លោក យឹម សុវណ្ណ៖ គណៈកម្មការជំនាញទាំង១០របស់គណបក្សសង្គ្រោះជាតិ មិនមែនជា“រដ្ឋាភិបាលស្រមោល”
ពីរថ្ងៃក្រោយពីការប្រកាសរបស់លោក សុន ឆ័យថា ការបង្កើតឡើងនូវគណៈកម្មការជំនាញចំនួន១០របស់គណបក្សប្រឆាំង ប្រៀបដូចជារដ្ឋាភិបាលស្រមោល ឬ (Shadow Cabinet ) នោះ នៅថ្ងៃនេះលោក យឹម សុវណ្ណ អ្នកនាំពាក្យគណបក្សសង្ក្រោះជាតិ ចេញមកច្រានចោលថា មិនមែនជា“រដ្ឋាភិបាលស្រមោល” នោះទេ។ បើតាមការបញ្ជាក់ពីលោក យឹម សុវណ្ណ គណៈកម្មការជំនាញរបស់គណបក្ស គឺគ្រាន់តែជារចនាសម្ព័ន្ធផ្ទៃក្នុងរបស់គណបក្សដែលបង្កើតឡើងដើម្បីស្រាវជ្រាវទៅលើវិស័យនានា ហើយផ្តល់យោបល់ទៅថ្នាក់ដឹកនាំគណបក្សប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:៥២
ទំនងជាដើម្បីគេចចេញពីការចោទប្រកាន់ពីរដ្ឋាភិបាលកម្ពុជាចំពោះការប្រើពាក្យថា “រដ្ឋាភិបាលស្រមោល”នោះ នៅថ្ងៃនេះ លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានចេញមុខមកបញ្ជាក់ជាថ្មីថា ការបង្កើតឡើងនូវគណៈកម្មការជំនាញទាំង១០ របស់គណបក្សសង្គ្រោះជាតិ កាលពីថ្ងៃទី៩សីហានោះ មិនមែនជា “រដ្ឋាភិបាលស្រមោល” នោះទេ។
លោក យឹម សុវណ្ណ បានបញ្ជាក់ច្បាស់ៗនៅក្នុងសន្និសីទកាសែតប្រចាំថ្ងៃរបស់គណបក្សប្រឆាំងនៅថ្ងៃនេះថា ការបង្កើតឡើងនូវគណៈកម្មការជំនាញរបស់គណបក្សសង្គ្រោះជាតិ គឺគ្រាន់តែជារចនាសម្ព័ន្ធផ្ទៃក្នុងរបស់គណបក្សនិងនៅក្នុងជួរគណៈកម្មាធិការនាយក ឬក្រុមសមាជិកសភាគណបក្សសង្គ្រោះជាតិតែប៉ុណ្ណោះ។ ជារចនាសម្ព័ន្ធ ដែលគណបក្សបង្កើតឡើងដើម្បីប្រមូលធនធានមនុស្ស ឬអ្នកជំនាញទៅតាមវិស័យនានាក្នុងគោលបំណងដើម្បីសិក្សាស្រាវជ្រាវ និងតាមដានទៅលើវិស័យរបស់ខ្លួនហើយផ្តល់យោបល់ទៅឲ្យថ្នាក់ដឹកនាំគណបក្ស និងគណៈកម្មការជំនាញដែលខ្លួនបានកាន់កាប់នៅក្នុងរដ្ឋសភាចំនួន៥និងអនុប្រធានចំនួន៥ទៀត។ លោក យឹម សុវណ្ណបានបញ្ជាក់ថាវាមិនមែនជា“រដ្ឋាភិបាលស្រមោល”ដើម្បីទៅតតាំងជាមួយរដ្ឋមន្ត្រីឬរដ្ឋាភិបាលរបស់គណបក្សប្រជាជនកម្ពុជានោះទេ។
គួររំលឹកជូនថា នៅក្នុងសន្និសីទកាសែតកាលពីថ្ងៃទី៩សីហា លោក សុន ឆ័យ ប្រធានក្រុមតំណាងរាស្ត្រគណបក្សសង្គ្រោះជាតិបានប្រៀបគណៈកម្មការជំនាញចំនួន១០របស់គណបក្សសង្គ្រោះជាតិ ដែលទើបបង្កើតឡើងទៅនឹងគណៈរដ្ឋមន្ត្រីស្រមោល ឬរដ្ឋាភិបាលត្រៀមនៅពេលគណបក្សសង្គ្រោះជាតិឈ្នះឆ្នោត។
គណៈកម្មការជំនាញទាំង១០ដែលដូចគ្នានឹងគណៈកម្មការជំនាញនៅក្នុងរដ្ឋសភានោះរួមមាន ទី១.គណៈកម្មការសិទ្ធិមនុស្សទទួលពាក្យបណ្តឹង ទី២.គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម ទី៣.គណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក ទី៤.គណៈកម្មការមហាផ្ទៃ ការពារជាតិ និងមុខងារសាធារណៈ ទី៥.គណៈកម្មការកិច្ចការបរទេសសហប្រតិបត្តិការអន្តរជាតិ ឃោសនាការ និងព័ត៌មាន ទី៦.គណៈកម្មការ នីតិកម្ម និងយុត្តិធម៌ ទី៧.គណៈកម្មការ អប់រំ យុវជន កីឡា ធម្មការកិច្ចការសាសនា វប្បធម៌ និងទេសចរណ៍ ទី៨. គណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ទី៩.គណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧហស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ និងទី១០.គឺគណៈកម្មការអង្កេត បោសសំអាត និងប្រឆាំងអំពើពុករលួយ។ គណៈកម្មការនីមួយៗ មានប្រធាន អនុប្រធាន និងសមាជិក ដែលមកពីក្រៅគណបក្សប្រឆាំងក៏ត្រូវបានអនុញ្ញាតិឲ្យចូលរួមផងដែរ។
សូមបញ្ជាក់ថា ក្រៅពីលោក យឹម សុវណ្ណ, លោក កឹម សុខា ប្រធានស្តីទីគណបក្សសង្គ្រោះជាតិក៏បានសរសេរនៅលើទំព័រហ្វេសបុករបស់លោកនៅថ្ងៃនេះដែរថា គណៈកម្មការជំនាញទាំងនេះមិនមែនជា“រដ្ឋាភិបាលស្រមោល”នោះទេ។ ប៉ុន្តែទន្ទឹមគ្នានេះ លោក កឹម សុខា បានអំពាវនាវឲ្យគណបក្សសង្គ្រោះជាតិត្រៀមធនធានមនុស្សដោយបើកទូលាយឲ្យមានការចូលរួមពីមជ្ឈដ្ឋាននានា និងកសាងសមត្ថភាព សម្រាប់អនុវត្តកម្មវិធីនយោបាយរបស់គណបក្ស នៅពេលគណបក្សសង្គ្រោះជាតិទៅដឹកនាំប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ