តុលាការខេត្តស្វាយរៀងចាប់ឃុំខ្លួនបុរសម្នាក់រឿងបង្ហោះសារជេរប្រមាថព្រះមហាក្សត្រនិងនាយករដ្ឋមន្រ្តី
សាលាដំបូងខេត្តស្វាយរៀង នៅថ្ងៃព្រហស្បិ៍ម្សិលមិញនេះ បានសម្រេចឃុំខ្លួនបណ្តោះអាសន្នបុរសម្នាក់ឈ្មោះ គឹម បញ្ញា នៅក្នុងពន្ធនាគារ ដោយចោទប្រកាន់ពីបទ ជេរប្រមាថអង្គព្រះមហាក្សត្រ និងបទល្មើស៣ផ្សេងទៀត។ ការឃុំខ្លួននេះ ធ្វើឱ្យលោកគឹម បញ្ញា ក្លាយជាជនទី៥ហើយ ដែលត្រូវបានចាប់ខ្លួនដោយសារតែជេរប្រមាថព្រះមហាក្សត្រ បន្ទាប់ពីយុវជនម្នាក់ត្រូវបានតុលាការក្រុងភ្នំពេញកាត់ទោសដាក់ពន្ធនាគាររយៈពេល៣ឆ្នាំ ពីបទជេរប្រមាថព្រះមហាក្សត្រ កាលពីដើមឆ្នាំនេះ។
ចុះផ្សាយនៅថ្ងៃ៖
ស្តាប់ - ០២:០៣
លោក គឹម បញ្ញា ត្រូវបានអាជ្ញាធរខេត្តស្វាយរៀងចាប់ខ្លួនបាននៅក្នុងសង្កាត់បាវិត ក្រុងបាវិត ខេត្តស្វាយរៀងកាលពីថ្ងៃទី២២ ខែឧសភា ឆ្នាំ២០១៩។ លោកត្រូវបានចាប់ខ្លួន បន្ទាប់ពីបង្ហោះសារជាច្រើនតាមបណ្តាញសង្គមហ្វេសប៊ុក ក្នុងខ្លឹមសារជេរប្រមាថដល់អង្គព្រះមហាក្សត្រ លោកនាយករដ្ឋមន្រ្តីហ៊ុន សែន និង ថ្នាក់ដឹកនាំផ្សេងៗទៀត។ នៅពេលនេះ លោកគឹម បញ្ញា ត្រូវបានតុលាការខេត្តស្វាយរៀងសម្រេចឃុំខ្លួនបណ្តោះអាសន្ននៅក្នុងពន្ធនាគារខេត្តស្វាយរៀង ដើម្បីដំណើរការនីតិវិធីស៊ើបអង្កេត។
តុលាការខេត្តស្វាយរៀង បានចោទប្រកាន់លោកគឹម បញ្ញា ចំនួន៤ បទល្មើស គឺបទបរិហារកេរ្តិ៍ជាសាធារណៈ បទជេរប្រមាថជាសាធារណៈ បទញុះញង់ឱ្យប្រព្រឹត្តបទឧក្រិដ្ឋជាអាទិ៍ និង បទប្រមាថចំពោះអង្គព្រះមហាក្សត្រ។ នេះបើយោងតាមដីកាបង្គាប់ឱ្យឃុំខ្លួនជាបណ្តោះអាសន្នរបស់ចៅក្រមស៊ើបសួរសាលាដំបូងខេត្តស្វាយរៀង កាលពីថ្ងៃព្រហស្បតិ៍។
សូមកត់សម្គាល់ថា ការចាប់ខ្លួន និងឃុំខ្លួនលោកគឹម បញ្ញានេះ ធ្វើឡើងក្រោយពីតុលាការក្រុងភ្នំពេញបានសម្រេចកាត់ទោសយុវជនម្នាក់ឲ្យជាប់ពន្ធនាគាររយៈពេល ៣ឆ្នាំ និងពិន័យជាប្រាក់ចំនួន ៥លានរៀល កាលពីអំឡុងខែមករា ដើមឆ្នាំ២០១៩នេះ ពីបទប្រមាថចំពោះអង្គព្រះមហាក្សត្រ។ បើរាប់ត្រួសៗទៅ សំណុំរឿងលោកគឹម បញ្ញានេះ គឺជាករណីទី៥ហើយពាក់ព័ន្ធនឹងការជេរប្រមាថព្រះមហាក្សត្រ។ ករណីទីមួយ កើតឡើងទៅលើនាយកសាលាបឋមសិក្សាម្នាក់នៅក្នុងខេត្តកំពង់ធំ ដែលបានសរសេរប្រមាថដល់ព្រះមហាក្សត្រតាមបណ្ដាញសង្គមហ្វេសប៊ុក ជុំវិញការរំលាយអតីតគណបក្សសង្គ្រោះជាតិ។ ករណីទីពីរ គឺលើបុរសវ័យចំណាស់ម្នាក់ដែលមានមុខរបរជាជាងកាត់សក់នៅក្នុងខេត្តសៀមរាប ខណៈករណីទីបី គឺទៅលើលោកសម រង្ស៊ី ប្រធានស្តីអតីតគណបក្សសង្រ្គោះជាតិ។
អ្នកទាំងនេះ សុទ្ធតែត្រូវបានតុលាការធ្វើការចោទប្រកាន់ពីបទប្រមាថចំពោះអង្គព្រះមហាក្សត្រតាមមាត្រាស្ទួន៤៣៧ថ្មីនៃក្រមព្រហ្មទណ្ឌកម្ពុជា ដែលបានធ្វើវិសោធនកម្មកាលពីដើមឆ្នាំ២០១៨កន្លងទៅ។ តាមរយៈមាត្រាថ្មីនេះ ជនដែលប្រមាថចំពោះអង្គព្រះមហាក្សត្រ ត្រូវផ្ដន្ទាទោសដាក់ពន្ធនាគារពី ០១ឆ្នាំ ទៅ ០៥ឆ្នាំ និងពិន័យជាទឹកប្រាក់ពី ២លានរៀល ទៅ ១០លានរៀល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ