តុលាការកាត់ទោសលោកហុង សុខហួរឲ្យជាប់គុក៧ឆ្នាំរឿងក្លែងឯកសារព្រំដែនកម្ពុជា-វៀតណាម
ចៅក្រមតុលាការក្រុងភ្នំពេញនៅរសៀលនេះ បានប្រកាសសាលក្រមផ្តន្ទាទោសលោកហុង សុខហួរ អតីតសមាជិកព្រឹទ្ធសភាគណបក្សសម រង្ស៊ីឲ្យជាប់ពន្ធនាគាររយៈពេល៧ឆ្នាំក្រោមបទចោទប្រកាន់ក្លែងបន្លំឯកសារសាធារណៈ ប្រើប្រាស់ឯកសារសាធារណៈក្លែង និងបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គមពាក់ព័ន្ធនឹងរឿងក្លែងឯកសារព្រំដែនកម្ពុជា-វៀតណាម។ លោកហុង សុខហួរ និងមេធាវីមិនបានចូលរួមស្ដាប់ការប្រកាសនេះទេ។ គណបក្សសង្គ្រោះជាតិបានសម្តែងការសោកស្តាយចំពោះការសម្រេចនេះ។ ចំណែកមេធាវីការពារក្តីវិញ នៅមិនទាន់ច្បាស់ថាត្រូវប្តឹងឧទ្ធរណ៍ឫយ៉ាងណាឡើយ។ គិតមកដល់ពេលនេះ លោកហុង សុខហួរត្រួវតុលាការឃុំខ្លួននៅពន្ធនាគារព្រៃសជាងមួយឆ្នាំមកហើយ។ ឆ្លៀតពេលនេះ វណ្ណ សុគន្ធា សូមសង្ខេបពីដំណើររឿងក្តីរបស់លោកហុង សុខហួរនេះឡើងវិញជូនលោកអ្នកស្ដាប់ ៖
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
លោកហុង សុខហួរ ត្រូវបានអាជ្ញាធរចាប់ខ្លួនវាយខ្នោះកាលពីថ្ងៃទី១៥ ខែសីហា ឆ្នាំ២០១៥ នៅក្នុងភូមិគ្រឹះមួយកន្លែងស្ថិតនៅក្នុងសង្កាត់ភ្នំពេញថ្មី រាជធានីភ្នំពេញក្រោមសម្លៀកបំពាក់ជាសមាជិកព្រឹទ្ធសភា និង មានអភ័យឯកសិទ្ធិព្រឹទ្ធសភាក្នុងដៃផង។ ការចាប់ខ្លួននោះ គឺបានធ្វើឡើងតាមបញ្ជាផ្ទាល់មាត់របស់លោកនាយករដ្ឋមន្ត្រីហ៊ុន សែន កាលពីថ្ងៃទី១៣ ខែសីហា ដោយបានចោទប្រកាន់លោកហុង សុខហួរថាបានក្លែងបន្លំសន្ធិសញ្ញាព្រំដែនកម្ពុជា-វៀតណាមតាមរយៈបណ្តាញសង្គមហ្វេសប៊ុក។ កាលណោះ លោកហ៊ុន សែន បានហៅការក្លែងបន្លំសន្ធិសញ្ញានោះថា គឺជាទង្វើក្បត់ជាតិ និងមិនអាចលើកលែងបានទេ។
នៅថ្ងៃទី១៦ ខែសីហា ឆ្នាំ២០១៥ តុលាការក្រុងភ្នំពេញបានសម្រេចឃុំខ្លួនលោកហុង សុខហួរបណ្តោះអាសន្ននៅក្នុងពន្ធនាគារព្រៃសដោយបានប្រកាន់បីបទល្មើស គឺបទក្លែងឯកសាសារធារណៈ ប្រើបាស់ឯកសារសាធារណៈក្លែងនិងបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គមពាក់ព័ន្ធនឹងសន្ធិសញ្ញាព្រំដែនកម្ពុជា-វៀតណាមឆ្នាំ១៩៧៩។ សូមបញ្ជាក់ត្រង់ចំណុចនេះថា អតីតសមាជិកព្រឹទ្ធសភារបស់គណបក្សសម រង្ស៊ី រូបនេះ ត្រូវបានអាជ្ញាធរយកទៅឃុំខ្លួនទាំងដែលកំពុងមានអភ័យឯកសិទ្ធិនៅជាប់នឹងខ្លួននៅឡើយ។
លុះដល់ថ្ងៃទី១៧ ខែសីហា ឆ្នាំដដែល ព្រឹទ្ធសភាកម្ពុជាបានប្រជុំសម្ងាត់ និងបានសម្រេចឲ្យតុលាការបន្តនីតិវិធីផ្លូវច្បាប់ទៅលើសមាជិករបស់ខ្លួនលោកហុង សុខហួរ ដោយសំអាងថា ការប្រព្រឹត្តរបស់លោកហុង សុខហួរ គឺជាបទល្មើសជាក់ស្ដែងទៅតាមរបាយការណ៍របស់សមត្ថកិច្ច តំណាងអយ្យការ និងរបស់ចៅក្រមតុលាការក្រុងភ្នំពេញ។
ក្រោយពីត្រូវបានឃុំខ្លួនក្នុងពន្ធនាគារ ជាបន្តបន្ទាប់លោកហុង សុខហួរតាមរយៈមេធាវីការពារក្តីបានប្តឹងសុំនៅក្រៅឃុំបណ្តោះអាសន្នវិញតាំងពីតុលាការជាន់ទាប សាលាឧទ្ធរណ៍ រហូតដល់តុលាការកំពូល ប៉ុន្តែវាជាការឥតប្រយោជន៍សោះ បើទោះបីលោកលើកពីហេតុផលថា មានបញ្ហាសុខភាពក៏ដោយ។
សូមជំរាបជូនបន្ថែមថា សំណុំរឿងក្លែងសន្ធិសញ្ញាព្រំដែនកម្ពុជា-វៀតណាមនេះ ក្រៅពីលោកហុង សុខហួរដែលកំពុងត្រូវបានឃុំខ្លួនក្នុងពន្ធនាគារនោះ លោកសម រង្ស៊ី ដែលជាប្រធានគណបក្សសង្រ្គោះជាតិឯណោះវិញក៏ត្រូវបានតុលាការខ្មែរចោទប្រកាន់ថា បានសមគំនិតជាមួយលោកហុង សុខហួរដែរ ព្រោះថា វីឌីអូខ្លីបនៃការបកស្រាយសន្ធិសញ្ញាព្រំដែនកម្ពុជា-វៀតណាមរបស់លោកហុង សុខហួរ ត្រូវបានបង្ហោះនៅលើទំព័រហ្វេសប៊ុកផ្លូវការរបស់លោកសម រង្ស៊ី។ លោកសម រង្ស៊ី ត្រូបានតុលាការបង្គាប់ឲ្យចូលខ្លួនមកកាន់តុលាការនៅថ្ងៃទី២៥ វិច្ឆិកា ខាងមុខនេះ។
គណបក្សសង្រ្គោះជាតិ បានចាត់ទុករឿងរ៉ាវទាំងអស់នេះថា គឺជារឿងនយោបាយដែលត្រូវតែដោះស្រាយតាមផ្លូវនយោបាយ។ ប៉ុន្តែគណបក្សប្រជាជនកម្ពុជាដែលកំពុងកាន់រដ្ឋាភិបាលបច្ចុប្បន្នបានបដិសេធថា វាគឺជារឿងផ្លូវច្បាប់សុទ្ធសាធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ