលដ្ឋានវិញ បើទោះបីជាមានអត្តសញ្ញាណបណ្ណសញ្ជាតិខ្មែរក៏ដោយ ក៏មិនគួរត្រូវអនុញ្ញាតឲ្យបោះឆ្នោតដែរ ប្រសិនបើជននោះជាជនបរទេស។
គជប បានចាត់ទុកអ្វីដែលភាគីពាក់ព័ន្ធលើកឡើងខាងដើមនេះថា ជាធាតុចូលដ៏សំខាន់។ ប៉ុន្តែ គជប បានបញ្ជាក់ថា ខ្លួននឹងពិនិត្យពិភាក្សា និងសម្រេចជាចុងក្រោយម្ដងទៀត ចំពោះអនុសាសន៍ដែលបានលើកឡើង មុននឹងសម្រេចដាក់ឲ្យប្រើប្រាស់បទបញ្ជា និងនីតិវិធីសម្រាប់ការបោះឆ្នោតជាតិជាផ្លូវការ។ យ៉ាងណាក៏ដោយ គជប សង្ឃឹមថា តាមរយៈអនុសាសន៍ទាំងនេះ គជប នឹងពិចារណាកែសម្រួលបន្ថែម ធ្វើយ៉ាងណាឲ្យការបោះឆ្នោតជាតិនាខែកក្កដាខាងមុខ ប្រព្រឹត្តទៅដោយសេរី ត្រឹមត្រូវ យុត្តិធម៌ និងមានតម្លាភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ