ហានីភ័យនៃបំណុលវ័ណ្ណក របស់កសិករខ្មែរ!
ចុះផ្សាយនៅថ្ងៃ៖
ស្តាប់ - ០៤:៣៧
កាលពីមុនគេនាំគ្នានិយាយអំពីបំណុលដែលកម្ពុជាជំពាក់បរទេស ប្រហែល ៥០០០ លានដុល្លារ ឬមានន័យថាពលរដ្ឋខ្មែរម្នាក់ៗជំពាក់បំណុលបរទេសប្រហែលជាង ៣០០ដុល្លារ។ ប៉ុន្តែ ឥឡូវនេះ ពលរដ្ឋខ្មែរជាច្រើនទៀត ជាពិសេសអ្នកក្រីក្រតាមទីជនបទ កំពុងជំពាក់លុយស្ថាប័នមីក្រូហិរញ្ញវត្ថុ វ័ណ្ណក។ ចុងក្រោយនេះស្រាប់តែលេចចេញព័ត៌មាន ស្តីពីស្ថាប័នមីក្រូហិរញ្ញវត្ថុដែលគ្មានច្បាប់យ៉ាងព្រោងព្រាត ដែលកំពុងបន្ថែមបំណុលឲ្យពលរដ្ឋក្រីក្រ។ តើអ្នកណានៅពីក្រោយស្ថាប័ន គ្មានច្បាប់ទម្លាប់ទាំងនោះ?
វត្តមានកាន់តែច្រើនឡើងនៃស្ថាប័នមីក្រូហិរញ្ញវត្ថុ នៅក្នុងប្រទេសកម្ពុជាគួរតែជាសញ្ញាល្អមួយសម្រាប់គ្រួសារក្រីក្រគ្មានទីពឹង។ ស្ថាប័នមីក្រូហិរញ្ញវត្ថុទាំងនោះ បានបង្កលក្ខណៈងាយស្រួលដល់ការខ្ចីបុលរបស់អ្នកក្រ ពីព្រោះវាមិនតម្រូវឲ្យមាននីតិវិធីស្មុគស្មាញដូចធនាគារទេ។ មានពលរដ្ឋខ្មែរមួយចំនួន បានកែប្រែជីវភាព និងបានអភិវឌ្ឍអាជីវកម្មរបស់ខ្លួនដោយសារតែកម្ចីខ្នាតតូចនេះ។
ប៉ុន្តែ ទន្ទឹមនឹងនោះ ក៏មានដែរ អ្នកដែលកំពុងជំពាក់គេវ័ណ្ណក ដោយសារតែប្រាក់កម្ចី គ្មានអ្វីសង។ ការប្រាក់ខ្ពស់ ការប្រើប្រាស់ប្រាក់កម្ចីមិនចំទិសដៅ ឬក៏ទម្លាប់ចូលចិត្តខ្ចី ដោយមិនបានគិតពីរបៀបសង... សុទ្ធសឹងជាមូលហេតុចម្បងៗ ដែលធ្វើឲ្យពលរដ្ឋខ្មែរមួយចំនួនមានបំណុលជាប់នឹងខ្លួនកាន់តែច្រើនឡើង។ យូរៗទៅ ប្លង់ផ្ទះ និងប្លង់ដីស្រែចម្ការបន្តិចបន្តួច ដែលជាដង្ហើមរស់ បានរត់ទៅសម្ងំក្នុងទូរដែករបស់ធនាគារយ៉ាងស្ងៀមស្ងាត់។
គ្មានតួលេខពិតប្រាកដ អំពីចំនួនកសិករក្រីក្រដែលជំពាក់បំណុលគេនោះទេ ប៉ុន្តែ អាជ្ញាធរនិងប្រធានស្ថាប័នមីក្រូហិរញ្ញវត្ថុមួយចំនួន បានបង្ហាញថា ទឹកប្រាក់សរុប ដែលស្ថាប័នមីក្រូហិរញ្ញវត្ថុបានបញ្ចេញទៅឲ្យកូនបំណុល មានមិនតិចជាង ៣ ៥០០ លានដុល្លារនោះឡើយ។ ថ្មីៗនេះ ស្រាប់តែលេចលឺព័ត៌មានស្តីពីអង្គការជាច្រើនកំពុងដើរតួជាស្ថាប័នមីក្រូហិរញ្ញវត្ថុហើយផ្តល់ប្រាក់កម្ចី ដល់ជនក្រីក្រដោយអត្រាការប្រាក់ខ្ពស់ថែមទៀត។
ជាការពិត ស្ថាប័នដែលគ្មានច្បាប់អនុញ្ញាតហើយអាចដើរប្រកបរបរផ្តល់កម្ចីដោយយកអត្រាការប្រាក់ខ្ពស់តាមបែបមិនស្មោះត្រង់ គឺជាគ្រោះថ្នាក់ធំធេងមួយសម្រាប់អ្នកក្រីក្រ។ វត្តមាននៃស្ថាប័នទាំងនោះមិនមែនជារឿងចៃដន្យទេ ពោលគឺសុទ្ធតែមានអ្នកកាងពីក្រោយយ៉ាងពិតប្រាកដ។ រដ្ឋមន្ត្រីក្រសួងមហាផ្ទៃ បានចេញបញ្ជាឲ្យមន្ត្រីរបស់ខ្លួនត្រួតពិនិត្យបញ្ហានេះ។ ប៉ុន្តែ បទបញ្ជានេះ អាចក្លាយទៅជាវិធីរកលុយរបស់មន្ត្រីអ្នកអនុវត្តន៍ទៅវិញក៏ថាបាន។ នេះជាអ្វីដែលថ្នាក់លើច្រើនតែមិនដឹង ពីព្រោះតែមន្ត្រីមានឥទ្ធិពលមួយចំនួននៅពីក្រោយទង្វើខុសច្បាប់ទាំងនោះ។ ហេតុនេះហើយបានជា ប្រតិបត្តិការរបស់សមត្ថកិច្ច ច្រើនតែរកមិនឃើញបទល្មើសឡើយ។ រឿងបែបនេះកើតមានក្នុងគ្រប់វិស័យ។
យោងតាមរបាយការណ៍របស់ធនាគារអភិវឌ្ឍន៍អាស៊ី ក៏ដូចជាធនាគារពិភពលោកដែរ បច្ចុប្បន្ន កម្ពុជាកំពុងជំពាក់បំណុលគេប្រហាក់ប្រហែល ៥ ០០០លានដុល្លារ ឬស្មើ ៣២ ភាគរយនៃផលិតផលក្នុងស្រុកសរុប (GDP) ។ និយាយឲ្យស្រួលស្តាប់ជាងនេះ ពលរដ្ឋខ្មែរម្នាក់មានបំណុលជាប់ខ្លួនប្រមាណជាង ៣០០ដុល្លារជាស្រេច។ ពិតហើយថាបំណុលរបស់រដ្ឋ គឺរដ្ឋជាអ្នកសង ប៉ុន្តែ ប្រាក់សំណងទាំងនោះ គឺបានមកពីការបង់ពន្ធរបស់ពលរដ្ឋគ្រប់គ្នា។ ចំណែកបំណុលផ្ទាល់ខ្លួនដែលចេះតែកើនឡើងឥតឈប់ឈរ គឺជាគ្រោះថ្នាក់ធំធេងមួយទៀត សម្រាប់កសិករក្រីក្រខ្មែរ។
មិនថាតែបញ្ហាមីក្រូហិរញ្ញវត្ថុខុសច្បាប់នេះទេ បណ្តាញឃុបឃិតបិទបាំងភ្នែកថ្នាក់លើគឺជាមូលហេតុចម្បងដែលធ្វើឲ្យវិធានការនានារបស់រដ្ឋាភិបាលគ្មានប្រសិទ្ធភាព។ នៅក្នុងវិស័យមីក្រូហិរញ្ញវត្ថុវិញ ការជំពាក់បំណុលគឺជាបន្ទុកយ៉ាងធ្ងន់មួយរបស់កសិករដែលគេមិនអាចមើលរំលងបានឡើយ។ ដើម្បីដោះស្រាយបញ្ហានេះ ជាបឋម គេត្រូវបញ្ឈប់សកម្មភាពអនាធិបតេយ្យទាំងឡាយក្នុងវិស័យមីក្រូហិរញ្ញវត្ថុដោយត្រូវវែកមុខអ្នកនៅពីក្រោយខ្នងរឿងនេះឲ្យបាន។
សម្រាប់ស្ថាប័ន ដែលមានច្បាប់ ពួកគេគួរបញ្ចុះតម្លៃការប្រាក់ឲ្យបានទាបបំផុត និងត្រូវផ្តល់សេវាកម្មពិគ្រោះយោបល់ និងតាមដានការប្រើប្រាស់ប្រាក់កម្ចីឲ្យមានប្រសិទ្ធភាពជាងនេះ។ មធ្យោបាយសំខាន់មួយទៀត សម្រាប់ជួយអ្នកក្រីក្រគឺ ការបង្កើតមូលនិធិដោយមានការជ្រោមជ្រែងពីមន្ត្រីមានឥទ្ធិពល និង មហាសេដ្ឋីនានា ពោលគឺ អំណឹះតទៅ ទាំងមន្ត្រីមានបុណ្យស័ក្តិ ទាំងអ្នករស់នៅលើគំនរទ្រព្យសម្បត្តិទាំងឡាយគួរផ្លាស់ប្តូរផ្នត់គំនិតពីការកេងប្រវ័ញ្ចអ្នកក្រទៅជាការជួយពួកគេវិញ។ ប្រសិនបើមិនដូច្នោះទេ អ្នកក្រច្បាស់ជាជាប់បំណុលវ័ណ្ណកដោះមិនចេញឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ