កិច្ចប្រជុំចង្អៀតនៅភ្នំពេញ បរាជ័យ
កិច្ចប្រជុំចង្អៀតស្តីពីព្រំដែនកម្ពុជា-វៀតណាម នៅភ្នំពេញ បានបិទបញ្ចប់ហើយរយៈពេល២ថ្ងៃនៅភ្នំពេញ។ ប៉ុន្តែកិច្ចប្រជុំ ដែលធ្វើឡើងបន្ទាប់ពីកំណត់ទូតតវ៉ារបស់កម្ពុជា ជាច្រើនលើកនេះ បានបរាជ័យចេញសេចក្តីថ្លែងការណ៍រួមមិនបាន។ ភាគីវៀតណាមមិនព្រមតាមសំណើរបស់កម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
កិច្ចប្រជុំព្រំដែនពិសេសរវាងកម្ពុជា និងវៀតណាម បានបរាជ័យដោយភាគីទាំងពីរបានខ្វែងគំនិតគ្នាលើគោលការណ៍ធំនៅចំណុចព្រំដែន។ លោកវ៉ា គឹមហុង ប្រធានគណៈកម្មការកិច្ចការព្រំដែន បានប្រាប់អ្នកសារព័ត៌មានក្រោយកិច្ចប្រជុំពីរថ្ងៃនេះថា មិនទាន់មានសេចក្តីថ្លែងការណ៍រួមអ្វីទេ ដោយសារភាគីទាំងពីរនៅខ្វែងគំនិត។
កិច្ចប្រជុំគណៈកម្មការព្រំដែនកម្ពុជា-វៀតណាម បានធ្វើឡើងរយៈពេល២ថ្ងៃមកហើយ នៅទីស្តីការគណៈរដ្ឋមន្រ្តី គឺចាប់តាំងពីថ្ងៃទី២៩ សីហាម្សិលមិញមក។ កម្ពុជាបានដាក់របៀបវារៈស្តីពីការកសាងអគារ ប៉ុស្តិ៍នគបាល និងការជីកស្រះតាមព្រំដែន ដែលវៀតណាមបានកសាងនៅតំបន់សក្នុងទឹកដីកម្ពុជា ហើយស្នើឱ្យវៀតណាមបញ្ឈប់សកម្មភាពសាងសង់ និងស្នើសុំរុះរើសំណង់អគារ ប៉ុន្តែវៀតណាមនៅមិនទាន់ឯកភាពនៅឡើយ។ ក្រៅពីនេះ ភាគីទាំងពីរ ក៏មិនបានឯកភាពលើការសុំជំនួយបច្ចេកទេសពីបារាំង ដើម្បីជាមួលដ្ឋានវែកញែក តំបន់ខណ្ឌចែកប្រទេសទាំងពីរផងដែរ។
សូមកត់សម្គាល់ថា កម្ពុជាបានផ្ញើកំណត់ទូតចំនួន២៣ និងលិខិតចំនួន១ទៅកាន់វៀតណាម ដើម្បីតវ៉ាអំពីការរំលោភបំពានតាមបន្ទាត់ព្រំដែនកម្ពុជា-វៀតណាមដែលមាននៅក្នុងខេត្តរតនៈគីរី មណ្ឌលគីរី ស្វាយរៀង កណ្តាល និងខេត្តតាកែវជាដើម។
បើទោះបីជាកិច្ចប្រជុំចង្អៀតរវាងកម្ពុជា និងវៀតណាមបរាជ័យ មិនអាចចេញសេចក្តីថ្លែងការណ៍រួមនេះ ប៉ុន្តែលោកវ៉ា គឹមហុង បានអះអាងថាភាគីទាំងពីរនឹងបន្តការចរចា ដើម្បីដោះស្រាយបញ្ហាខ្វែងគំនិតគ្នាលើបញ្ហាព្រំដែននេះ និងឈានដល់ការចេញសេចក្តីថ្លែងការណ៍រួម និងការអន្តរាគមន៍ពីប្រទេសបារាំងលើជំនួយបច្ចេកទេសផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ