អាមេរិកអំពាវនាវឲ្យការបោះឆ្នោតថ្នាក់មូលដ្ឋាននៅកម្ពុជា ប្រព្រឹត្តទៅដោយសេរី និងគ្មានការគំរាមកំហែង
ក្រសួងការបរទេសអាមេរិក បានអំពាវនាវឲ្យការបោះឆ្នោតជ្រើសរើសក្រុមប្រឹក្សា ឃុំ-សង្កាត់ នៅក្នុងប្រទេសកម្ពុជា ប្រព្រឹត្តទៅដោយសេរី និងជៀសវាងការគំរាមកំហែង ឬការបំភិតបំភ័យ។ ការអំពាវនាវនេះ បានធ្វើឡើង កាលពីថ្ងៃទី១៩ ឧសភា ពោលគឺនៅមុនមួយថ្ងៃ ដែលគណបក្សចំនួន១២នៅកម្ពុជា បានចាប់ផ្តើមបើកយុទ្ធនាការឃោសនាបោះឆ្នោតជាផ្លូវការ កាលពីថ្ងៃទី ២០ ឧសភា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
បើទោះបីជាមិនទាន់មានការកត់សំគាល់ពីអំពើហិង្សា នៅថ្ងៃទី១នៃការឃោសនាបោះឆ្នោតដែលផ្តើមធ្វើកាលពីថ្ងៃទី២០ឧសភាម្សិលមិញនេះក្តី តែអ្នកនាំពាក្យក្រសួងការបរទេសអាមេរិក លោកស្រី Alicia Edwards បានអំពាវនាវសុំឲ្យការបោះឆ្នោតថ្នាក់មូលដ្ឋាននៅក្នុងប្រទេសកម្ពុជា ធ្វើឡើងដោយសេរី នឹងជៀសផុតពីការគំរាមកំហែង និងការបំភិតបំភ័យជាដើម។ អ្នកនាំពាក្យក្រសួងការបរទេសអាមេរិក ដែលទទួលបន្ទុកខាងកិច្ចការអាស៊ី (East Asia) លោកស្រី Alicia Edwards បានថ្លែងកាលពីថ្ងៃទី ១៩ ឧសភាថា សហរដ្ឋអាមេរិកសូមជម្រុញឲ្យរដ្ឋាភិបាលកម្ពុជាធានានូវលំហរនៃសេរីភាព ជៀសផុតពីការគំរាមកំហែង ឬការបំភិតបំភ័យ ហើយត្រូវតែគោរពនូវសិទ្ធិសេរីភាព និងឆន្ទៈនយោបាយរបស់ប្រជាពលរដ្ឋកម្ពុជាគ្រប់ៗរូប។
អ្វីជាការកត់សំគាល់ ការអំពាវនាវនេះ បានធ្វើឡើងនៅមួយថ្ងៃមុន ដែលគណបក្សនយោបាយចំនួន១២នៅកម្ពុជា បានផ្តើមបើកយុទ្ធនាការឃោសនាបោះឆ្នោតជាលើកដំបូង កាលពីថ្ងៃទី ២០ ឧសភា និងនៅប៉ុន្មានថ្ងៃក្រោយពីលោកនាយករដ្ឋមន្ត្រី ហ៊ុន សែន ដែលបានកាន់អំណាចជាង៣ទស្សវត្សន៍នៅកម្ពុជានោះ បានព្រមានពីការកើតឡើងនូវសង្គ្រាមស៊ីវិល ប្រសិនបើគណបក្សប្រជាជនកម្ពុជារបស់លោកចាញ់ឆ្នោត។ បន្ថែមលើនេះ រដ្ឋមន្ត្រីក្រសួងការពារជាតិកម្ពុជាលោក ទៀ បាញ់ ក៏បានព្រមានវាយបំបាក់ធ្មេញ អ្នកដែលហ៊ានតវ៉ាប្រឆាំង នឹងលទ្ធផលបោះឆ្នោតថែមទៀតផង។
ប៉ុន្តែទោះជាយ៉ាងនេះក្តី លោក សុខ ឥសាន អ្នកនាំពាក្យគណបក្សប្រជាជនកម្ពុជា បានស្វាគមន៍ចំពោះការអំពាវនាវរបស់ក្រសួងការបរទេសអាមេរិក។ លោកបានចាត់ទុកការអំពាវនាវនេះថា គឺស្របទៅនឹងការចង់បានរបស់រដ្ឋាភិបាលនិងគណបក្សប្រជាជនកម្ពុជា នៅក្នុងការធានានូវការរៀបចំការបោះឆ្នោតមួយប្រព្រឹត្តទៅដោយសេរី និងយុត្តិធម៌។
ចំណែកលោក អេង ឆៃអ៊ាង អនុប្រធានគណបក្សសង្គ្រោះជាតិ ក៏បានស្វាគមន៍ចំពោះការអំពាវនាវរបស់ក្រសួងការបរទេសអាមេរិកផងដែរ។ លោកបានលើកឡើងថា ការព្រួយបារម្ភរបស់ប្រទេសជាមិត្ត គឺមិនចង់ឲ្យកម្ពុជាវិលទៅរកសង្គ្រាមដូចអតីតកាលទៀតនោះទេ។
សូមបញ្ជាក់ថា យុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៤នេះ បានចាប់ផ្តើមពីថ្ងៃទី២០ឧសភា ដោយគ្រោងបញ្ចប់នៅថ្ងៃទី ០២ មិថុនា ហើយការបោះឆ្នោតនឹងធ្វើឡើងនៅថ្ងៃអាទិត្យ ទី៤ មិថុនា ដោយមានគណបក្សនយោបាយចំនួន១២ចូលរួម។ ប៉ុន្តែក្នុងចំណោមនេះ មានតែគណបក្សនយោបាយធំៗចំនួន២ប៉ុណ្ណោះ គឺគណបក្សប្រជាជនកម្ពុជា និងគណបក្សសង្គ្រោះជាតិ ដែលបានដាក់បេក្ខភាពប្រកួតប្រជែងស្មើគ្នាជាលើកដំបូង ចាប់តាំងពីមានការបោះឆ្នោតឃុំសង្កាត់លើកទី១ កាលពីឆ្នាំ២០០២មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ