ក្រសួងមហាផ្ទៃអំពាវនាវឲ្យគណបក្សនយោបាយចំនួន២៣ទៅចុះបញ្ជី
ក្រសួងមហាផ្ទៃកាលពីថ្ងៃទី២២កក្កដាឆ្នាំ២០១៦ បានចេញសេចក្តីជូនដំណឹងឲ្យបណ្តាគណបក្សនយោបាយដែលទើបបង្កើតថ្មី ហើយមិនទាន់ចុះបញ្ជីស្របតាមច្បាប់នោះ ប្រញ៉ាប់ប្រញ៉ាល់ទៅចុះបញ្ជីនៅក្រសួងមហាផ្ទៃ ដើម្បីអាចធ្វើសកម្មភាពបានពេញលេញទៅតាមច្បាប់ដែលបានកំណត់។ សូមបញ្ជាក់ថា រហូតមកទល់នឹងពេលបច្ចុប្បន្ននេះ កម្ពុជាមានគណបក្សនយោបាយចំនួន៦៧ តែមានគណបក្សនយោបាយតែ៤៤ប៉ុណ្ណោះ ដែលបានចុះបញ្ជីនៅក្រសួងមហាផ្ទៃ។
ចុះផ្សាយនៅថ្ងៃ៖
ស្តាប់ - ០២:០០
បើផ្អែកតាមសេចក្តីជូនដំណឹងនេះ ក្រសួងមហាផ្ទៃបានកត់សំគាល់ថា កន្លងមកមានគណបក្សនយោបាយមួយចំនួនដែលបានសុំបង្កើតស្របតាមច្បាប់ ស្តីពីគណបក្សនយោបាយបាននឹងកំពុងធ្វើសកម្មភាព តែពុំទាន់បានចុះបញ្ជីនៅឡើយ។
សូមបញ្ជាក់ថា ផ្អែកតាមបទបញ្ញត្តិក្នុងមាត្រា៩ ត្រង់វាក្យខណ្ឌទី២ ជំពូកទី២ នៃច្បាប់ស្តីពីគណបក្សនយោបាយ បានចែងថា “គណបក្សនយោបាយដែលទើបផ្តើមបង្កើត ត្រូវធ្វើការបោះឆ្នោតជ្រើសតាំងគណៈកម្មាធិការបណ្តោះអាសន្ន ដែលមានសមាជិកយ៉ាងតិច៧រូប ហើយដែលម្នាក់ៗ មានអាយុយ៉ាងតិច២៥ឆ្នាំ សម្រាប់រៀបចំបែបបទនិងបំពេញលក្ខខណ្ឌនៃការសុំចុះបញ្ជីគណបក្សនយោបាយ តាមការកំណត់ដូចមានចែងនៅក្នុងជំពូកទី៥ នៃច្បាប់នេះ។ នៅក្នុងជំពូកទី៥ ត្រង់មាត្រា២០ នៃច្បាប់នេះ ក៏បានចែងដែរថា ដើម្បីទទួលបានការចុះបញ្ជីគណបក្សពេញលេញ ប្រធានគណបក្សនយោបាយ ត្រូវចុះហត្ថលេខាលើពាក្យស្នើសុំចុះបញ្ជីគណបក្សនយោបាយ អមដោយឈ្មោះនិងសញ្ញាសម្គាល់គណបក្ស, អាស័យដ្ឋានទីស្នាក់ការកណ្តាលគណបក្ស និងឯកសារមួយចំនួនទៀត ពិសេសគឺបញ្ជីឈ្មោះសមាជិកដែលមានស្នាមមេដៃចាប់ពី៤០០០នាក់ឡើងទៅ។ ការចុះបញ្ជីរបស់គណបក្ស គឺដើម្បីងាយស្រួលដល់ការធ្វើសកម្មភាពរបស់គណបក្សនយោបាយ ដូចជា ការលើកស្លាកសញ្ញាទីស្នាក់ការសាខានៅរាជធានីភ្នំពេញ និងនៅតាមបណ្តាខេត្តជាដើម។
គួរបញ្ជាក់ថា ការអំពាវនាវនេះ ស្របពេលដែលប្រទេសកម្ពុជា កំពុងត្រៀមរៀបចំការចុះឈ្មោះបោះឆ្នោតថ្មីឆ្នាំ២០១៦ ចាប់ពីថ្ងៃទី១កញ្ញា ដល់ថ្ងៃទី២៩វិច្ឆិកា ដើម្បីប្រើប្រាស់នៅក្នុងការបោះឆ្នោតឃុំសង្កាត់អាណត្តិទី៤ នៅថ្ងៃទី៤ មិថុនា ឆ្នាំ២០១៧ខាងមុខ។
សូមបញ្ជាក់ដែរថា រហូតមកទល់នឹងពេលបច្ចុប្បន្ននេះ កម្ពុជាមានគណបក្សនយោបាយចំនួន៦៧គណបក្ស តែក្នុងនោះ មានតែគណបក្សនយោបាយចំនួន៤៤ប៉ុណ្ណោះ ដែលបានចុះបញ្ជីនៅក្រសួងមហាផ្ទៃ ហើយគណបក្សនយោបាយចំនួន២៣ទៀត នៅពុំទាន់បានចុះបញ្ជីនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ