ការលើកលែងទោសទណ្ឌិតក្នុងពិធីបុណ្យចូលឆ្នាំខ្មែរត្រូវបានលើកពេល
មន្ត្រីជាន់ខ្ពស់ក្រសួងយុត្តិធម៌បានឲ្យដឹងថា នៅក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរនេះ នឹងមិនមានការលើកលែងទោស និងការបន្ធូបន្ថយទោសសម្រាប់ទណ្ឌិតនោះទេ ដោយលើកពេលទៅធ្វើនៅក្នុងឱកាសនៃពិធីបុណ្យពិសាខបូជាខាងមុខនេះវិញ។ សូមបញ្ជាក់ថា ជាប្បវេណី កម្ពុជាតែងតែធ្វើពិធីលើកលែងទោស ឬបន្ធូបន្ថយទោសដល់ទណ្ឌិត៣ដងក្នុងមួយឆ្នាំ។
ចុះផ្សាយនៅថ្ងៃ៖
ស្តាប់ - ០២:០៣
ការលើកលែងទោស ឬបន្ធូបន្ថយទោសទណ្ឌិតនៅក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរនេះ នឹងមិនមាននោះទេ តែសំណើរនេះនឹងយកទៅពិនិត្យសម្រេចនៅក្នុងឱកាសនៃពិធីបុណ្យពិសាខបូជាខាងមុខនេះវិញ។ នេះបើយោងតាមអ្នកនាំពាក្យក្រសួងយុត្តិធម៌កម្ពុជាលោក ជីន ម៉ាលីន។
លោក ជីន ម៉ាលីន បានលើកហេតុផលថា គណៈកម្មការថ្នាក់ជាតិ មិនមានពេលវេលាគ្រប់គ្រាន់ក្នុងការពិនិត្យទៅលើឯកសាររឺបញ្ជីឈ្មោះរបស់ទណ្ឌិតដែលត្រូវបានបញ្ជូនមកពីថ្នាក់ខេត្តនោះទេ។ ដោយឡែក នៅក្នុងសេចក្តីជូនដំណឹងរបស់រដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍនា កាលពីថ្ងៃទី៧មេសា បានលើកឡើងថា ក្នុងចំណោមរបាយការណ៍ស្នើសុំបន្ធូបន្ថយទោស និងលើកលែងទោសរបស់គណៈកម្មការថ្នាក់រាជធានី-ខេត្ត ចំនួន១២ ពុំទាន់អនុវត្តឲ្យបានត្រឹមត្រូវតាមលក្ខខណ្ឌ និងការរៀបចំឯកសារមិនបានត្រឹមត្រូវទៅតាមគោលការណ៍ និងទម្រង់លក្ខខណ្ឌដែលមានចែងក្នុងបទបញ្ញត្តិច្បាប់ជាធរមាននៅឡើយទេ ខណៈសំណុំឯកសាររបស់ទណ្ឌិតមួយចំនួននៅខ្វះព័ត៌មានជាច្រើន។
ត្បិតមានមូលហេតុយ៉ាងនេះក្តី ការលើកលែងទោស និងការបន្ធូបន្ថយទោសក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិនេះ នឹងទៅធ្វើរួមគ្នានៅក្នុងពិធីបុណ្យពិសាខបូជា ដែលជាពិធីបុណ្យសាសនាដ៏ធំរបស់កម្ពុជា ត្រូវនឹងថ្ងៃទី២០ខែឧសភាខាងមុខនេះវិញ។
ជាប្បវេណី ព្រះមហាក្សត្រកម្ពុជាតែងតែធ្វើពិធីលើកលែងទោស និងបន្ធូរបន្ថយទោសទៅដល់ទណ្ឌិតក្នុងមួយឆ្នាំៗ ចំនួន៣ដង គឺនៅក្នុងពិធីបុណ្យចូលឆ្នាំខ្មែរម្តង, បុណ្យវិសាខបូជាម្តង និងពិធីបុណ្យអុំទូកម្តងទៀត។ ទណ្ឌិតដែលគួរទទួលបានការលើកលែងទោស ជាទណ្ឌិតដែលបានអនុវត្តទោស២ភាគ៣នៃទោសសរុប និងទណ្ឌិតដែលអនុវត្តទោសបាន១ភាគ៣នៃទោសសរុប អាចទទួលបានការបន្ធូរបន្ថយទោស ប្រសិនបើពួកគេត្រូវបានគេរកឃើញថា បានកែខ្លួននៅក្នុងអំឡុងពេលនៃការជាប់ឃុំឃាំងក្នុងពន្ធនាគារ។
សូមបញ្ជាក់ថា កម្ពុជាមានពន្ធនាគារទាំងអស់ចំនួន២៧កន្លែងនៅទូទាំងប្រទេស និងមានអ្នកទោសសរុបជាង១ម៉ឺន៨ពាន់នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ