លោកហ៊ុន សែន ពន្យល់យុវជនពីនយោបាយឈ្នះៗជាលើកទី២
លោកនាយករដ្ឋមន្ត្រីហ៊ុន សែន នៅថ្ងៃទី១៥ មិថុនានេះ បានផ្តល់បាឋកថា ស្តីពីគោលនយោបាយឈ្នះៗរបស់លោកទៅកាន់សិស្សសកលវិទ្យាល័យន័រតុន នៅទីក្រុងភ្នំពេញ។ ជាបាកឋាដែលបានលើកឡើងពីការកសាងសន្តិភាពនៅកម្ពុជាបន្ទាប់ពីមានភ្លើងសង្គ្រាមជិត៤ទស្សវត្ស។ ប៉ុន្តែគណបក្សប្រឆាំងថាបាឋកថានោះ គឺជាគ្រឹះ ប៉ុន្តែអ្វីដែលសំខាន់គឺការអភិវឌ្ឍបន្ត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ជាលើកទី២ហើយនៅថ្ងៃចន្ទនេះ ដែលប្រមុខរដ្ឋាភិបាលកម្ពុជា បានចំណាយមួយព្រឹកថ្លែងបាឋកថាស្តីពីគោលនយោបាយឈ្នះៗរបស់លោក។ ជាគោលនយោបាយដែលគណបក្ស កាន់អំណាចបានបញ្ជាក់ថាបានពន្លត់ភ្លើងសង្គ្រាមស៊ីវិលនៅកម្ពុជាប្រមាណ៤ទសវត្សរ៍។ ដូចលើកទី១ដែរ បាឋកថានេះ មិនអនុញ្ញាតឱ្យអ្នកសារព័ត៌មានចូលស្តាប់នោះទេ។
យ៉ាងណាក៏ដោយ លោកសួស យ៉ារ៉ា អ្នកនាំពាក្យគណបក្សប្រជាជនកម្ពុជា បានថ្លែងថាវិទ្យុបារាំងថា បាឋកថានោះ មានខ្លឹមសាររួមគឺនយោបាយឈ្នះៗ។ បាឋកថាដែលលោកនាយករដ្ឋមន្ត្រីបានអន្តរាគមន៍ផ្ទាល់ ក៏បានលើកឡើងពន្យល់លំអិតចំណុចសំខាន់ៗមួយចំនួន ស្តីពីដំណើរវិវឌ្ឍន៍របស់កម្ពុជាដែលបានឆ្លងកាត់ភ្នក់ភ្លើងសង្គ្រាម។ ការរៀបចំបាឋកថានេះ គឺដើម្បីចែករំលែកបទពិសោធន៍ពីថ្នាក់ដឹកនាំដល់យុវជនជំនាន់ក្រោយដែលជាអ្នកបន្តវេន។
បើតាមលោកសួស យ៉ារ៉ាដដែល ដើម្បីរក្សាសន្តិភាព និងរួបរួម កម្ពុជាត្រូវប្រកាន់គោលជំហរដោះស្រាយបញ្ហាដោយខ្លួនឯង(ខ្មែរ)ជាចាំបាច់ ក៏ដូចជាការបញ្ចប់វប្បធម៌សងសឹងរវាងអ្នកនយោបាយកម្ពុជាផងដែរ។
លោកយ៉ែម ប៉ុញ្ញឫទ្ធិ អ្នកនាំពាក្យគណបក្សសង្គ្រោះជាតិបានមានប្រសាសន៍ថា ការថ្លែងបាឋកថាទៅកាន់សិស្ស គឺជារឿងល្អ ប៉ុន្តែអ្វីដែលសំខាន់នោះគឺការគោរពអនុវត្តឱ្យបានពេញលេញ ក្នុងការរៀបចំ គ្រប់គ្រង និងដឹកនាំប្រទេស តាមលក្ខណជាប្រព័ន្ធដែលមានតម្លាភាព។ អ្នកនាំពាក្យរូបនេះ បានសង្កត់ធ្ងន់ថា បញ្ហាបូរណៈភាពទឹកដីដែលនៅមិនទាន់ដោះស្រាយបានរួចរាល់នោះ គឺមានន័យថាយុទ្ធសាស្ត្រឈ្នះៗរបស់ប្រមុខបក្សកាន់អំណាចជាង៣០ឆ្នាំ គឺមិនទាន់ជោគជ័យពេញលេញនៅឡើយទេ។ សម្រាប់លោកយ៉ែម ប៉ុញ្ញឫទ្ធិ យុទ្ធសាស្ត្រនេះ បានសម្រេចត្រឹមតែជាគ្រឹះប៉ុណ្ណោះ។
សូមរំលឹកជូនថា លោកនាយករដ្ឋមន្ត្រីហ៊ុន សែនធ្លាប់បានថ្លែងបាឋកថាស្តីពីគោលនយោបាយឈ្នះៗនេះ កាលពីលើកទី១ នៅឧសភា ប៉ុន្តែជាការថ្លែងក្នុងក្របខ័ណ្ឌគណបក្សរបស់ខ្លួនតែប៉ុណ្ណោះ។ ការថ្លែងបាឋកថារបស់លោកជាលើកទី២ជាមួយសិស្សសកលវិទ្យាល័យនេះ គឺជាការចែករំលែកចំណេះដឹងដ៏កម្ររបស់លោកនាយករដ្ឋមន្ត្រីហ៊ុន សែន។ យ៉ាងណាក៏ដោយ គណបក្សប្រជាជនកម្ពុជា មិនបានបញ្ជាក់ថា លោកនាយករដ្ឋមន្ត្រីហ៊ុន សែននឹងបន្តធ្វើបាឋកថានេះ ដល់សិស្សានុសិស្សទូទាំងប្រទេសឬយ៉ាងណានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ