វប្បធម៌សន្ទនា ជាមោទនភាពរបស់អ្នកនយោបាយ តែអ្នកគាំទ្រមិនសូវទុកចិត្ត
ចុះផ្សាយនៅថ្ងៃ៖
ស្តាប់ - ០៤:៥៤
វប្បធម៌សន្ទនា ត្រូវបានអ្នកនយោបាយកម្ពុជារំលឹកឡើងវិញ ជារឿយៗ នាពេលកន្លងមកនេះ។ ក្នុងនោះ មេដឹកនាំគណបក្សជាប់ឆ្នោតទាំងពីរ សុទ្ធតែបានបង្ហាញពីមោទនភាពរបស់ខ្លួនចំពោះវប្បធម៌សន្ទនា និងបានអះអាងថា តាមរយៈវប្បធម៌សន្ទនានេះ ស្ថានការណ៍នយោបាយនៅកម្ពុជានឹងមានលក្ខណៈល្អប្រសើរឡើងជាងមុនថែមទៀតផង។ នៅពីក្រោយមោទនភាព អ្នកគាំទ្រគណបក្សនយោបាយ ហាក់ដូចជាមិនសូវទុកចិត្តវប្បធម៌សន្ទនានេះប៉ុន្មានទេ។
នៅមុនពិធីបុណ្យចូលឆ្នាំថ្មីប្រពៃណីជាតិខ្មែរឆ្នាំ២០១៥នេះ តាមរយៈការចរចាសន្ទនាគ្នារវាងក្រុមការងារគណបក្សជាប់ឆ្នោតទាំងពីរជាបន្តបន្ទាប់ គណៈកម្មាធិការជាតិរៀបចំការបោះឆ្នោតថ្មីមួយបានប្រសូត្រឡើង។ ចំណែកសកម្មជនគណបក្សសង្គ្រោះជាតិដែលជាប់ពាក់ព័ន្ធនឹងប្រតិបត្តិការរំដោះទីលានប្រជាធិបតេយ្យកាលពីខែកក្កដាឆ្នាំ២០១៤ ក៏ត្រូវដោះលែងឲ្យនៅក្រៅឃុំផងដែរ។
លទ្ធផលអស់ទាំងនេះត្រូវបាន លោក សម រង្ស៊ី ប្រមុខបក្សជំទាស់ គូសបញ្ជាក់ថា បានមកពីវប្បធម៌សន្ទនារវាងគណបក្សសង្គ្រោះជាតិ និងគណបក្សប្រជាជនកម្ពុជា។ ចំណែកថ្នាក់ដឹកនាំគណបក្សកាន់អំណាច ក៏បានរំលឹកពីវប្បធម៌សន្ទនានេះដែរ។ នៅក្នុងពិធីបើកព្រឹត្តិការណ៍អង្គរសង្ក្រាន្តពីខេត្តសៀមរាប លោកនាយករដ្ឋមន្ដ្រី ហ៊ុន សែន បានប្រកាសថា វប្បធម៌សន្ទនាដែលលោកនិងលោកសម រង្ស៊ី ជាសហស្ថាបនិក គឺមិនមែនសម្រាប់តែមួយជំនាន់របស់លោកនោះទេ គឺសម្រាប់ជនជំនាន់ក្រោយ និង ជំនាន់កូនៗរបស់លោកបន្ថែមទៀត។ ប្រមុខរដ្ឋាភិបាលកម្ពុជារូបនេះ បង្ហាញពីបំណងរបស់ខ្លួន ដែលចង់ឲ្យប្រជាពលរដ្ឋនិងគណបក្សនយោបាយទាំងអស់នៅកម្ពុជា ប្រកាន់យកវប្បធម៌សន្ទនា។
វប្បធម៌សន្ទនាដែលបានសាបព្រួសនៅក្រោយកិច្ចព្រមព្រៀងបញ្ចប់វិបត្តិនយោបាយ កាលពីថ្ងៃទី២២កក្កដា ឆ្នាំ២០១៤ ឥឡូវនេះហាក់ដូចជាកំពុងតែចេញផ្លែផ្កាគួរជាទីពេញចិត្ត សម្រាប់អ្នកនយោបាយនៅកម្ពុជា។ ក៏ប៉ុន្តែ នៅពីក្រោយមោទនភាពរបស់អ្នកនយោបាយទាំងនេះ អ្នកគាំទ្រគណបក្សនយោបាយ ដោយចំពោះអ្នកគាំទ្រគណបក្សជំទាស់ ហាក់ដូចជាមិនសូវពេញចិត្ត និងទុកចិត្តវប្បធម៌សន្ទនានេះប៉ុន្មានទេ។
ជាដំបូង និយាយពីក្រុមអ្នកគាំទ្រដែលមិនសូវពេញចិត្ត។ មិនពេញចិត្ត ព្រោះឃើញគណបក្សសង្គ្រោះជាតិ បង្ហាញជំហរទន់ភ្លន់ជាមួយគណបក្សប្រជាជនកម្ពុជានៅមួយរយៈពេលចុងក្រោយនេះ ផ្ទុយពីអ្វីដែលគណបក្សធ្លាប់បានធ្វើនៅក្រោយការបោះឆ្នោតភ្លាមៗ។ កាលណោះ គណបក្សសង្គ្រោះជាតិ បានបង្ហាញពីជំហរឹងដូចដុំថ្ម បដិសេធដាច់ខាតលទ្ធផលបោះឆ្នោតដោយអះអាងថា គ.ជ.ប គ្មានអព្យាក្រឹត្យភាព និងទាមទារឲ្យមានការបោះឆ្នោតឡើងវិញ។ យ៉ាងណាក៏ដោយ ជំហដ៏រឹងមាំនោះប្រែក្លាយជាទន់ទៅវិញ នៅពេលមានការចរចាបែងចែកអំណាចនៅរដ្ឋសភាជាមួយគណបក្សប្រជាជនកម្ពុជា ក្នុងខែកក្កដា ឆ្នាំ២០១៤។
រហូតមកទល់ពេលនេះ ការចរចាសន្ទនាបែបទន់ភ្លន់រវាងគណបក្សដែលមានអាសនៈនៅក្នុងសភាទាំងពីរនៅតែបន្ត បើទោះបីជាមានភាពរកាំរកូសខ្លះ ក្នុងអំឡុងពេល៩ខែកន្លងទៅនេះក៏ដោយ។ គណបក្សទាំងពីរ សុទ្ធតែបង្ហាញការសាទរ ចំពោះវប្បធម៌សន្ទនានេះ។ ប៉ុន្តែអ្នកគាំទ្របក្សប្រឆាំងមួយចំនួនមិនពេញចិត្តទេ។ ពួកគេចង់ឲ្យគណបក្សសង្គ្រោះជាតិ ប្រកាន់ជំហររឹងមាំដូចកាលពីមុន ដើម្បីសម្រេចឲ្យបាននូវការទាមទាររបស់ខ្លួន។
ផ្ទុយពីការមិនពេញចិត្តនេះ អ្នកគាំទ្របក្សជំទាស់មួយចំនួនទៀត បានបង្ហាញពីការគាំទ្រវប្បធម៌សន្ទនា។ ប៉ុន្តែការគាំទ្រនេះ កើតឡើងទន្ទឹមគ្នានឹងភាពមិនទុកចិត្ត។ ទី១ មិនទុកចិត្តគណបក្សសង្គ្រោះជាតិ ខ្លាចថាគណបក្សនេះ ចរចាសន្ទនាជាមួយគណបក្សប្រជាជនកម្ពុជា ដើម្បីតែផលប្រយោជន៍ខ្លួននិងបក្សពួក។ និងទី២ មិនទុកចិត្តគណបក្សប្រជាជនកម្ពុជា ខ្លាចថា គណបក្សនេះ ប្រើល្បិចដើរខ្សែលើគណបក្សសង្គ្រោះជាតិដែលខ្លួនស្រឡាញ់ពេញចិត្ត។
ប៉ុន្តែ បើទោះជាមិនពេញចិត្តក៏ដោយ ពេញចិត្តក៏ដោយ អ្នកទាំងអស់នេះសុទ្ធតែទទួលស្គាល់ថា វប្បធម៌សន្ទនា គឺជាវិធីដោះស្រាយបញ្ហាដ៏ល្អបំផុត។ ជាការពិត ការសន្ទនាគឺជាចំណុចចាប់ផ្ដើមដ៏សំខាន់មួយសម្រាប់អ្នកនយោបាយខ្មែរ ដែលត្រូវធ្វើការជាមួយគ្នាដើម្បីដោះស្រាយបញ្ហាសំខាន់ៗរបស់ជាតិ។ ថ្វីត្បិតតែវប្បធម៌សន្ទនាហាក់ដូចជារីកចម្រើនទៅមុខបន្តិចក្ដី ក៏ប៉ុន្តែការមិនទុកចិត្តគ្នារវាងអ្នកនយោបាយនៅតែមាន។ កន្លងមក នៅក្នុងអំឡុងពេលចរចា ជំនួបប្រជុំរវាងអ្នកនយោបាយ កើតឡើងទន្ទឹមនឹងការគម្រាមចាប់ដាក់គុក។ សកម្មភាពអស់ទាំងនេះធ្វើឲ្យអត្ថន័យនៃវប្បធម៌សន្ទនា បាត់បង់អស់មួយផ្នែកធំ។
សរុបមកវិញ វប្បធម៌សន្ទនានៅតែត្រូវបានលើកទឹកចិត្ត ប៉ុន្តែជាមួយគ្នានោះ អ្នកនយោបាយគួរតែរៀនធ្វើការជាមួយគ្នាប្រកបដោយការគោរពនិងទុកចិត្ត។ ព្រោះបើគ្មានការទុកចិត្តទេ វប្បធម៌សន្ទនានេះ នៅទីបំផុត នឹងរលាយសាបសូន្យនៅថ្ងៃណាមួយជាក់ជាពុំខាន។ ដោយឡែកចំពោះអ្នកគាំទ្រគណបក្សនយោបាយ ដែលមិនពេញចិត្ត ឬមិនទុកចិត្តវប្បធម៌សន្ទនានេះ ថ្នាក់ដឹកនាំគណបក្សចាំបាច់ត្រូវពន្យល់ឲ្យច្បាស់ពីការសម្រេចចិត្ត និងជំហរបស់ខ្លួន។ ជាការពិត ការងារនេះជារឿងពិបាក ប៉ុន្តែមិនមែនមិនអាចទៅរួចសោះនោះទេ។ វាគ្រាន់តែត្រូវការពេលវេលា និងកិច្ចខិតខំប្រឹងប្រែងច្រើនតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ