សហព្រះរាជអាជ្ញាជាតិនិងអន្តរជាតិ ខ្វែងគំនិតគ្នា លើការចោទប្រកាន់លោក យឹម ទិត្យ អតីតកម្មាភិបាលខ្មែរក្រហម
សហព្រះរាជអាជ្ញាអន្តរជាតិ នៃតុលាការខ្មែរក្រហម នៅថ្ងៃទី ២ ខែកក្កដានេះ បានចេញសេចក្តីថ្លែងការណ៍មួយ ដើម្បីការពារជំហររបស់ខ្លួន ក្នុងការចោទប្រកាន់ទៅលើលោក យឹម ទិត្យ អតីតកម្មាភិបាលជាន់ខ្ពស់ខ្មែរក្រហម។ សម្រាប់សហព្រះរាជអាជ្ញាធរអន្តរជាតិ លោក យឹម ទិត្យ គឺជាអ្នកទទួលខុសត្រូវខ្ពស់បំផុតនៃរបបខ្មែរក្រហម ខណៈដែលសហព្រះរាជអាជ្ញាជាតិយល់ផ្ទុយពីនេះ។ យ៉ាងណាក៏ដោយ សេចក្តីសម្រេចមួយនឹងធ្វើឡើងនៅពេលខាងមុខ។
ចុះផ្សាយនៅថ្ងៃ៖
ភាពខ្វែងគំនិតគ្នានេះ បានស្តែងឡើងតាមរយៈដីកាសន្និដ្ឋានស្ថាពរនៅក្នុងសំណុំរឿង០០៤ ដែលភាគីទាំងពីរបានដាក់ទៅកាន់សហចៅក្រមស៊ើបអង្កេត កាលពីថ្ងៃទី ៣១ ឧសភា និងថ្ងៃទី ៤ ខែមិថុនា ដើម្បីសម្រេចថា លោក យឹម ទិត្យ ស្ថិតនៅក្រោមយុត្តាធិការរបស់តុលាការខ្មែរក្រហមឬទេ។ តាមពិតទៅ បើផ្អែកតាមវិធានផ្ទៃក្នុងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ដីកាសន្និដ្ឋានស្ថាពរនេះ ត្រូវដាក់ជាការសំងាត់ ប៉ុន្តែសហព្រះរាជអាជ្ញាអាចបង្ហាញដល់សាធារណជនបាននូវសេចក្តីសង្ខេបពីគោលបំណងនៃដីកាសន្និដ្ឋានរបស់ខ្លួន។
ម្លោះហើយ តាមរយៈសេចក្តីថ្លែងការណ៍នៅថ្ងៃនេះ សហព្រះរាជអាជ្ញាអន្តរជាតិនៃតុលាការខ្មែរក្រហម បានចេញមកការពារជំហររបស់ខ្លួនថា លោក យឹម ទិត្យ អតីតកម្មាភិបាលជាន់ខ្ពស់នៃរបបខ្មែរក្រហមនៅភូមិភាគនីរតី គឺស្ថិតនៅក្នុងយុត្តាធិការរបស់ អង្គជំនុំជម្រះវិសាមញ្ញក្នុងតុលាការកម្ពុជា។ បើតាមសេចក្តីថ្លែងការណ៍នេះ ការបញ្ជួនខ្លួនលោក យឹម ទិត្យ ទៅជំនុំជម្រះ នឹងមិនប៉ះពាល់ដល់ការផ្សះផ្សាជាតិ ស្ថេរភាព សន្តិភាព ឬសន្តិសុខក្នុងប្រទេសកម្ពុជានោះឡើយ។ ប៉ុន្តែសហព្រះរាជអាជ្ញាជាតិ យល់ផ្ទុយពីនេះ និងបានរក្សាគោលជំហរដើមរបស់ខ្លួនថា លោក យឹម ទិត្យ មិនស្ថិតនៅក្រោមយុត្តាធិការ ឬ ជាអ្នកទទួលខុសត្រូវខ្ពស់បំផុតនៃរបបខ្មែរក្រហមនោះឡើយ។
លោក យឹម ទិត្យ ត្រូវបានគេស្គាល់ថា ជាអតីតកម្មាភិបាលជាន់ខ្ពស់នៃរបបខ្មែរក្រហម ដែលមានតួនាទីជាលេខាតំបន់ភូមិភាគ១៣ ភូមិភាគនិរតី លេខាស្រុកគិរីវង្សខេត្តតាកែវ និងជាអនុលេខាភូមិភាគពាយ័ព្យ និងតំបន់ ១, តំបន់៣ និងតំបន់៤។ នៅក្នុងតួនាទីទាំងនេះ លោក យឹម ទិត្យ ត្រូវបានគេដឹងថា គឺជាជំនួយការរបស់ តាម៉ុក ដែលជាប្រធានភូមិភាគនីរតី។ ហើយនៅក្នុងតួនាទីនោះហើយ ដែលលោក យឹម ទិត្យ បានគ្រប់គ្រងមន្ទីរសន្តិសុខ (គុក) ហើយបានអនុវត្តគោលនយោបាយបោសសំអាតខ្មាំងនាឆ្នាំ១៩៧៧។ យ៉ាងណាក៏ដោយ ទាក់ទងនឹងការខ្វែងគំនិតគ្នានេះ នឹងត្រូវដោះស្រាយដោយសហចៅក្រមស៊ើបអង្កេតនៃអង្គជំនុំជម្រះវិសាមញ្ញក្នុងតុលាការកម្ពុជានៅពេលសមស្របខាងមុខនេះ។ នេះបើតាមការបញ្ជាក់ពី លោក នេត្រ ភត្រា ប្រធានផ្នែកកិច្ចការសាធារណៈ និងជាអ្នកនាំពាក្យតុលាការខ្មែរក្រហម។
គួរជំរាបជូនថា ក្រៅពីសំណុំរឿង០០១ និង សំណុំរឿង ០០២ តុលាការខ្មែរក្រហមបច្ចុប្បន្ន បានពង្រីកការចោទប្រកាន់នៅក្នុងសំណុំរឿង០០៣ ដែលមានជនជាប់ចោទម្នាក់ឈ្មោះ មាស មុត អតីតមេបញ្ជាការកងទ័ពជើងទឹកនៅខេត្តព្រះសីហនុនិងកំពត និងសំណុំរឿង ០០៤ ដែលមានជនជាប់ចោទចំនួន៣រូប រួមមាន លោក យឹម ទិត្យ លោក អោ អាន និងអ្នកស្រី អ៊ឹម ចែម ជាដើម។ ប៉ុន្តែ កាលពីថ្ងៃទី ២៩ ខែមិថុនា កន្លងទៅ លោកស្រី អ៊ឹម ចែម អតីតអភិបាលស្រុកព្រះនេត្រព្រះនាសម័យខ្មែរក្រហម ត្រូវបានតុលាការខ្មែរក្រហមសម្រេចលើកលែងការចោទប្រកាន់វិញ បន្ទាប់ពីមិនមានភស្តុតាងគ្រប់គ្រាន់ក្នុងការចោទប្រកាន់ថា លោកស្រី គឺជាអ្នកទទួលខុសត្រូវខ្ពស់បំផុតនៃរបបខ្មែរក្រហម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ