ក្ដីសង្ឃឹមរបស់បក្សប្រជាជនកំពុងដើរផ្ទុយពីការពិតឬ?
ចុះផ្សាយនៅថ្ងៃ៖
ស្តាប់ - ០៤:៣១
ចុងសប្ដាហ៍កន្លងទៅនេះ គណបក្សប្រជាជនបានជួបជុំសមាជិករបស់ខ្លួននៅក្នុងសន្និបាតគណៈកម្មាធិការកណ្ដាលរយៈពេល២ថ្ងៃពេញ។ នៅក្នុងសន្និបាតនេះ ទាំងថ្នាក់ដឹកនាំនិងសមាជិកគណបក្សកាន់អំណាចបានបង្ហាញពីក្ដីសង្ឃឹមថា ខ្លួននឹងទទួលបានការគាំទ្រពីពលរដ្ឋនៅក្នុងការបោះឆ្នោតក្រោយៗ ដើម្បីឈានទៅដឹកនាំប្រទេសបន្តទៀត។ នេះគឺជាក្ដីសង្ឃឹមរបស់គណបក្សកាន់អំណាច។ ប៉ុន្តែក្នុងស្ថានភាពជាក់ស្ដែង ប្រជាប្រិយភាពរបស់គណបក្សប្រជាជនកម្ពុជា ដែលមានវ័យ៦៥ឆ្នាំនេះ បានធ្លាក់ចុះបន្តិចហើយ នៅក្នុងការបោះឆ្នោតចុងក្រោយ កាលពីឆ្នាំ២០១៣កន្លងទៅ។ តើក្ដីសង្ឃឹមរបស់បក្សប្រជាជន កំពុងដើរផ្ទុយពីការពិតឬ? តើគណបក្សប្រជាជនត្រូវធ្វើអ្វីដើម្បីទាក់ទាញការគាំទ្រត្រឡប់មកវិញ?
៦៥ឆ្នាំកន្លងទៅនេះ គណបក្សប្រជាជនកម្ពុជា ដែលមានឈ្មោះដើមថា គណបក្សប្រជាជនបដិវត្តន៍កម្ពុជា បានចូលប្រឡូកយ៉ាងខ្លាំងក្លា នៅក្នុងសកម្មភាពរំដោះប្រទេស ទាំងចេញពីនឹមអាណានិគមនិយមបារាំង និងរបបអាវខ្មៅប៉ុលពត។ នេះជាសច្ចភាពដែលគ្មាននរណាអាចប្រកែកបានឡើយ។ បង្កើតឡើងតាំងពីឆ្នាំ១៩៥១ គណបក្សប្រជាជនកម្ពុជា ត្រូវបានគេចាត់ទុក ឬចាត់ទុកខ្លួនឯងថា ជាគណបក្សចំណាស់ជាងគេមួយ ដែលមានបទពិសោធន៍រឹងមាំក្នុងការដឹកនាំប្រទេស។ គណបក្សនេះ មានបណ្ដាញបក្សក៏ដូចជាបណ្ដាញផ្នែករដ្ឋបាលតាំងពីថ្នាក់លើដល់ថ្នាក់ក្រោម។ បណ្ដាញរឹងមាំ ថវិកាសម្បូរបែប និងអំណាចពេញដៃ គឺជាអំណោយផលដល់ការយកប្រៀបទៅលើគូប្រជែង។
បន្ទាប់ពីឈ្នះឆ្នោតភ្លូកទឹកភ្លូកដីកាលពីឆ្នាំ២០០៨ទទួលបាន៩០អាសនៈ ឥទ្ធិពលនិងប្រជាប្រិយភាពនៃគណបក្សប្រជាជនបានស្រុតចុះវិញ ដោយគណបក្សនេះ បាត់បង់អាសនៈចំនួន២២ទៅឲ្យគណបក្សសង្គ្រោះជាតិ នៅក្នុងការបោះឆ្នោតឆ្នាំ២០១៣។ តាមរយៈលទ្ធផលនៃការបោះឆ្នោតចុងក្រោយនេះ រដ្ឋាភិបាលមកពីគណបក្សប្រជាជនបានរុះរើគណៈរដ្ឋមន្ដ្រីទ្រង់ទ្រាយធំ និងបានដាក់ចេញនូវផែនការកំណែទម្រង់ស៊ីជម្រៅលើគ្រប់វិស័យ ដើម្បីស្ដារប្រជាប្រិយភាពឡើងវិញ។ ប៉ុន្តែយ៉ាងណាក៏ដោយ រហូតមកទល់ពេលនេះ កំណែទម្រង់ដែលបានដាក់ចេញរួចហើយ មានតិចណាស់ដែលធ្វើដំណើរទៅមុខ ខណៈកំណែទម្រង់ក្នុងវិស័យខ្លះទៀត ហាក់មានល្បឿនយឺតយ៉ាវ។ មួយចំនួនទៀត មិនមានកំណែទម្រង់សោះតែម្ដង។
មានឧបសគ្គមួយចំនួន ដែលធ្វើឲ្យកំណែទម្រង់របស់រដ្ឋាភិបាលមកពីគណបក្សប្រជាជន មិនអាចធ្វើដំណើរទៅមុខបានលឿន ឬមិនមានកំណែទម្រង់សោះតែម្ដង៖
ដំបូង៖ ដោយសារតែកំណែទម្រង់នោះ ដាក់ចេញមិនចំទិសដៅ។ ឬនិយាយឲ្យស្រួលស្ដាប់គឺ គណបក្សកាន់អំណាចដែលគ្រប់គ្រងរដ្ឋាភិបាល អេះមិនចំកន្លែងរមាស់។ សង្គមកម្ពុជាជួបបញ្ហាជាច្រើន ប៉ុន្តែគួរឲ្យសោកស្ដាយ រដ្ឋាភិបាលគណបក្សកាន់អំណាច ពេលខ្លះ មិនទទួលស្គាល់បញ្ហាទាំងនោះទេ។ មិនទទួលស្គាល់ព្រោះទី១ រដ្ឋមិនយល់ថា វាជាបញ្ហា។ និងទី២ មិនទទួលស្គាល់ព្រោះខ្លាចបាក់មុខ។ ការមិនទទួលស្គាល់បញ្ហា ធ្វើឲ្យរដ្ឋាភិបាលធ្វើកំណែទម្រង់និងដោះស្រាយមិនចំបញ្ហា ឬដោះស្រាយមិនបានស៊ីជម្រៅដល់ឫសគល់ពិតប្រាកដនៃបញ្ហា។
ក្រៅពីនេះ មន្ត្រីមួយចំនួននៃគណបក្សកាន់អំណាច មានទម្លាប់គិតតែផលប្រយោជន៍ផ្ទាល់ខ្លួន ធំជាងប្រយោជន៍បក្សនិងប្រយោជន៍ជាតិ។ មានមន្ត្រីជាច្រើនប្រើប្រាស់តួនាទីរបស់ខ្លួនដើម្បីស្វែងរកលាភសក្ការៈឲ្យគ្រួសាររបស់ខ្លួនតាមគ្រប់លទ្ធភាពដោយ មិនខ្វល់ខ្វាយពីរូបភាពអវិជ្ជមានដល់គណបក្សនិងដល់ប្រទេសជាតិឡើយ។ អ៊ីចឹងហើយបានជានៅកម្ពុជា មន្ត្រីដែលធ្វើការចំកន្លែងលុយតែងបង្ហាញទ្រព្យសម្បត្តិរបស់ខ្លួន យ៉ាងសម្ញែងនិងយ៉ាងឆាប់រហ័សដោយមិនខ្វល់ពីភ្នែកអ្នកជិតខាងឬកូនចៅ ក្រោមបង្គាប់ឡើយ។ បញ្ហានេះជះរូបភាពអាក្រក់ខ្លាំងណាស់ចំពោះគណបក្សកាន់អំណាច និយាយដោយឡែក និងចំពោះ មុខមាត់ប្រទេសទាំងមូលនិយាយជារួម។
ដោយឡែក អំពើពុករលួយ ក៏បានពន្យឺតឬបង្អាក់ដំណើរកំណែទម្រង់ផងដែរ។ រដ្ឋាភិបាលគណបក្សកាន់អំណាចបានទទួលស្គាល់ខ្លួនឯងថា មានអំពើពុករលួយក្នុងកម្រិតមួយ និងបានបង្ហាញពីឆន្ទៈរបស់ខ្លួនក្នុងការលុបបំបាត់អំពើពុករលួយនេះ។ ប៉ុន្តែយ៉ាងណាក៏ដោយ របាយការណ៍នានាពីអង្គការសង្គមស៊ីវិល ដែលបង្ហាញពីអំពើពុករលួយស៊ីរូងនៅក្នុងជួររដ្ឋាភិបាល ជារឿយៗត្រូវបានបដិសេធចោល។ អំពើពុករលួយបានបង្កើតបញ្ហាចាក់ស្រែះយ៉ាងច្រើននៅក្នុងសង្គម។ អំពើពុករលួយធ្វើឲ្យប្រជាពលរដ្ឋខកចិត្ត អស់ជំនឿ ឬអាក្រក់ជាងនេះ គឺស្អប់រដ្ឋាភិបាលតែម្ដង។ អំពើពុករលួយ ក៏រួមចំណែកធ្វើឲ្យរដ្ឋខាតបង់ថវិកាដែរ ដោយពេលខ្លះ រដ្ឋត្រូវចំណាយច្រើន ប៉ុន្តែបានទទួលផលមកវិញតិចជាដើម។
សម្រាប់រដ្ឋាភិបាលគណបក្សប្រជាជនកម្ពុជា កំណែទម្រង់ គឺជារឿងស្លាប់រស់ដែលត្រូវតែសម្រេចឲ្យបាន ប្រសិនបើគណបក្សនេះ នៅតែចង់ទាញយកការគាំទ្រនិងការជឿជាក់ពីប្រជាពលរដ្ឋត្រឡប់មកវិញ។ ហើយដើម្បីឲ្យកំណែទម្រង់ពិតប្រាកដអាចសម្រេចទៅបាន វាត្រូវការឆន្ទៈ និងការលះបង់ពីសំណាក់ថ្នាក់ដឹកនាំ និងមន្ដ្រីថ្នាក់ក្រោមគ្រប់លំដាប់ថ្នាក់ទាំងអស់។ ល្បែងនយោបាយណាមួយដែលមិនចាំបាច់ ជាពិសេសជាមួយគណបក្សប្រឆាំង គណបក្សកាន់អំណាចមិនគួរបន្តប្រថុយលេងតទៅទៀតទេ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ