តុលាការកំពូលនៃសាលាក្ដីខ្មែរក្រហម សម្រចលើសំណើរបស់សហព្រះរាជអាជ្ញាក្នុងការឆ្លើយតបបណ្ដឹងសារទុកសំណុំរឿង០០២/១
សេចក្ដីសម្រេចរបស់តុលាការកំពូលនៃសាលាក្ដីខ្មែរក្រហម លើសំណើរបស់សហព្រះរាជអាជ្ញាទាក់ទងនឹងការបន្ថែមទំព័រនិងពេលវេលា ក្នុងការឆ្លើយតបចំពោះបណ្ដឹងសាទុក្ខក្នុងសំណុំរឿង០០២ដំណាក់កាលទី១ ត្រូវបានផ្សព្វផ្សាយជាសាធារណៈនៅថ្ងៃចន្ទ ទី៤ខែមេសាម្សិលមិញ។ ជាសេចក្ដីសម្រេច តុលាការកំពូលនៃសាលាក្ដីខ្មែរក្រហម បដិសេធសំណើសុំបន្ថែមពេលវេលា ប៉ុន្តែទទួលយកផ្នែកខ្លះនៃសំណើបន្ថែមទំព័រសារណារបស់ សហព្រះរាជអាជ្ញា តបទៅនឹងបណ្ដឹងសាទុក្ខរបស់មេធាវីការពារក្ដី៕
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
តុលាការកំពូលនៃសាលាក្ដីខ្មែរក្រហម បដិសេធសំណើសុំបន្ថែមពេលវេលា ប៉ុន្តែអនុញ្ញាតឲ្យសហព្រះរាជអាជ្ញាបន្ថែម៣០ទំព័រ ទៅលើសារណាកម្រាស់២៨០ទំព័ររបស់ខ្លួន ក្នុងការឆ្លើយតបទៅនឹងបណ្ដឹងសាទុក្ខ ក្នុងសំណុំរឿង០០២ វគ្គទី១។ សេចក្ដីសម្រេចរបស់តុលាការកំពូលនៃសាលាក្ដីខ្មែរក្រហមពេលនេះ ធ្វើឡើងបន្ទាប់ពីសហព្រះរាជអាជ្ញាក្នុងសំណុំរឿង០០២វគ្គ១ បានស្នើសុំបន្ថែមទំព័រនិងពេលវេលា ដើម្បីឆ្លើយតបទៅនឹងបណ្ដឹងសាទុក្ខរបស់មេធាវីការពារក្ដី លើសាលក្រមនៃសំណុំរឿង០០២វគ្គ១ ដែលមានជនជាប់ចោទ នួន ជា និងខៀវ សំផន។
សហព្រះរាជអាជ្ញាក្នុងសំណុំរឿង០០២វគ្គ១ បានលើកឡើងថា សារណាតបរួមកម្រាស់២៨០ទំព័ររបស់ខ្លួន គួរតែត្រូវបានបន្ថែមឲ្យដល់៤៦០ទំព័រ ហើយកាលបរិច្ឆេទដាក់សារណាតបនេះ គួរតែគិតរហូតដល់ថ្ងៃទី១៤ខែឧសភា ឆ្នាំ២០១៥។ បើតាមសហព្រះរាជអាជ្ញា ការកំហិតត្រឹម២៨០ទំព័រសម្រាប់សារណាតប ពុំមានប្រសិទ្ធភាពគ្រប់គ្រាន់ដើម្បីឆ្លើយតបទៅនឹងសារណាបណ្ដឹងសារទុក្ខនៃសំណុំរឿង០០២វគ្គ១នោះឡើយ។ សារណាបណ្ដឹងសារទុក្ខនៃសំណុំរឿង០០២វគ្គ១ របស់នួន ជា និងខៀវ សំផន ដែលមានកម្រាស់ជារួមរហូតដល់ទៅ៤៨០ទំព័រ។
ជាការឆ្លើយតប តុលាការកំពូលបានបដិសេធចោលនៅការលើកឡើងរបស់សហព្រះរាជអាជ្ញាដែលថា ចំនួនទំព័រសរុបចូលគ្នា នៃសារណាសាទុក្ខរបស់នួន ជា និង ខៀវ សំផន មានភាពចាំបាច់ដើម្បីធ្វើការឆ្លើយតប។ ប៉ុន្តែដោយសារតែតុលាការកំពូលធ្លាប់បានអនុញ្ញាតបន្ថែម៦០ទំព័រដល់សារណាបណ្ដឹងសាទុក្ខរបស់ នួន ជា តុលាការកំពូលពិចារណាឃើញថា វាជាការសមស្របក្នុងការផ្ដល់៣០ទំព័របន្ថែមទៀតដល់សហព្រះរាជអាជ្ញា ក្នុងការឆ្លើយតបជាភាសាអង់គ្លេស។ យ៉ាងណាក៏ដោយ ចំពោះបញ្ហាបន្ថែមពេលវេលា៣០ថ្ងៃសម្រាប់សារណាតបរបស់ព្រះរាជអាជ្ញា តុលាការសម្រេចបដិសេធចោលទាំងស្រុង ដោយអះអាងថា វាមិនមានភាពចាំបាច់ឡើយ។
គួរជម្រាបជូនថា សេចក្ដីសម្រេចរបស់តុលាការកំពូលនៃសាលាក្ដីខ្មែរក្រហម លើសំណើរបស់សហព្រះរាជអាជ្ញា សុំបន្ថែមទំព័រនិងពេលវេលាដើម្បីឆ្លើយតបនឹងបណ្ដឹងសារទុក្ខលើសាលក្រមសំណុំរឿង០០២វគ្គ១នេះ ត្រូវបានផ្សព្វផ្សាយជាសាធារណៈនៅថ្ងៃចន្ទ ទី៤ខែឧសភា ។ ប៉ុន្តែជាការកត់សម្គាល់ តុលាការកំពូលនៃសាលាក្ដីខ្មែរក្រហម បានទទួលសំណើរបស់សហព្រះរាជអាជ្ញា នៅថ្ងៃទី០២ខែមេសាឆ្នាំ២០១៥។ ហើយតុលាការកំពូលបានសម្រេចលើបញ្ហានេះ និងបានជូនដំណឹងពីសេចក្ដីសម្រេចរបស់ខ្លួនដល់ព្រះរាជអាជ្ញារួចហើយ នៅថ្ងៃទី០៣ខែមេសាឆ្នាំ២០១៥ តាមរយៈសារអេឡិចត្រូនិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ