សាលាក្តីខ្មែរក្រហមរំពឹងថាសាលដីកាស្ថាពរ០០២វគ្គ១ នឹងអាចចេញនៅដើមឆ្នាំ២០១៦ បើទោះបីជាចម្រូងចម្រាស
សាលាក្តីខ្មែរក្រហមនៅថ្ងៃអង្គារទី៣០ មិថុនានេះ បានធ្វើសន្និសីទសារព័ត៌មានដើម្បីបង្ហាញសាធារណៈជនមុននឹងការចាប់ផ្តើមសវនាការលើបណ្តឹងសារទុក្ខក្នុងសំណុំរឿង០០២/០១ ប្រឆាំងនឹងអតីមេដឹកនាំខ្មែរក្រហម លោកនួន ជា និងខៀវ សំផន។ បើទោះបីជាមានបណ្តឹងសារទុក្ខគ្រប់ភាគីយ៉ាងចម្រូងចម្រាស់ក៏ដោយ ក៏សាលាក្តីខ្មែរក្រហមរំពឹងថាសាលដីកាស្ថាពរនឹងអាចចេញតាមកាលកំណត់។
ចុះផ្សាយនៅថ្ងៃ៖
ស្តាប់ - ០១:៥៨
អង្គជំនុំជំរះតុលាការកំពូលនៃសាលាក្តីខ្មែរក្រហម រំពឹងថាខ្លួននឹងអាចប្រកាសសាលក្រមជាស្ថាពរក្នុងសំណុំរឿង ០០២វគ្គទី១ ប្រឆាំងនឹងលោកខៀវ សំផន និង នួន ជា នៅត្រឹមត្រីមាសទី១ ឆ្នាំ២០១៦ តាមការគ្រោងទុក។ ប៉ុន្តែសាលក្រមនេះមានភាពចម្រូងចម្រាស់ក៏ព្រោះតែអតីតមេដឹកនាំកម្ពុជាប្រជាធិបតេយ្យដែលនៅសេសសល់ទាំងពីរ បានលើកទឡ្ហីករណ៍បណ្តឹងសារទុក្ខជំទាស់ប្រមាណ៣៧០បណ្តឹងទៅលើសេចក្តីសម្រេចរបស់អង្គជំនុំជម្រះសាលាដំបូង កាលពីខែសីហា ឆ្នាំ២០១៤។ អតីតមេដឹកនាំទាំងពីរនៃរបបកម្ពុជាប្រជាធិបតេយ្យ ប្តឹងទាស់លើការសម្រេចរបស់តុលាការដែលបានសម្រេចកាត់ទោសឱ្យជាប់ពន្ធនាគារអស់មួយជីវិត ក្នុងបទឧក្រិដ្ឋចំនួនពីរ គឺបទឧក្រិដ្ឋប្រឆាំងមនុស្សជាតិ ក្នុងអំឡុងពេលជម្លៀសនៅទីក្រុងភ្នំពេញ ឆ្នាំ១៩៧៥ និងការផ្លាស់ទីដោយបង្ខំបន្តបន្ទាប់ រួមទាំងការសម្លាប់នៅទួលពោធិ៍ជ្រៃ ក្នុងខេត្តពោធិ៍សាត់។
លោក ខៀវ សំផង បានស្នើឱ្យតុលាការកំណត់រយៈពេលនៃកំហុសរបស់ខ្លួនដែលតុលាការបានរកឃើញ ដោយឡែកលោកនួន ជាវិញ បានស្នើឱ្យតុលាការទម្លាក់ចោលការចោទប្រកាន់ និងដោះលែងលោកឱ្យនៅក្រៅឃុំ ក៏ព្រោះតែថា ការសម្រេចរបស់តុលាការគឺ មានកំហុសលើអង្គហេតុ និងអង្គច្បាប់។ ដោយឡែកសហព្រះរាជអាជ្ញាវិញ ក៏បានដាក់ពាក្យបណ្តឹងសារទុក្ខលើសហឧក្រិដ្ឋកម្មរួមទម្រង់ទី៣ ដែលអាចឱ្យមេដឹកនាំទាំងពីរនេះទទួលកំហុសរួមលើទង្វើរបស់គ្នីគ្នាខ្លួន។
សូមបញ្ជាក់ថា សវនាការលើបណ្តឹងសារទុក្ខលើកទី១ក្នុងសំណុំរឿង ០០២/០១ នឹងធ្វើឡើងនៅដើមខែកក្កដា ២០១៥ខាងមុខ។ បើតាមការបញ្ជាក់ពីលោក នេត ភក្ត្រា អ្នកនាំពាក្យសាលាក្តីខ្មែរក្រហមនៅថ្ងៃសវនាការខាងមុខគឺនឹងទទួលស្តាប់សាក្សីសំខាន់ចំនួន៣នាក់បន្ថែមទៀត។ ជាការផ្តល់សក្ខីកម្មលើបទចោទការសម្លាប់អតីតមន្ត្រីរដ្ឋការនៃសម័យលន់ នល់ និងអង្គហេតុឧក្រិដ្ឋកម្មនៅទួលពោធិ៍ជ្រៃ។ ប៉ុន្តែយ៉ាងណាក៏ដោយ លោក នេត ភក្ត្រា អ្នកនាំពាក្យសាលាក្តីខ្មែរក្រហម បានបញ្ជាក់ថា បើទោះបីសំណុំរឿងសាលក្រមចម្រូងចម្រាស់ក៏ដោយ ក៏ប៉ុន្តែតុលាការកំពុងព្យាយាមធ្វើកិច្ចការងារដើម្បីអាចឱ្យសាលក្រមក្នុងសំណុំរឿង០០២វគ្គទី១នេះ អាចដំណើរការបានតាមការគ្រោងទុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ