សកម្មជនបរិស្ថាន៖ ឡាវបញ្ជូនគ្រឿងចក្រ ទៅបន្តគម្រោងសាងសង់ទំនប់ដនសាហុង
ប្រទេសឡាវ នៅតែបន្តការសាងសង់ទំនប់វារីអគ្គីសនីដនសាហុង បើទោះបីជាមានការជំទាស់ពីកម្ពុជានិងប្រទេសដែលរងផលប៉ះពាល់នៅតាមដងទន្លេមេគង្គដទៃទៀតក៏ដោយ។ សកម្មជនបរិស្ថានដែលរស់នៅព្រំដែនកម្ពុជាឡាវ ក្នុងខេត្តស្ទឹងត្រែង បានបញ្ជាក់អះអាងថា ប្រាំថ្ងៃចុងក្រោយនេះ ប្រទេសឡាវបានបញ្ជូនគ្រឿងចក្រជាច្រើនគ្រឿងឆ្លងទៅត្រង់ចំណុចត្រូវសាងសង់ទំនប់ដនសាហុង។ តាមរយៈការវិវឌ្ឍចុងក្រោយនេះ ប្រភពដដែលបានសម្ដែងពីក្ដីបារម្ភ និងបានសំណូមពរឲ្យរដ្ឋាភិបាលកម្ពុជាចាត់វិធានការឲ្យម៉ត់ចត់ ដើម្បីរារាំងសកម្មភាពសាងសង់ទំនប់ដនសាហុងរបស់ឡាវ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ក្រុមហ៊ុនដែលទទួលខុសត្រូវសាងសង់ទំនប់ដនសាហុង បានចាប់ផ្ដើមទម្លាក់គ្រឿងចក្រពីដីគោក និងបន្តដឹកជញ្ជូនតាមសាឡាងទៅលើកោះ ត្រង់ចំណុចដែលត្រូវសាងសង់ទំនប់ដនសាហុង។ លោក សំរិទ្ធ វណ្ណា សមាជិកក្រុមយុវជនខ្មែរមហានគរ ដែលរស់នៅព្រំដែនកម្ពុជាឡាវ ក្បែរចំណុចសាងសង់ទំនប់ដនសាហុង បានបញ្ជាក់ប្រាប់វិទ្យុបារាំងនៅថ្ងៃទី២៩មិថុនានេះថា គ្រឿងចក្រដែលបញ្ជូនទៅដល់លើកោះ មានចម្រុះទាំងអស់ជាង១០គ្រឿង រួមមានទាំងឡានបែន ឡានឈូសដី និងអេស្កាឡេទ័រជាដើម។ គ្រឿងចក្រដែលបានបញ្ជូនទៅដល់កោះនោះ ក៏ចាប់ផ្ដើមធ្វើការឈូសឆាយដីនៅទីនោះផងដែរ។ នេះបើតាមប្រភពដដែល។
ការវិវឌ្ឍថ្មីនៃគម្រោងសាងសង់ទំនប់វារីអគ្គីសនីដនសាហុងនេះ បានធ្វើឲ្យប្រជាសហគមន៍មានក្ដីព្រួយបារម្ភជាខ្លាំង និងបានសំណូមពរឲ្យរដ្ឋាភិបាលកម្ពុជាចាត់វិធានការឲ្យម៉ត់ចត់ ដើម្បីរារាំងសកម្មភាពសាងសង់ទំនប់ដនសាហុងរបស់ឡាវ។
ចំណែក លោក សំរិទ្ធ វណ្ណា បានអះអាងថា ក្រុមយុវជនខ្មែរមហានគររបស់លោក នឹងជំរុញដល់គណៈកម្មការជាតិទន្លេមេគង្គ ជាពិសេសរដ្ឋាភិបាលកម្ពុជា ធ្វើយ៉ាងណាចាត់វិធានការជាមួយប្រទេសឡាវឲ្យបានម៉ត់ចត់ជាងសព្វថ្ងៃនេះ នៅចំពោះមុខបញ្ហាទំនប់វារីអគ្គីសនីដនសាហុង។
រីឯ លោក តឹក វណ្ណារ៉ា នាយកប្រតិបត្តិវេទិកានៃអង្គការមិនមែនរដ្ឋាភិបាល មិនទាន់បានផ្ទៀងផ្ទាត់ពីការរីកចំរើនថ្មីនៃការសាងសង់ទំនប់ដនសាហុងនេះនៅឡើយទេ។ ប៉ុន្តែប្រសិនបើនេះជាការពិត លោកនឹងបង្កើនសកម្មភាពតស៊ូមតិបន្ថែមទៀត ទាំងជាមួយអន្ដររដ្ឋាភិបាល ទាំងជាមួយអន្ដរសង្គមស៊ីវិលនៃប្រទេសដែលរងផលប៉ះពាល់ពីគម្រោងទំនប់វារីអគ្គីសនីដនសាហុង។ គឺតស៊ូមតិយ៉ាងណាឲ្យឡាវបញ្ឈប់គម្រោងសាងសង់ទំនប់វារីអគ្គីសនីដ៏ចម្រូងចម្រាស់នេះ ដើម្បីរង់ចាំការសិក្សាស្រាវជ្រាវពីផលប៉ះពាល់ជាមុនសិន។
សូមរំលឹកជូនថា គម្រោងសាងសង់ទំនប់វារីអគ្គីសនីដនសាហុង ជាប់នឹងព្រំដែនខេត្តស្ទឹងត្រែង គឺជាគម្រោងមួយ ក្នុងចំណោមគម្រោងទំនប់វារីអគ្គីសនីទាំង១២ ដែលគ្រោងសាងសង់នៅលើតួទន្លេមេ នៃទន្លេមេគ្គក្រោម ក្នុងតំបន់ស៊ីផាន់ដន របស់ប្រទេសឡាវ។ តាមការសិក្សាស្រាវជ្រាវរបស់សង្គមស៊ីវិល គម្រោងទំនប់វារីអគ្គីសនីដនសាហុង នឹងប៉ះពាល់ដល់មនុស្សជាង៦០លាននាក់ ដែលកំពុងរស់នៅអាស្រ័យផលនៅផ្នែកអាងទន្លេមេគង្គក្រោម។ វានឹងបង្កឲ្យមានការប្រែប្រួលចរន្តទឹក និងធ្វើឲ្យប៉ះពាល់ដល់មច្ឆាជាតិ ព្រមទាំងជីវចម្រុះជាច្រើននៅក្នុងទន្លេមេគង្គ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ