មកដល់ពេលនេះ តើបក្សប្រជាជនកម្ពុជាជ្រុះកម្អែលកុម្មុយនិស្ត អស់ហើយឫនៅ?
ចុះផ្សាយនៅថ្ងៃ៖
ស្តាប់ - ១១:៥៣
ម្សិលមិញ គឺជាខួបទី ៦៥ឆ្នាំ នៃការបង្កើតគណបក្សប្រជាជនកម្ពុជា។ ៦៥ឆ្នាំមកនេះ ប្រមុខដឹកនាំគណបក្សប្រជាជន បានលើកឡើងពីសមិទ្ធផលធំៗ ដែលខ្លួនសម្រេចបាន ដើម្បីបុព្វហេតុជាតិមាតុភូមិ និងប្រជាជនកម្ពុជា។ តាមពិតទៅបើក្រឡេកទៅមើលប្រវត្តិសាស្រ្ត គណបក្សដែលកំពុងដឹកនាំរដ្ឋាភិបាលកម្ពុជាមួយនេះ មានកំណើតចេញពីគណបក្សកុម្មុយនិស្តឥណ្ឌូចិន ដែលត្រូវបានបង្កើតឡើងដោយ លោក ហូ ជីមិញ។ បន្ទាប់ពីវិវត្តខ្លួនទៅតាមរបត់នយោបាយបត់បែនជាច្រើនដំណាក់កាលមក គណបក្សនេះដែលមានឈ្មោះដើមថា “បក្សប្រជាជនបដិវត្តខ្មែរ” បានប្រែក្លាយមកជា “គណបក្សប្រជាជនកម្ពុជា” បច្ចុប្បន្ន។ ហេតុដូច្នេះហើយទើបមានការចោទសួរថា តើមកដល់ពេលនេះ គណបក្សប្រជាជនកម្ពុជាលែងមានឥទ្ធិពលនយោបាយបែបកុម្មុយនិស្តទៀតហើយឫនៅ?